આદમખોરનો આતંક: માંડવીના ઉશ્કેર ગામે 7 વર્ષના બાળકને ફાડી ખાધું

સુરત જિલ્લાના માંડવી તાલુકાના ઉશ્કેર ગામે એક દીપડાએ 7 વર્ષના બાળકને ફાડી ખાધું હોવાની ઘટના સામે આવી છે. મૂળ મહારાષ્ટ્રના નંદુરબાર જિલ્લાના અને સુરત જિલ્લામાં શેરડી કાપણી કરતો શ્રમજીવી પરિવાર માંડવી તાલુકાના ઉશ્કેર ગામની સીમમાં પડાવ નાખી રહેતો હતો. ગતરોજ મોડી સાંજે શ્રમજીવી પરિવારનો સાત વર્ષનો અજય લાલસિંહ વસાવે જે ઘરની બહાર રમી રહ્યો હતો. એ દરમિયાન દબાતા પગે દીપડો આવ્યો અને બાળકને ખેંચીને નજીકના ખેતરમાં લઈ જઇ ફાડી ખાધો હતો.    બાળક નજરે ન ચડતા પરિવારે શોધખોળ હાથ ધરી જે દરમિયાન 300 મીટર દૂર ખેતરમાંથી બાળકનો મૃતદેહ મળી આવ્યો હતો. મૃતદેહની આસપાસ પંજાના નિશાન દેખાતા વન વિભાગની ટીમને જાણ કરવામાં આવી હતી.. પોલીસ અને વન વિભાગની ટીમ ઘટનાસ્થળે પહોંચી તપાસ હાથ ધરી હતી. બાળકના મૃતદેહનો કબજો લઇને નજીકમાં આરોગ્ય કેન્દ્રમાં પીએમ અર્થે લઈ ગયા હતા.    વિભાગની ટીમે દીપડાના હુમલાના ઘટનાસ્થળની આસપાસના વિસ્તારોમાં 10 પાંજરાઓ મારણ સાથે ગોઠવી દીધાં હતાં. તેમજ 7 ટીમો કામે લાગી ગઈ હતી. આ દરમિયાન બાળકને ફાડી ખાધા બાદ થોડી કલાકોનો અંતરે ફરી માનવભક્ષી દીપડો બાકી રહેલ શિકાર ખાવા આવતા પાંજરે પુરાઇ ગયો હતો.     વન વિભાગની ટીમ તુરંત દીપડાને પકડી સુરક્ષિત જગ્યાએ લઈ ગઇ હતી. ત્યારે હાલ માસૂમ બાળકને દીપડાએ ફાડી નાખી મોતને ઘાટ ઉતારતાં શ્રમજીવી પરિવારના પગ તળેથી જમીન સરકી ગઈ છે. સરકાર દ્વારા આપવામાં આવતી સહાય ટૂંક સમયમાં મળે તે માટે વન વિભાગની ટીમે કામગીરી પણ હાથ ધરી છે.