ભાવનગર ડિસ્ટ્રીક્ટ કો-ઓપરેટિવ બેંકમાં પરિવારવાદ અને વ્યવહાર થયો હોવાનો આક્ષેપ

ભાવનગર ડિસ્ટ્રીક્ટ કો-ઓપરેટીવ બેંકમાં તાજેતરમાં યોજાયેલી તાલીમાર્થી ક્લાર્કની 80 જગ્યાની ભરતી પ્રક્રિયા વિવાદમાં સપડાઈ છે. ભરતી પ્રક્રિયામાં પરિવારવાદ અને વ્યવહાર થયાનો વિદ્યાર્થી નેતા યુવરાજસિંહ જાડેજાએ આક્ષેપ કર્યો છે. ભરતીના નિયમોનું સરેઆમ ઉલ્લંઘન કરી, સિલેબસ જાહેર નહી કરી ભરતી પ્રક્રિયા સંયોગ નહીં પણ સુનિયોજિત ગોઠવણ હોવાનો યુવરાજસિંહે આરોપ લગાવ્યો છે.

ભાવનગર ડિસ્ટ્રીક્ટ કો-ઓપરેટીવ બેંકમાં 80 ક્લાર્કની જગ્યા માટે અમદાવાદ સ્થિત ઓમ મેનેજમેન્ટ એન્ડ એચઆર સોલ્યુશન્સ નામની એજન્સી દ્વારા ભરતી પ્રક્રિયા હાથ ધરી હતી. જેમાં 23 જાન્યુઆરીના રોજ ભરતીની જાહેરાત પ્રસિદ્ધ કરી હતી. 1 જાન્યુઆરી 2025ની સ્થિતિએ 21 થી 30 વર્ષની વયના ઉમેદવારો માટે 50 ટકા સાથે માર્કસ સાથે  ગ્રેજ્યુએટ હોય તેમને અરજી માટે લાયક ગણ્યા હતા.

તેમણે વધુમાં જણાવ્યુ કે, 80 જગ્યા માટે 1200 થી વધુ ઉમેદવારોએ ફોર્મ ભર્યા હતા. તે પૈકી 700 થી 800 ઉમેદવારોએ પરીક્ષા આપી હતી. માત્ર બે દિવસમાં ઉમેદવારોને પરીક્ષા અંગે ઈમેઈલ અને કુરીયરથી જાણ કરવામાં આવી હતી. ભરતીની જાહેરાતમાં કેટલા ગુણનું પેપર હશે તેનો કોઈ ઉલ્લેખ કરાયો નહોતો. પરીક્ષાખંડમાં ચેકિંગ કર્યા વગર માત્ર કોલ લેટરના આધારે બેસવા દેવામાં આવ્યા હતા. પરીક્ષાર્થીઓ માટે લાવવામાં આવેલા પેપરના બંડલને સીલ કરાયુ નહોતું. OMR માં કોઈપણ જગ્યાએ બારકોડ સિસ્ટમ નહી હોવાથી તેમજ પરીક્ષા પૂર્ણ થયા બાદ સંચાલકો દ્વારા OMR અને કોલ લેટર પરત લેવાયા હોવાથી ભરતી પ્રક્રિયા અંગે અનેક સવાલ ઉઠી રહ્યા છે.

ભાવનગર ડિસ્ટ્રીક્ટ બેંકમાં પરિવારવાદ, ઓળખાણવાદ અને વ્યવહારથી ભરતી કરવામાં આવી રહી છે. નિયમોનું સરેઆમ ઉલ્લંઘન કરી ભરતી કરવામાં આવી રહી હોવાથી તપાસ કરવા માંગ કરી છે. બેંકના પૂર્વ અને વર્તમાન સત્તાધીશો તેમજ હોદ્દેદારોના પરિવારજનો અને સગાઓની ગોઠવણ કરવા ભરતીનું નાટક કરાયુ હોવાનો યુવરાજસિંહ જાડેજાએ ગંભીર આક્ષેપ કર્યો છે. અમદાવાદના L.J. કેમ્પસના બ્લોક નંબર-4માં 25 ઉમેદવારની સંખ્યા હોવા છતાં પેપરના બંડલમાં 24 પેપર જ નીકળ્યા હતા. સત્તાધીશોના સગાઓની ગોઠવણ માટે યોજાયેલી ભરતી પ્રક્રિયાની તપાસ કરવા યુવરાજસિંહે માગણી કરી છે.

સહકારી સંસ્થાઓની ભરતી પ્રક્રિયા હંમેશા વિવાદિત

ગુજરાતની સહકારી સંસ્થાઓમાં ભરતી પ્રક્રિયા પહેલેથી જ વિવાદિત રહી છે. મહેસાણા ડિસ્ટ્રીક્ટ કો-ઓપરેટિવ બેંકમાં ત્રણ વર્ષ પહેલાં થયેલી ભરતી મામલે અનેક આક્ષેપો થયા હતા. બેંકના ચેરમેન, ડિરેક્ટરો તેમજ અધિકારીઓના સગાઓની ભરતી કરાઈ હોવાના આક્ષેપ સાથે ગુજરાત હાઈકોર્ટમાં જાહેર હિતની અરજી કરાઈ હતી. ગુજરાત હાઈકોર્ટે જિલ્લા સહકારી રજિસ્ટ્રારને તપાસ કરવા આદેશ આપ્યો હતો. રજિસ્ટ્રારે કુલડીમાં ગોળ ભાંગીને સત્તાધીશો અને અધિકારીઓને બચાવી લીધા હતા. તેવી જ રીતે અમદાવાદ ડિસ્ટ્રીક્ટ બેન્ક, ગુજરાત રાજ્ય સહકારી બેંક, ગુજકોમાસોલ, રાજ્યના માર્કેટયાર્ડ સહિતની સહકારી સંસ્થાઓમાં દર વર્ષે વ્યવહાર કરીને ડિરેક્ટરોના સગાઓની ભરતી થતી આવી છે. તેમ છતાં તેનું મોનિટરિંગ કરતા સહકારી વિભાગના અધિકારીઓ સત્તાધીશો પાસેથી વ્યવહારનો ‘સહકાર’ મેળવી ‘તેરી ભી ચૂપ ઔર મેરી ભી ચૂપ’ સૂત્ર અપનાવી લેતાં હોય છે. ત્યારે સહકારી સંસ્થાઓમાં યોગ્ય રીતે ભરતી કરાય તો ગરીબ અને મધ્યમવર્ગીય પરિવારોના હજારો યુવાનોને રોજગારી મળી શકે તેમ છે.