અરવલ્લી જિલ્લાના મોડાસામાં અન્ન અને નાગરિક પુરવઠા રાજ્ય મંત્રીના પુત્રની દાદાગીરી

અરવલ્લી જિલ્લાના મોડાસામાં અન્ન અને નાગરિક પુરવઠા વિભાગના રાજ્ય કક્ષાના મંત્રી ભીખુસિંહ પરમારના પુત્રની દાદાગીરી સામે આવી છે. ભીખુસિંહ પરમારના પુત્રએ કાયદો હાથમાં લઈ જાહેરમાં રીક્ષા ચાલકને ઢોર માર માર્યો હતો. રીક્ષા ચલાવતા યુવકને માર મારતો વીડિયો સોશિયલ મીડિયામાં વાયરલ થતાં રાજ્યમાં કાયદો વ્યવસ્થાની સ્થિતિને લઈ અનેક સવાલ ઉઠી રહ્યા છે.

મોડાસામાં અન્ન અને નાગરિક પુરવઠા વિભાગના રાજ્ય કક્ષાના મંત્રી ભીખુસિંહ પરમારના બે પુત્રોની દાદાગીરી સામે આવી છે. મંત્રીના પુત્રો કિરણસિંહ અને રણજીતસિંહે કાયદાને હાથમાં લઈ જાહેરમાં એક રીક્ષા ચાલકને ઢોર માર માર્યો હતો. મંત્રી પુત્રોની દાદાગીરીનો આ વીડિયો સોશિયલ મીડિયામાં વાયરલ થયો હતો. જેના કારણે અરવલ્લી જિલ્લા સહિત સમગ્ર રાજ્યમાં મામલો ચર્ચાસ્પદ બન્યો છે.

આ મુદ્દે મળેલી વિગતો અનુસાર, મોડાસામાં 17 ફેબ્રુઆરીના રોજ ભીખુસિંહ પરમારના દીકરા કિરણસિંહ પરમારનો પુત્ર એક્ટિવા લઈને જઈ રહ્યો હતો. તે સમયે રોંગ સાઈડમાં આવી રહેલા રીક્ષા ચાલક સાથે સાઈડ આપવા બાબતે બોલાચાલી થઈ હતી. આ બોલાચાલી દરમિયાન રીક્ષાચાલકે મંત્રીના પૌત્ર પર હુમલો કરી માર માર્યો હતો. આ ઘટના સીસીટીવી કેમેરામાં કેદ થઈ હતી. મંત્રીના પુત્રો કિરણસિંહ અને રણજીતસિંહે પોતાના દીકરા પર હુમલો કરનાર રીક્ષા ચાલકને શોધી કાઢી વળતો હુમલો કર્યો હતો. બંને ઘટનાના વીડિયો સોશિયલ મીડિયામાં વાયરલ થયા હતા.

મહત્વપૂર્ણ છે કે, બંને ઘટનાઓ સંદર્ભે હજુ સુધી પોલીસ ફરિયાદ થઈ નથી. મારામારીના વીડિયો સામે આવ્યા હોવા છતાં પોલીસે પણ કાયદેસરની કાર્યવાહી કરી નથી. બીઝેડ પોન્ઝી સ્કીમ કૌભાંડમાં પણ મંત્રી ભીખુસિંહ પરમારના પુત્રનું નામ ચર્ચામાં આવ્યુ હતુ. ત્યારે બે માસમાં મંત્રી ભીખુસિંહ પરમારનો બીજો વિવાદ સામે આવ્યો છે.