અમદાવાદના કર્મચારી રાજ્ય વીમા નિગમના તત્કાલિન નિરીક્ષકને 3 વર્ષ કેદની સજા

અમદાવાદ કર્મચારી રાજ્ય વીમા નિગમના તત્કાલિન નિરીક્ષક અનિલકુમાર સિંહને અપ્રમાણસર સંપત્તિના કેસમાં સીબીઆઈ કોર્ટે 3 વર્ષ સખત કેદ અને રૂપિયા 20 લાખનો દંડ ફટકાર્યો છે. આરોપી અનિલકુમાર સિંહે આવક કરતાં વધુ સંપત્તિ એકઠી કરતાં સીબીઆઈએ ગુનો નોંધી તપાસ કરી હતી. 

સીબીઆઈએ અમદાવાદના કર્મચારી રાજ્ય વીમા નિગમ (ESIC) ના તત્કાલિન નિરીક્ષક અનિલ કુમાર સિંહ વિરૂદ્ધ 31.12.2007ના રોજ ગુનો નોંધી તપાસ હાથ ધરી હતી. આરોપી અનિલકુમાર સિંહે 1.08.2001 થી 30.11.2007ના સમયગાળા દરમિયાન પોતાની આવકના સ્ત્રોત કરતાં વધુ અપ્રમાણસર સંપત્તિ એકઠી કરી હતી. સીબીઆઈની તપાસ દરમિયાન તેની આવકના સ્ત્રોત કરતાં 314 ટકા વધુ  હતી.

સીબીઆઈએ તપાસ પૂર્ણ કર્યા બાદ તા.9.12.2009 ના રોજ આરોપી વિરુદ્ધ ચાર્જશીટ દાખલ કરી હતી. આરોપીએ 01.01.2000 થી 01.07.2006 ના સમયગાળા દરમિયાન તેમની આવકના જાણીતા સ્ત્રોત કરતાં રૂપિયા 22,15,609 ની અપ્રમાણસર સંપત્તિ એકઠી કરી હતી. જે તેમના આવકના જાણીતા સ્ત્રોત કરતાં 84.6 ટકા વધુ હોવાનું તપાસ દરમિયાન બહાર આવ્યું હતું. 

સુનાવણી બાદ આરોપી અનિલ કુમાર સિંહને સીબીઆઈ કોર્ટે દોષિત ઠેરવી ઉપરોક્ત સજા ફટકારી છે. સુનાવણી દરમિયાન સીબીઆઈ કોર્ટે 59 સાક્ષીઓની ઉલટ તપાસ કરી 168 દસ્તાવેજી પુરાવાની ચકાસણી કરી હતી.