Ahmedabad News: દિલ્હીના જંતર-મંતર ખાતે સામાજિક કાર્યકર્તા સોનમ વાંગચૂકના સમર્થનમાં ચાલી રહેલા આંદોલન અને NEET પેપર લીક વિવાદના ઘેરા પ્રત્યાઘાતો હવે મેગા સિટી અમદાવાદમાં પણ જોવા મળ્યા છે. દિલ્હીમાં NEET પેપર લીક મુદ્દે કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગ સાથે લાંબા સમયથી વિરોધ પ્રદર્શન ચાલી રહ્યું છે, જ્યાં આ મુદ્દે સોનમ વાંગચૂક ઉપવાસ પર પણ બેઠા હતા. દિલ્હીમાં લાંબા સમયના વિરોધ છતાં હજી સુધી શિક્ષણમંત્રીનું રાજીનામું ન લેવાતા તેના આક્રોશ સ્વરૂપે અમદાવાદમાં પણ યુથ કોંગ્રેસ અને નાગરિકો દ્વારા વિરોધ પ્રદર્શનોનું આયોજન કરવામાં આવ્યું હતું.
પરવાનગી વગરના પ્રદર્શન પર પોલીસની કાર્યવાહી સોનમ વાંગચૂક દ્વારા આપવામાં આવેલા 'ચલો સંસદ'ના આહ્વાનના સમર્થનમાં અમદાવાદના કાર્યકર્તાઓ રસ્તા પર ઉતરી આવ્યા હતા. યુથ કોંગ્રેસ દ્વારા શહેરના 4 જેટલા સ્થળો પર વિરોધ પ્રદર્શન કરવાની જાહેરાત કરાઈ હતી અને 20 જુલાઈની વહેલી સવારે લો-ગાર્ડન પાસે આવેલી હેપ્પી સ્ટ્રીટ ખાતે મંજૂરી માંગવામાં આવી હતી. જોકે, પોલીસ તંત્ર દ્વારા તેની પરવાનગી આપવામાં આવી ન હતી. તેમ છતાં મોટી સંખ્યામાં લોકો એકઠા થવાના હોવાથી પોલીસ અગાઉથી જ હાઈ એલર્ટ પર હતી અને હેપ્પી સ્ટ્રીટ પર ચુસ્ત બંદોબસ્ત ગોઠવી દેવામાં આવ્યો હતો.
'ભાજપ હાય હાય' અને રાજીનામાની માંગ સાથે સૂત્રોચ્ચાર પરવાનગી ન હોવા છતાં કેટલાક યુવાનો બાબા સાહેબ આંબેડકરનું પુસ્તક અને બેનરો સાથે હેપ્પી સ્ટ્રીટ પહોંચી ગયા હતા. પ્રદર્શનકારીઓએ હાથમાં પ્લેકાર્ડ્સ અને બેનરો સાથે 'ભાજપ હાય હાય' તથા 'ધર્મેન્દ્ર પ્રધાન રાજીનામું આપે' જેવા તીવ્ર સૂત્રોચ્ચાર કરીને સરકાર સામે પોતાનો રોષ ઠાલવ્યો હતો. આ વિરોધ પ્રદર્શનને પગલે સ્થળ પર ACP અને DCP કક્ષાના ઉચ્ચ અધિકારીઓ સહિતનો મોટો પોલીસ કાફલો તૈનાત કરી દેવામાં આવ્યો હતો અને કાયદો તથા વ્યવસ્થા જાળવવા માટે સખત પગલાં લેવામાં આવ્યા હતા.
મહિલાઓની ટીંગાટોળી અને દોડધામ પોલીસને જોઈને પ્રદર્શનકારી યુવાનો ભાગવા લાગ્યા હતા, જેથી પોલીસે તેમની પાછળ દોડી-દોડીને શોધખોળ કરી અટકાયત કરી હતી. આ દરમિયાન રસ્તા વચ્ચે બેસીને નારા લગાવતી મહિલા પ્રદર્શનકારીઓની મહિલા પોલીસ કર્મચારીઓ દ્વારા ટીંગાટોળી કરીને પોલીસ વાહનોમાં અટકાયત કરવામાં આવી હતી. આ કાર્યવાહી દરમિયાન પોલીસ અને પ્રદર્શનકારીઓ વચ્ચે ભારે ઝપાઝપી અને દોડધામના દ્રશ્યો સર્જાયા હતા. પોલીસે અટકાયત કરાયેલા તમામ લોકોને અલગ-અલગ પોલીસ સ્ટેશન ખાતે ખસેડ્યા હતા.
પૂર્વ અને પશ્ચિમ બંને વિસ્તારોમાં વિરોધનું આયોજન માત્ર લો-ગાર્ડન જ નહીં, પરંતુ સોનમ વાંગચૂકના સમર્થનમાં અમદાવાદના પૂર્વ અને પશ્ચિમ બંને વિસ્તારોમાં વિરોધ પ્રદર્શનો યોજાયા હતા. શહેરના સારંગપુર, ઓઢવ, નિકોલ અને એલિસબ્રિજ જેવા મુખ્ય વિસ્તારોમાં પણ સમર્થકો દ્વારા પ્રદર્શનનું આયોજન કરવામાં આવ્યું હતું. આ ઉપરાંત, સાંજે 6 વાગ્યે M.J. લાયબ્રેરીની બહાર પણ દેખાવો કરવાનું આયોજન કરાયું હતું, જેના માટે દેખાવકારોના આગેવાનો દ્વારા એલિસબ્રિજ પોલીસ સ્ટેશનમાં મંજૂરી માટે અરજી આપવામાં આવી હતી. સમગ્ર ઘટનાને પગલે લો-ગાર્ડન અને આસપાસના વિસ્તારોમાં શાંતિ જળવાઈ રહે તે માટે ચાંપતો પોલીસ બંદોબસ્ત યથાવત રાખવામાં આવ્યો છે.

સોનમ વાંગચૂકના સમર્થનમાં વિરોધ, લો-ગાર્ડન ખાતે પોલીસ અને પ્રદર્શનકારીઓ વચ્ચે ઘર્ષણ

July 20, 2026 | 13:06 IST