આસ્થાના ધામમાં દાનચોરી!

Ambaji Temple Theft Donation Cctv Security : ભારતના મંદિરો માત્ર આસ્થાના કેન્દ્રો જ નથી, પરંતુ સામાજિક, સાંસ્કૃતિક અને ધાર્મિક જીવનના મહત્વપૂર્ણ આધારસ્તંભ પણ છે.દેશભરમાં આવેલા મોટા મંદિરોમાં દરરોજ લાખો શ્રદ્ધાળુઓ દર્શન માટે આવે છે અને કરોડો રૂપિયાનું દાન પણ અર્પણ કરે છે.આવા દાનનો ઉપયોગ મંદિરના વિકાસ, ધાર્મિક વિધિઓ, સેવાકીય કાર્યો અને સમાજહિત માટે કરવામાં આવે છે.પરંતુ છેલ્લા કેટલાક સમયથી દેશના મોટા મંદિરોમાં દાનની ચોરી અને ગેરરીતિઓના કિસ્સાઓ સામે આવતા શ્રદ્ધાળુઓમાં ચિંતા વધી રહી છે.અયોધ્યાના શ્રીરામ મંદિરના દાન વ્યવસ્થાપન અંગે સામે આવેલા વિવાદો બાદ હવે ગુજરાતના પ્રસિદ્ધ શક્તિપીઠ અંબાજી મંદિરમાં પણ દાન ચોરીનો મામલો સામે આવતા અનેક પ્રશ્નો ઊભા થયા છે.દેશના સૌથી સુરક્ષિત અને સંવેદનશીલ ધાર્મિક સ્થળો ગણાતા મંદિરોમાં પણ જો દાન સુરક્ષિત ન રહે તો શ્રદ્ધાળુઓનો વિશ્વાસ ક્યાં સુધી જળવાઈ રહેશે તે ચર્ચાનો વિષય બન્યો છે.

અંબાજી મંદિરનો દાન ચોરીનો મામલો
ગુજરાતના બનાસકાંઠા જિલ્લામાં આવેલું અંબાજી મંદિર કરોડો હિંદુઓની આસ્થાનું કેન્દ્ર છે.દર વર્ષે ભાદરવી પૂનમ સહિત વિવિધ તહેવારો દરમિયાન લાખો શ્રદ્ધાળુઓ અહીં દર્શન કરવા આવે છે. મંદિરને દરરોજ મોટી માત્રામાં રોકડ,સોનું,ચાંદી અને અન્ય કિંમતી વસ્તુઓનું દાન પ્રાપ્ત થાય છે.તાજેતરમાં મંદિરના દાન સાથે સંકળાયેલી ગેરરીતિ અને ચોરીના આરોપો સામે આવ્યા બાદ સમગ્ર રાજ્યમાં ચર્ચા શરૂ થઈ છે. પ્રાથમિક માહિતી મુજબ દાનની ગણતરી અને વ્યવસ્થાપન દરમિયાન ગેરરીતિ થઈ હોવાની શંકાના આધારે તપાસ શરૂ કરવામાં આવી છે. સંબંધિત તંત્ર દ્વારા પુરાવાઓ એકત્ર કરવાની અને જવાબદાર વ્યક્તિઓ સામે કાર્યવાહી કરવાની પ્રક્રિયા હાથ ધરવામાં આવી હોવાનું જણાવાયું છે.

CCTV ફૂટેજમાં સામે આવ્યો દાનચોરીનો કિસ્સો
અંબાજી મંદિરમાં દાનની ગણતરી દરમિયાન એપ્રિલ મહિનામાં ચોરીનો મામલો સામે આવ્યો હતો. તપાસ દરમિયાન CCTV ફૂટેજમાં મુખ્ય આરોપી ચિરાગ ઠાકોર નોટોના બંડલ છુપાવતો જોવા મળ્યો હોવાનું પોલીસ તપાસમાં સામે આવ્યું હતું. તપાસ અનુસાર, 7 મેના રોજ આરોપીએ આશરે રૂ. 1.04 લાખનું નોટોનું બંડલ પોતાના ખિસ્સામાં છુપાવી બાથરૂમ જવાના બહાને બહાર લઈ જવાનો પ્રયાસ કર્યો હતો. આ મામલે બનાસકાંઠાના અધિક કલેક્ટરની ફરિયાદના આધારે અંબાજી પોલીસ સ્ટેશનમાં ગુનો નોંધવામાં આવ્યો હતો.

ત્રણ આરોપીઓની ધરપકડ,હાલ જામીન પર મુક્ત
દાનચોરીના કેસમાં પોલીસે ત્રણ આરોપીઓની ધરપકડ કરી હતી. ત્યારબાદ કાનૂની કાર્યવાહી દરમિયાન આરોપીઓને કોર્ટમાંથી જામીન મળી ગયા હતા.તપાસ દરમિયાન દાનની ગણતરી પ્રક્રિયા, કર્મચારીઓની જવાબદારીઓ અને સુરક્ષા વ્યવસ્થાની પણ સમીક્ષા કરવામાં આવી હતી.ઘટનાએ મંદિરોમાં દાનની સુરક્ષા વ્યવસ્થાને વધુ મજબૂત બનાવવાની જરૂરિયાત તરફ ધ્યાન દોર્યું.

વિવાદ બાદ અંબાજી ટ્રસ્ટ દ્વારા નવી વ્યવસ્થા અમલ 
અંબાજી મંદિરમાં દાન ચોરીના વિવાદ બાદ સુરક્ષા વ્યવસ્થા સામે ગંભીર સવાલો ઉભા થયા હતા અને આરાસુરી અંબાજી દેવસ્થાન ટ્રસ્ટ અને બનાસકાંઠા જિલ્લા તંત્ર દ્વારા નવી વ્યવસ્થા અમલમાં મૂકી હતી. હવે દાન ગણતરીના પ્રક્રિયામાં વર્ગ 4 અને તમામ આઉટસોર્સિંગ કર્મચારીઓને સંપૂર્ણપણે દૂર કરાયા છે.ભંડાર કક્ષમાં લગભગ 20 હાઇટેક સીસીટીવી કેમેરા લગાવવામાં આવ્યા છે.દાન ચોરી બાદ તંત્રને જ્ઞાન આવતા દાન ગણતરીના પ્રક્રિયાનું મંદિર પરિસરની એલઇડી સ્ક્રીન પર લાઈવ પ્રસારણ કરાઈ છે. આ ઉપરાંત મંદિરના વહીવટદાર અને મામલતદાર દ્વારા દર અઠવાડિયે રૂબરૂ નિરીક્ષણ, કર્મચારીઓ માટે ફરજિયાત હાજરી રજિસ્ટર, મંજૂરી વગર રાત્રિ રોકાણ પર પ્રતિબંધ સહિત અનેક કડક નિયમો અમલમાં મુકાયા છે.

અંબાજી મંદિરમાં 2023માં પ્રસાદનો પણ વિવાદ થયો હતો
હિન્દુત્વના નામે મત માંગવામાં આવી રહ્યા છે ત્યારે અંબાજી મંદિરમાં 2023માં પ્રસાદનો પણ વિવાદ થયો હતો. અંબાજી મંદિરમાં એપ્રિલ 2023માં પરંપરાગત મોહનથાળનો પ્રસાદ બંધ કરીને ચીક્કી આપવાનો વિવાદ થયો હતો અને આ વિવાદ દસ દિવસથી વધુ સમય ચાલ્યો હતો અને મોહનથાળનો પ્રસાદ બનાવવામાં કાપ મૂકાયો હતો અને દસ દિવસ બાદ સરકારે હસ્તક્ષેપ કર્યો હતો અને મોહનથાળ અને ચીક્કી ચાલુ રાખવાની જાહેરાત કરી હતી.