IPS રવિન્દ્ર પટેલ ફરી વિવાદમાં, પાટણ SP કાર્યકાળ દરમિયાન હાઈકોર્ટે લગાવી હતી ફટકાર

IPS રવિન્દ્ર પટેલનું પાટણ સાથેનું કનેક્શન તેમના અગાઉના પાટણ જિલ્લા પોલીસ વડા (SP) તરીકેના કાર્યકાળને કારણે છે. પાટણમાં SP તરીકે ફરજ બજાવતા સમયે, એક વેપારીને માર મારવાના આરોપસર તેમના વિરુદ્ધ કેસ નોંધાયો હતો, જે બાદમાં હાઈકોર્ટ સુધી પહોંચ્યા હતા.

વ્યાપારીને માર મારવાનો કેસ...

તમને જણાવી દઈએ કે, પાટણમાં એક વેપારીને ગોંધી રાખીને માર મારવાના આરોપસર રવિન્દ્ર પટેલ સામે કેસ નોંધાયો હતો. આ મામલે હાઈકોર્ટે તપાસની ગતિ ધીમી હોવાના કારણે તપાસ ઝડપથી પૂર્ણ કરવા આદેશ આપ્યો હતો. ​આ સિવાય એક મહિલા સામાજિક કાર્યકર અને તેમના સાથીને માનસિક ત્રાસ અને શારીરિક હિંસા પહોંચાડવાના આરોપસર પણ રવિન્દ્ર પટેલ સામે કેસ નોંધાયો હતો. આ મામલે હાઈકોર્ટે પાટણના ચીફ જ્યુડિશિયલ મેજિસ્ટ્રેટને તપાસ ઝડપથી પૂર્ણ કરવા આદેશ આપ્યો હતો. ​

તપાસમાં વિલંબ અને હાઈકોર્ટની ટિપ્પણીઓ...

આ કેસોમાં તપાસના પુરાવા ચંદીગઢ અને પૂણેની ફોરેન્સિક લેબોરેટરીઝ વચ્ચે લટકતા હોવાથી, હાઈકોર્ટે તટસ્થ અને ઝડપી તપાસના નિર્દેશ આપ્યા હતા. આ તમામ મામલાઓમાં, હાઈકોર્ટે તપાસની ગતિ અને પારદર્શકતા અંગે ગંભીરતા દાખવી હતી અને સંબંધિત અધિકારીઓને યોગ્ય કાર્યવાહી કરવા આદેશ આપ્યો હતો.

IPS અધિકારી રવીન્દ્ર પટેલના વતનમાં સેબીના દરોડા...

મહત્વનું છે કે, તાજેતરમાં SEBI (સિક્યુરિટીઝ એન્ડ એક્સચેન્જ બોર્ડ ઓફ ઇન્ડિયા) દ્વારા IPS રવિન્દ્ર પટેલના સાબરકાંઠા જિલ્લાના ખેડબ્રહ્મા તાલુકાના રોધરા ગામ સ્થિત નિવાસસ્થાને દરોડા પાડવામાં આવ્યા હતા. આ દરોડા દરમિયાન તેમના સાળા સહિત પરિવારજનોની પણ પૂછપરછ કરવામાં આવી હતી. SEBIની આ કાર્યવાહી શેરબજારમાં કથિત કૌભાંડ અને નાણાકીય હેરાફેરીને લઈને કરવામાં આવી છે.

IPS રવિન્દ્ર પટેલના સાળાની પણ પૂછપરછ...

IPS રવિન્દ્ર પટેલના પિતા IG કક્ષાના નિવૃત IPS અધિકારી છે. ગલોડીયા ગામે રહેતા IPSના સાળાની પણ પૂછપરછ હાથ ધરવામાં આવી છે. ગુજરાત હાઉસિંગ બોર્ડમાં SP તરીકે IPS રવિન્દ્ર પટેલ ફરજ બજાવે છે. SEBIની તપાસમાં વધુ ખુલાસાઓ સામે આવી તેવી શક્યતાઓ છે. IPSના ઘરે કેન્દ્રિય ટીમોની તપાસથી પોલીસ બેડામાં ખળભળાટ થયો છે.