ગુજરાતમાં ડ્રોન ઉડાડવા અને જાહેરમાં ફટાકડા ફોડવા પર 15 મે સુધી પ્રતિબંધ

ભારત-પાકિસ્તાન વચ્ચે ચાલી રહેલી તંગદિલી ભરી સ્થિતિને ધ્યાનમાં રાખીને સરહદી રાજ્ય ગુજરાતે વધુ સાવચેતી દાખવવાની દિશામાં મહત્વનો નિર્ણય કર્યો છે. રાજ્ય સરકારે જાહેરમાં ફટાકડા ફોડવા અને ડ્રોન ઉડાડવા પર 15 મે 2025 સુધી પ્રતિબંધ ફરમાવ્યો છે. ગૃહ વિભાગની સમીક્ષા બેઠક બાદ નિર્ણય લેવામાં આવ્યો છે. જેના વિશે ગૃહ રાજ્ય મંત્રી હર્ષ સંઘવીએ ટ્વિટર પર માહિતી આપી હતી.

ગૃહ વિભાગે સ્પષ્ટ સૂચના આપી છે કે 15 મે સુધી રાજ્યના કોઈપણ ભાગમાં જાહેર સ્થળો પર કોઈપણ પ્રકારના ડ્રોન ઉડાડવા કે ફટાકડા ફોડવાની મંજૂરી આપવામાં નહીં આવે. આવો નિર્ણય કોઈ ખાસ સમારોહ કે સામૂહિક કાર્યક્રમ હોય તો પણ લાગુ રહેશે. આ પ્રતિબંધનો ઉદ્દેશ્ય જનતાની સલામતી અને શાંતિ જાળવવાની છે. રાજ્ય સરકારે નાગરિકોને સહકાર આપવા તથા તમામ માર્ગદર્શિકાનું પાલન કરવા અપીલ પણ કરી છે.

‘ઓપરેશન સિંદૂર’ પછી દેશના ઉત્તર અને પશ્ચિમ ભાગમાં ખાસ કરીને સરહદી વિસ્તારોમાં થયેલાં તણાવના કારણે સુરક્ષા વ્યવસ્થામાં કડકાઈ લાવવાની જરૂરીયાત ઊભી થઈ છે. મળતી માહિતી પ્રમાણે, પાકિસ્તાન તરફથી કેટલાક દિવસોમાં મિસાઇલ કે ડ્રોન હુમલાના નિષ્ફળ પ્રયાસો થઈ ચૂક્યા છે. જેને લઈને દેશના સરહદી રાજ્યોમાં એલર્ટના પગલાં લેવામાં આવી રહ્યા છે.

કચ્છ, બનાસકાંઠા અને પાટણ જિલ્લો સરહદથી પાકિસ્તાન સાથે જોડાયેલા છે. આ વિસ્તારોમાં પહેલાંથી એલર્ટ સ્થિતિમાં રહી સુરક્ષા દળોને મજબૂત બનાવવામાં આવ્યા છે. આવા સંજોગોમાં કોઈપણ પ્રકારના સંદિગ્ધ ઉડ્ડયન યંત્રો અથવા વિસ્ફોટ જન્ય પ્રવૃત્તિઓ તંગદિલી વધારે તેવી સ્થિતિ ઊભી કરી શકે છે. તેથી રાજ્ય સરકારે ભયના કારણો દૂર કરવા અને શાંતિપૂર્ણ પરિસ્થિતિ જાળવવા નિર્ણય કર્યો છે.

રાજ્યની આંતરિક સલામતી અને સામાન્ય નાગરિકોના હિતને ધ્યાનમાં રાખીને નિર્ણય. કરાયો છે. સુરક્ષા એજન્સીઓએ પણ આ મુદ્દે ગંભીરતાપૂર્વક કામગીરી શરૂ કરી દીધી છે અને તમામ કલેક્ટરો તથા પોલીસ વડાઓને યોગ્ય કાર્યવાહી કરવા સૂચના આપવામાં આવી છે. રાજ્ય સરકાર દ્વારા ટૂંક સમયમાં વધુ એક માર્ગદર્શિકા બહાર પાડવાની શક્યતા છે. રાજ્યના નાગરિકોને શાંતિ જાળવવા અને કોઈપણ અફવા પર વિશ્વાસ ન કરવા પણ અપીલ કરવામાં આવી છે.