ગુજરાતમાં નકલીની બોલબાલા, ગાંધીનગર શિક્ષણ નિયામકનો બનાવટી બદલી હુકમ પકડાયો

ગુજરાતમાં છેલ્લાં 3 વર્ષથી નકલીની બોલબાલા છે. હવે ગાંધીનગર શિક્ષણ નિયામકનો બનાવટી હુકમ પકડાયો છે. બનાવટી હુકમ બનાવનાર બનાસકાંઠાના વડગામ તાલુકાની મજાદર પ્રાથમિક શાળાના આચાર્યને ફરજ મોકૂફ કરી ધાનેરા તાલુકાની નેનાવા પ્રાથમિક શાળામાં બદલી કરી દેવામાં આવી છે. જ્યારે આચાર્ય સામે ખાતાકીય તપાસ કરવાનો આદેશ કરી પોલીસ ફરિયાદ કરવાનો શિક્ષણ વિભાગે આદેશ કર્યો છે.

થરાદના ડુવા ગામની પ્રાથમિક શાળાના શિક્ષિકા મીનાબેન શીવાભાઈ પટેલે દીકરાની બિમારીના કારણે જિલ્લા ફેર બદલીની બનાસકાંઠા જિલ્લા પ્રાથમિક શિક્ષણાધિકારીને દરખાસ્ત કરી હતી. દરખાસ્ત સંદર્ભે શિક્ષણ વિભાગે મીનાબેનને કેટલીક પૂર્તતા કરવા જણાવ્યુ હતુ. શિક્ષિકાના પતિએ શિક્ષણ વિભાગમાં દરખાસ્તનું સ્ટેટસ જાણવા પ્રયાસ કર્યો હતો. શિક્ષિકાના પતિએ શિક્ષણ વિભાગમાં શિક્ષણ નિયામકનો બદલી હુકમ રજૂ કર્યો હતો. કચેરીના કર્મચારીને શંકા જતાં બદલી હુકમની ખરાઈ કરી હતી. ચકાસણી દરમિયાન નિયામકનો પત્ર બનાવટી હોવાનું માલૂમ પડ્યુ હતુ. તેથી શિક્ષણ વિભાગે શિક્ષિકા મીનાબેન, તેમના પતિ પ્રહલાદ પટેલ અને બનાસકાંઠા જિલ્લા પ્રાથમિક શિક્ષણાધિકારી વિનુ પટેલને બોલાવી પૂછપરછ કરી હતી.

શિક્ષિકાએ જણાવ્યુ કે, થરાદના પાવડાસણ ગામની પ્રાથમિક શાળાના શિક્ષક કુલદીપ ભાટીયાએ જિલ્લા ફેર બદલી માટેના ડોક્યુમેન્ટસની પૂર્તતા કરવી હોય તો બ્રિજેશ પરમાર નામના વ્યક્તિની મદદ લેવા કહ્યુ હતુ. શિક્ષિકાએ વડગામની મજાદર પ્રાથમિક શાળાના આચાર્ય બ્રિજેશ પરમારનો સંપર્ક કરતાં તેઓએ વોટ્સએપના માધ્યમથી શિક્ષણ વિભાગનો બદલી હુકમ મોકલી આપ્યો હતો. તેઓએ હુકમ મોકલ્યા બાદ જણાવેલ કે, હાલમાં લોકસભા ચૂંટણીની આચારસંહિતા અમલમાં હોવાથી છૂટા થવાની કાર્યવાહી થઈ શકશે નહી. બદલી અંગે કાર્યવાહી નહી થતાં શિક્ષિકાના પતિએ ગાંધીનગર સ્થિત વિદ્યા સમીક્ષા કેન્દ્રનો સંપર્ક કરતાં સમગ્ર મામલાનો ઘટસ્ફોટ થયો હતો.

બનાસકાંઠા જિલ્લા પ્રાથમિક શિક્ષણાધિકારીનો સંપર્ક કરી ફોટો બતાવતા તેઓએ મજાદર પ્રાથમિક શાળાના આચાર્ય બ્રિજેશ પરમારનો ફોટો હોવાનું જણાવ્યુ હતુ. જિલ્લા પ્રાથમિક શિક્ષણાધિકારીએ શિક્ષિકા, શિક્ષિકાના પતિ, પાવડાસણ પ્રાથમિક શાળાના મુખ્ય શિક્ષક કુલદીપ ભાટીયા, થરાદ તાલુકા પ્રાથમિક શિક્ષણાધિકારી, વડગામ તાલુકા પ્રાથમિક શિક્ષણાધિકારી અને મજાદર પ્રાથમિક શાળાના આચાર્ય બ્રિજેશ પરમારને કચેરીમાં બોલાવી સુનાવણી કરી નિવેદન લીધા હતા.

સમગ્ર મામલાની તપાસના અંતે શિક્ષણ નિયામકનો બનાવટી બદલી હુકમ તૈયાર કરવામાં બ્રિજેશ પરમારની ભૂમિકા સ્પષ્ટ થતાં શિક્ષણ વિભાગે બ્રિજેશ પરમારને ફરજ મોકૂફ કરી ધાનેરા તાલુકાની નેનાવા પ્રાથમિક શાળામાં બદલી કરી છે. જ્યારે શિક્ષક વિરૂદ્ધ ખાતાકીય તપાસ સોંપીને પોલીસ ફરિયાદ કરવા આદેશ કર્યો છે.

આરોપી આચાર્ય સામે શિષ્યવૃતિની ઉચાપતની તપાસ ચાલુ

વડગામ તાલુકાના મજાદર ગામની પ્રાથમિક શાળાના આચાર્ય બ્રિજેશ પરમારને તાત્કાલિક અસરથી સસ્પેન્ડ કરી દેવામાં આવ્યો છે. આરોપી આચાર્ય સામે શિષ્યવૃતિની તપાસ પણ ચાલી રહી હોવાનું જાણવા મળ્યુ છે. તેથી તપાસ દરમિયાન આરોપી આચાર્ય અંગે વધુ ખુલાસા થાય તેવી શક્યતા છે.