ભાવનગર જિલ્લાના વેળાવદર ભાલ પોલીસ સ્ટેશન હેઠળના જસવંતપુરા ગામે રવિવારે સાંજે કાયદો અને વ્યવસ્થાની સ્થિતિ વણસી હતી. બાતમીના આધારે જુગારની રેડ કરવા ગયેલી પોલીસ ટીમ પર અસામાજિક તત્વો અને સ્થાનિકોના ટોળાએ પૂર્વ આયોજિત કાવતરું રચીને લાકડાના ધોકા અને છરી વડે હિંસક હુમલો કર્યો હતો.
આ ઘટનામાં પોલીસ કર્મચારીઓને ગંભીર ઈજાઓ પહોંચાડ્યા બાદ તેમની પાસેથી લૂંટ પણ ચલાવવામાં આવી હતી.
રેડ દરમિયાન ટોળું વિફર્યું
વેળાવદર પોલીસ મથકના હથિયારી કોન્સ્ટેબલ લક્કીરાજસિંહ ગોહિલ, પો.કો. અભેસંગભાઈ અને ડ્રાઈવર પ્રતિપાલસિંહ ખાનગી વાહનમાં જસવંતપુરા ગામના સિકોતર માતાના મંદિર પાસે પેટ્રોલીંગમાં હતા.&nbsp;ત્યાં જાહેરમાં જુગાર રમી રહેલા શખ્સોને પકડવાનો પ્રયાસ કરતા જ એક મહિલાની ઉશ્કેરણીથી 15થી 20 લોકોનું ટોળું લાકડીઓ અને છરી સાથે પોલીસ પર તૂટી પડ્યું હતું.
હુમલાખોરો એટલા બેફામ બન્યા હતા કે તેમણે કોન્સ્ટેબલ લક્કીરાજસિંહના માથામાં લાકડાના ધોકા વડે ફટકા મારી માથું ફોડી નાખ્યું હતું. જ્યારે ડ્રાઈવર પ્રતિપાલસિંહને હથેળીના ભાગે છરીનો ઘા ઝીંકી નજીકના પાણીના તળાવમાં ફેંકી દીધા હતા.
આ હિંસક હુમલામાં ત્રણેય જવાનોને શરીરે ગંભીર મુંઢ ઈજાઓ પહોંચી હતી. ઈજાગ્રસ્તોને તાત્કાલિક ભાવનગરની સર ટી. હોસ્પિટલ ખસેડવામાં આવ્યા હતા, જ્યાં લક્કીરાજસિંહને માથામાં 4 ટાંકા અને પ્રતિપાલસિંહને હથેળીમાં 5 ટાંકા આવ્યા છે.
હુમલા સાથે લૂંટની પણ વારદાત
આરોપીઓએ માત્ર મારપીટ જ નહોતી કરી, પરંતુ પોલીસકર્મીઓ પાસેથી લૂંટ પણ ચલાવી હતી. લક્કીરાજસિંહના ખિસ્સામાંથી ₹2200 ભરેલું પાકીટ અને પ્રતિપાલસિંહ પાસેથી મોબાઈલ ફોન, ₹2000 રોકડા તથા ગાડીની ચાવી પણ આંચકી લેવામાં આવી હતી.
19 સામે નામજોગ ફરિયાદ
ઘટનાની જાણ થતા જ DYSP, LCB અને પોલીસનો મોટો કાફલો જસવંતપુરા દોડી ગયો હતો. પોલીસે આ મામલે રાકેશ ડાભી, નિલેશ મકવાણા સહિત 4 મહિલાઓ અને 19 નામજોગ શખ્સો વિરુદ્ધ BNSની વિવિધ કલમો (હુમલો, લૂંટ અને ફરજમાં રુકાવટ) હેઠળ ગુનો નોંધી આરોપીઓને પકડવા ચક્રો ગતિમાન કર્યા છે.

ગારની રેડમાં પોલીસ પર હિંસક હુમલો

જુગારીઓએ પોલીસનું માથું ફોડ્યું અને રોકડ-મોબાઈલની લૂંટ ચલાવી; ભારે ચકચાર

March 16, 2026 | 12:19 IST