CBSEએ ડમી વિદ્યાર્થીઓના કારણે ગુજરાતની 14 શાળાઓની માન્યતા રદ્દ કરી

સેન્ટ્રલ બોર્ડ ઓફ સેકન્ડરી એજ્યુકેશન(CBSE)એ ડમી વિદ્યાર્થીઓના કારણે ગુજરાતની 14 શાળાઓની માન્યતા રદ કરી છે. જેમાં અમદાવાદની 4, જામનગરની 3, સુરત અને રાજકોટની 2-2 તેમજ વલસાડ, ભરૂચ અને અમરેલીની 1-1 શાળાઓનો સમાવેશ થાય છે. માન્યતા રદ કરાયેલી શાળાઓમાં આગામી શૈક્ષણિક સત્રથી વિદ્યાર્થીઓને પ્રવેશ આપી શકાશે નહીં. CBSE દ્વારા 18-19 ડિસેમ્બરના રોજ દેશભરની શાળાઓમાં તપાસ હાથ ધરવામાં આવી હતી. તપાસ દરમિયાન નોંધાયેલા વિદ્યાર્થીઓ કરતાં શાળામાં ઓછા વિદ્યાર્થીઓ જોવા મળતાં CBSE નોટિસ આપી ખુલાસો માગ્યો હતો. શાળાઓએ ખુલાસા કર્યા બાદ CBSEએ કાર્યવાહી કરી છે.

CBSE દ્વારા જારી કરાયેલી 'ડિસેફિલિએટેડ' શાળાઓની યાદીમાં અમદાવાદની ચાર સહિત ગુજરાતની કુલ 14 સેન્ટ્રલ બોર્ડ શાળાઓનો સમાવેશ થાય છે. આ યાદી સ્કૂલ એફિલિએશન રી-એન્જિનિયર્ડ ઓટોમેશન સિસ્ટમ (SARAS) 5.0 વેબસાઇટ પર પોસ્ટ કરવામાં આવી છે. ડિસેફિલિએશનના કારણે શાળાઓ નવા સત્રથી વિદ્યાર્થીઓને પ્રવેશ આપી શકશે નહીં. જ્યારે હાલની બેચને ના કહી શકશે નહી તેમ સૂત્રોએ જણાવ્યુ છે.

કઈ શાળાઓની માન્યતા રદ કરાઈ?

અમદાવાદની DLA એકેડેમી ઓફ લિટલ પીપલ, ધ ન્યૂ ટ્યૂલિપ ઇન્ટરનેશનલ સ્કૂલ, નિર્માણ હાઇસ્કૂલ અને હિરપુરની દિલ્હી પબ્લિક સ્કૂલનો સમાવેશ થાય છે. જ્યારે સુરત અને ભરૂચની કેન્દ્રીય વિદ્યાલય ઉપરાંત જામનગરની સરોજબેન મેમોરિયલ ઇન્ટરનેશનલ સ્કૂલ, રાજદીપ ઇંગ્લિશ સ્કૂલ અને સનફ્લાવર સ્કૂલ, રાજકોટની શ્રી BM ક્યાડા સ્કૂલ અને આર્ય વીર ઇન્ટરનેશનલ સ્કૂલ, સુરતની ગ્લોબલ ઇન્ડિયન ઇન્ટરનેશનલ સ્કૂલ, વલસાડની ભાસ્કર દ્રષ્ટિ વિદ્યાલય અને અમરેલીમાં કેલોરેક્સ પબ્લિક સ્કૂલની માન્યતા રદ કરવામાં આવી છે.