અમદાવાદ શહેરને દેશનું સૌથી સુરક્ષિત શહેર જાહેર કરાયું છે અને આ છબી જાળવી રાખવા માટે અમદાવાદ ક્રાઇમ બ્રાન્ચે એક મોટું પગલું ભર્યું છે. ક્રાઇમ બ્રાન્ચના મહિલા સેલ દ્વારા આગામી 30 દિવસ માટે રાત્રિના ખાસ ડ્રાઇવ શરૂ કરવામાં આવી છે. આ ડ્રાઇવનો મુખ્ય ઉદ્દેશ્ય મોડી રાત્રે પણ મહિલાઓ સુરક્ષિત હોવાની અનુભૂતિ કરે અને તેમની અવરજવર વધુ હોય તેવા વિસ્તારોમાં પોલીસની સઘન હાજરી સુનિશ્ચિત કરવાનો છે.
આ અભિયાનમાં પોલીસ રાત્રિ દરમિયાન સતત પેટ્રોલિંગ કરીને મહિલા મુસાફરો, મુલાકાતીઓ અને નાગરિકોમાં વિશ્વાસ સંપાદન થાય તેવા પ્રયાસો કરશે.
સંવેદનશીલ વિસ્તારો પર ખાસ ફોકસ
આ 30 દિવસની ડ્રાઇવ દરમિયાન અમદાવાદના મહત્ત્વના અને સંવેદનશીલ વિસ્તારો પર ખાસ ધ્યાન કેન્દ્રિત કરવામાં આવશે, જ્યાં રાત્રિના સમયે મહિલાઓની અવરજવર વધારે હોય છે. ખાસ કરીને એસ.જી. હાઈવે અને આસપાસના વિસ્તાર, એસ.પી. રિંગ રોડ અને સાબરમતી રિવરફ્રન્ટના વિસ્તારોમાં સઘન પેટ્રોલિંગ કરવામાં આવશે.
આ વિસ્તારોમાં સર્વેલન્સ, પેટ્રોલિંગ અને તાત્કાલિક પ્રતિસાદ&nbsp;માટે ક્રાઇમ બ્રાન્ચની વધારાની ટીમો કાર્યરત રહેશે. ગુનેગારોમાં પોલીસની ધાક રહે અને મહિલાઓની સલામતી વધુ મજબૂત બને તે મુખ્ય હેતુ છે.
આ ડ્રાઇવ દરમિયાન પોલીસ માત્ર પેટ્રોલિંગ જ નહીં, પરંતુ જાહેર સ્થળોએ મહિલાઓને હેરાન કરનારા અસામાજિક તત્વો અને રોમિયો સામે કડક કાર્યવાહી કરશે.&nbsp;
અહીં જુદા જુદા કાયદાઓ જેવા કે ગુજરાત પોલીસ એક્ટ: જાહેર ઉપદ્રવ, ઇવ-ટિઝીંગ (છેડતી) અને ગેરશિસ્ત ભર્યું વર્તન,&nbsp;જુવેનાઇલ જસ્ટિસ એક્ટ હેઠળ કિશોર-સગીરો સાથે સંકળાયેલા કિસ્સાઓ, ભારતીય ન્યાય સંહિતા (BNS) અને અન્ય કાયદાઓ હેઠળ કાર્યવાહી કરવામાં આવશે.&nbsp;
અમદાવાદ પોલીસની શી ટીમ (SHE Team) પણ આ ડ્રાઇવ દરમિયાન રાઉન્ડ ધી ક્લોક કાર્યરત રહેશે. મહિલાઓને કોઈપણ પ્રકારની મદદની જરૂર હોય તો શી ટીમ તાત્કાલિક સ્થળ પર પહોંચી જશે.
અમદાવાદ ક્રાઇમ બ્રાન્ચે નાગરિકોને અપીલ કરી છે કે આ ડ્રાઇવમાં પોલીસને સહકાર આપે. જો કોઈપણ પ્રકારની હેરાનગતિ, ઉપદ્રવ કે શંકાસ્પદ પ્રવૃત્તિ જણાય, તો તરત જ નજીકના પોલીસ હેલ્પલાઈન કે કંટ્રોલ રૂમમાં જાણ કરવી. આ 30 દિવસની ડ્રાઇવનો હેતુ મહિલાઓની સુરક્ષાને વધુ મજબૂત બનાવવાનો અને રાત્રિના સમયમાં શહેરમાં કાયદો અને વ્યવસ્થા જળવાય તેવો પ્રયાસ કરવાનો છે.

ક્રાઈમ બ્રાન્ચની રાત્રિના ખાસ ડ્રાઈવ

SG હાઈવે, SP રિંગ રોડ, રિવરફ્રન્ટ સહિતના વિસ્તારોમાં સઘન પેટ્રોલિંગ અને કાર્યવાહી કરાશે.

November 20, 2025 | 16:02 IST