કેન્દ્ર સરકારે યુનિફાઇડ પેન્શન સ્કીમનું ગેઝેટ કર્યુ જાહેર

સુરેશ વણોલ, અમદાવાદ

કેન્દ્ર સરકારે ઓગસ્ટ-2024માં પેન્શનને લઈને મોટો નિર્ણય કર્યો હતો. કેન્દ્રીય કેબિનેટે સરકારી કર્મચારીઓ માટે યુનિફાઇડ પેન્શન સ્કીમ (UPS)ને મંજૂરી આપી હતી. હવે જૂની અને નવીના બદલે UPS શરૂ કરવામાં આવશે. કેન્દ્ર સરકારે આજે UPS નું 15 પેજનું ગેઝેટ જાહેર કર્યુ છે. 

કેન્દ્ર સરકારના કર્મચારીઓ માટે જૂની અને નવી પેન્શન યોજનાને બદલે UPS શરૂ કરવામાં આવશે. આ યોજના મુજબ ઓછામાં ઓછી 25 વર્ષની નોકરી પછી બેઝિક પેમેન્ટના 50 ટકા રકમ UPS હેઠળ મળશે. એટલે કે આ રકમ પેન્શન તરીકે આપવામાં આવશે. 10 વર્ષની સર્વિસ પછી ઓછામાં ઓછા 10 હજાર રૂપિયા પેન્શન તરીકે મળશે.

કેન્દ્રીય મંત્રી અશ્વિની વૈષ્ણવે જણાવ્યુ હતું કે આ નવી પેન્શન યોજનાથી કેન્દ્ર સરકારના 23 લાખ કર્મચારીઓને ફાયદો થશે. આ યોજના 1 એપ્રિલ 2025થી અમલમાં આવશે. કેન્દ્ર સરકારના કર્મચારીઓને નેશનલ પેન્શન સિસ્ટમ (NPS) અને UPS વચ્ચે પસંદગી કરવાનો વિકલ્પ આપવામાં આવશે. કેન્દ્ર સરકારના NPS કર્મચારીઓને UPS પર સ્વિચ કરવાનો વિકલ્પ આપવામાં આવશે. માર્ચ-2024માં કેન્દ્ર સરકાર દ્વારા NPS સુધારવા માટે એક સમિતિની રચના કરવામાં આવી હતી. આ સમિતિએ દેશ અને દુનિયાની ઘણી પેન્શન યોજનાઓનો અભ્યાસ કરી UPS અમલી બનાવી છે. 

વૈષ્ણવે ઉમેર્યુ કે હવે કર્મચારીઓ પર કોઈ બોજ નહીં રહે. નવી પેન્શન યોજનામાં કર્મચારીએ તેના બેઝિક પગારના 10 ટકા યોગદાન આપવું પડશે અને સરકાર 14 ટકા આપે છે. સરકાર તેના તરફથી કર્મચારીના બેઝિક પગારના 18.5 ટકા યોગદાન આપશે.

NPS હેઠળ 2004થી અત્યાર સુધી નિવૃત્ત થયેલા અને માર્ચ 2025 સુધી નિવૃત્ત થનારા કર્મચારીઓને તેનો લાભ મળશે. તેઓને ફંડમાંથી પહેલાથી જ મેળવેલા અથવા ઉપાડેલા નાણાંને એડજસ્ટ કર્યા પછી ચુકવણી કરવામાં આવશે. સરકારનું યોગદાન 14 ટકાથી વધારીને 18.5 ટકા કરવામાં આવે તો પ્રથમ વર્ષમાં 6250 કરોડ રૂપિયાનો વધારાનો ખર્ચ થશે. આ ખર્ચ દર વર્ષે વધતો રહેશે.

માર્ચ-2024માં તત્કાલિન નાણા સચિવ ટીવી સોમનાથનની અધ્યક્ષતામાં NPSમાં સુધારા માટે એક સમિતિની રચના કરી હતી. સમિતિએ વિશ્વભરના દેશોની પેન્શન યોજનાઓ સહિત આંધ્રપ્રદેશ સરકાર દ્વારા કરવામાં આવેલા સુધારા સહિતનો અભ્યાસ કર્યો છે. તેમાં સામે આવ્યું છે કે સરકાર 40-45 ટકા પેન્શનની ખાતરી આપી શકે છે. ત્યારબાદ જાણવા મળ્યુ છે કે, સરકાર કેન્દ્રીય કર્મચારીઓને છેલ્લા પગારના 50 ટકા પેન્શનની ખાતરી આપી શકે છે. સરળ શબ્દોમાં કહેવામાં આવે તો નિવૃત્તિ પહેલા કર્મચારીનો છેલ્લો પગાર 50 હજાર રૂપિયા હોય તો સરકાર તેને દર મહિને 25 હજાર રૂપિયા પેન્શન આપવાની યોજના બનાવી રહી છે.