શિક્ષકોની અછતથી બાળકોનું ભવિષ્ય જોખમમાં

છોટા ઉદેપુર: સૂત્રો પોકળ સાબિત થયા, ઝરી ગામમાં શિક્ષકોના અભાવે શિક્ષણના ફજેતા

છોટા ઉદેપુર જિલ્લાના અંતરિયાળ વિસ્તારોમાં શિક્ષણની સ્થિતિ ચિંતાજનક બની રહી છે. સરકાર દ્વારા 'સૌ ભણે સૌ આગળ વધે' ના નારા લગાવવામાં આવે છે, પરંતુ વાસ્તવિકતામાં શિક્ષકોની ભારે અછતને કારણે બાળકોને પાયાનું શિક્ષણ મેળવવામાં પણ મુશ્કેલી પડી રહી છે. કદવાલ તાલુકાના ઝરી ગામમાં આવેલી પ્રાથમિક શાળા આ સમસ્યાનું જીવંત ઉદાહરણ છે.

એક શિક્ષક અને બે વર્ગખંડની હાલાકી : 

ઝરી ગામની પ્રાથમિક શાળામાં ધોરણ 1 થી 5 માં અનેક બાળકો અભ્યાસ કરે છે, પરંતુ શાળાની વ્યવસ્થા વેરવિખેર છે. બાલવાટિકાથી ધોરણ 2 સુધીના 72 બાળકો માટે માત્ર એક જ શિક્ષક ઉપલબ્ધ છે. આ બાળકો બે અલગ-અલગ વર્ગખંડમાં બેસે છે, પરિણામે જ્યારે શિક્ષક એક રૂમમાં ભણાવતા હોય ત્યારે બીજા રૂમના બાળકોને ફરજિયાત બેસી રહેવું પડે છે.

અડધા કિલોમીટરના અંતરે ચાલતી શાળા : 

ઝરી ગામની આ શાળા બે ભાગમાં વહેંચાયેલી છે. ધોરણ 3 થી 5 ના બાળકો માટેની શાળા મુખ્ય બિલ્ડિંગથી અડધો કિલોમીટર દૂર આવેલી છે. આ અંતરને કારણે બાળકોને પ્રાર્થના, મધ્યાન ભોજન અને નાસ્તા માટે વારંવાર એક સ્થળેથી બીજે સ્થળે જવું પડે છે. આ આવન-જાવનમાં બાળકોનો કિંમતી સમય વેડફાય છે અને તેની સીધી અસર તેમના અભ્યાસ પર પડી રહી છે.

મહેકમ ખાલી, તંત્રના ઠાલા આશ્વાસન : 

શાળાના રેકોર્ડ મુજબ પાંચ શિક્ષકોનું મહેકમ હોવા છતાં અત્યારે માત્ર ત્રણ જ શિક્ષકો ફરજ બજાવી રહ્યા છે. વાલીઓ અને સ્થાનિકોની ફરિયાદ છે કે શિક્ષકોની ઘટને કારણે તેમના બાળકોનું ભવિષ્ય અંધકારમય બની રહ્યું છે. બીજી તરફ, જિલ્લા પ્રાથમિક શિક્ષણ અધિકારીએ શિક્ષકોની નવી ભરતી પ્રક્રિયા ચાલુ હોવાનું જણાવીને ટૂંક સમયમાં સમસ્યાના નિરાકરણનું આશ્વાસન આપ્યું છે.

ઝરી ગામના રહીશો હવે વહેલી તકે વધારાના શિક્ષકની નિમણૂક અને બાળકો માટે યોગ્ય ભૌતિક સુવિધાઓની માંગ કરી રહ્યા છે.