Ahmedabad માં ગુનેગારોની ગેરકાયદે મિલકતો પર Bulldozer નો કહેર

શહેરમાં ગુનાખોરી પર નિયંત્રણ લાવવા માટે પોલીસ અને અમદાવાદ મ્યુનિસિપલ કોર્પોરેશન (AMC) દ્વારા સખત પગલાં લેવામાં આવી રહ્યાં છે. આ કડીમાં સરખેજ વિસ્તારમાં ગેરકાયદે બાંધકામો સામે મોટી કાર્યવાહી હાથ ધરવામાં આવી, જેમાં દાયકાઓથી દારૂના ગેરકાયદે ધંધા સાથે સંકળાયેલા બુટલેગરો ઉદયસિંહ ધીરાવત અને શંકરલાલનાં ગેરકાયદે મકાનો પર બુલડોઝર ફેરવવામાં આવ્યું. આ કાર્યવાહી પોલીસ અને કોર્પોરેશનની સંયુક્ત ટીમની હાજરીમાં એલજી કોલેજ નજીક કરવામાં આવી.
પોલીસે આપેલી માહિતી અનુસાર, ઉદયસિંહ ધીરાવત સામે 17 ગુના, તેના પરિવારના સભ્યો સામે 10 ગુના, શંકરલાલ સામે 10 ગુના અને તેના પરિવાર સામે અન્ય ગુના નોંધાયેલા છે, જે કુલ મળીને આશરે 50 ગુનાઓ થાય છે. આ ગુનેગારો છેલ્લા 10 વર્ષથી દારૂના ગેરકાયદે ધંધા સહિતની ગુનાહિત પ્રવૃત્તિઓમાં સંડોવાયેલા હતા. આ ગુનાઓ દ્વારા ભેગી કરેલી મિલકતો અને ગેરકાયદે બાંધેલા મકાનોને નિશાન બનાવીને આ કાર્યવાહી હાથ ધરાઈ.   અમદાવાદના વસ્ત્રાલ વિસ્તારમાં લુખ્ખાઓના આતંકની ઘટનાઓ બાદ પોલીસે ગુનાખોરી સામે કડક વલણ અપનાવ્યું છે. પોલીસે શહેર અને આસપાસના જિલ્લાઓમાં ગુનાઓ સાથે સંકળાયેલા 7,000થી વધુ લુખ્ખાઓની યાદી તૈયાર કરી છે. આ યાદીમાંથી જે ગુનેગારોએ ગેરકાયદે બાંધકામો કર્યાં હોય અથવા વીજચોરી જેવી પ્રવૃત્તિઓમાં સંડોવાયેલા હોય, તેમની સામે સતત કાર્યવાહી શરૂ કરવામાં આવી છે. આજની કાર્યવાહી પણ આ જ અભિયાનનો એક ભાગ છે.   આસિસ્ટન્ટ કમિશનર ઓફ પોલીસ (ACP) એ.બી. વાળંદે જણાવ્યું હતું કે, "આ ગુનેગારો સામે વિવિધ ગુનાઓ નોંધાયેલા છે અને તેઓ લગભગ એક દાયકાથી ગેરકાયદે પ્રવૃત્તિઓમાં સંડોવાયેલા છે. અમે આવા ગુનેગારોની ગેરકાયદે મિલકતોની યાદી કોર્પોરેશનને સોંપી હતી, જેના આધારે આજે આ મકાનો તોડી પાડવામાં આવ્યાં."    અમદાવાદ પોલીસ અને કોર્પોરેશનની આ સંયુક્ત કાર્યવાહી ગુનાખોરી સામે ઝીરો ટોલરન્સની નીતિનું પરિણામ છે. આગામી દિવસોમાં પણ આવા ગેરકાયદે બાંધકામો અને ગુનાહિત પ્રવૃત્તિઓ સામે સખત કાર્યવાહી ચાલુ રહેશે. આ કાર્યવાહીથી શહેરમાં ગુનાખોરીને નાથવા અને કાયદાનું શાસન જાળવવાનો સ્પષ્ટ સંદેશ આપવામાં આવ્યો છે.   આ પણ વાંચો : અમદાવાદના જુહાપુરામાં કાર ચાલકે 8 વાહનોને અડફેટમાં લીધા બાદ તેનો જ મૃતદેહ મળ્યો   આપ અમારી WhatsApp ચેનલ સાથે પણ જોડાઇ શકો છો