ટીમ ઇન્ડિયાના વિજયના જશ્નમાં વડોદરામાં છુટા હાથની મારામારી

ચેમ્પિયન્સ ટ્રોફીની ફાઇનલમાં ટીમ ઇન્ડિયાએ ન્યુઝીલેન્ડને હરાવીને ટ્રોફી જીતી લેતાં દેશભરમાં જશ્નનો માહોલ જોવા મળી રહ્યો છે. રવિવારે રાત્રે ટીમ ઇન્ડિયા વિજેતા બન્યા બાદ તમામ શહેરોમાં ક્રિકેટ ફેન્સ રસ્તા પર તિરંગા લઇને નિકળી ગયા હતા અને ભારત માતા કી જયના નારા લગાવીને આતશબાજી કરી હતી અને ફટાકડા ફોડ્યા હતા. લોકોએ મોડી રાત સુધી જીતની ઉજવણી કરી હતી. આ જ રીતે વડોદરામાં પણ લોકો રસ્તા પર ઉતરી ગયા હતા અને ભવ્ય વિજયની ઉજવણી કરી હતી. જો કે માંડવી વિસ્તારમાં યુવાનોના 2 ગૃપ વચ્ચે છુટા હાથની મારામારી થઇ હતી. આ મારામારી લાંબો સમય ચાલતા તણાવ ફેલાઇ ગયો હતો. જો કે ત્યારબાદ મામલો થાળે પડ્યો હતો. 

વડોદરાના માંડવી વિસ્તારમાં જ્યારે લોકો જીતની ઉજવણી કરી રહ્યા હતા ત્યારે યુવાનો વચ્ચે કોઇ વાતે બોલાચાલી થતાં મામલો ગરમ બન્યો હતો અને યુવાનોના 2 ગૃપ વચ્ચે છુટા હાથની મારામારી થઇ ગઇ હતી. મારામારીની ઘટનામાં યુવાનોના 2 ગૃપ સામ સામે આવી ગયા હતા જેનાથી વાતાવરણ ગરમાઇ ગયું હતું. વાયરલ થયેલા વીડિયોમાં જોવા મળી રહ્યું છે કે યુવાનો એટલા ઉશ્કેરાયા હતા કે એકબીજા પર રીત સર તુટી પડ્યા હતા. જાહેરમાં રાત્રે યુવાનો વચ્ચે મુક્કાબાજી શરુ થતાં લોકોમાં ગભરાટ ફેલાઇ ગયો હતો

ભારતના ભવ્ય વિજય બાદ માંડવી વિસ્તારમાં હજારો લોકો હાથમાં તિરંગા સાથે નિકળ્યા હતા અને રસ્તામાં પગ મુકવાની પણ જગ્યા ન હતી ત્યારે યુવાનોના 2 ગૃપ સામે સામે આવી ગયા હતા અને મારામારી કરી હતી . જો કે કેટલાક લોકો વચ્ચે પડ્યા હતા અને મામલો શાંત થયો હતો. આ ઘટનામાં ક્યાય પણ વીડિયોમાં પોલીસ જોવા મળી ન હતી. જાણવા મળ્યા મુજબ  માંડવી વિસ્તારમાં ઉજવણીના ઉત્સાહમાં અચાનક બે ટોળા સામસામે આવી ગયા હતા અને યુવાનો ના બે ગ્રુપ વચ્ચે જાહેરમાં છુટ્ટા હાથની મારામારી થઇ હતી.