અમદાવાદ મ્યુનિસિપલ કમિશનરે સ્ટેન્ડિંગ કમિટી સમક્ષ રજૂ કર્યુ ડ્રાફ્ટ બજેટ

સુરેશ વણોલ, અમદાવાદ

અમદાવાદ મ્યુનિસિપલ કૉર્પોરેશન(AMC) વતી કમિશનર એમ.થેન્નારસને વર્ષ 2025-26નું રૂપિયા 14,001 કરોડનું અંદાજપત્ર સ્ટેન્ડિંગ કમિટી સમક્ષ રજૂ કર્યું હતું. ઓલિમ્પિક-2036 ને ધ્યાનમાં રાખી અમદાવાદ શહેરમાં સ્પોર્ટસ પ્રવૃત્તિને વેગ આપવા દરેક ઝોનમાં સ્પોર્ટસ ઈન્ફ્રાસ્ટ્રકચર વિકસાવવાની જોગવાઈ બજેટમાં કરવામાં આવી છે. વર્ષ 2023-24માં એએમસીએ 10,801 કરોડ રૂપિયાનું બજેટ રજૂ કર્યુ હતુ. આ વર્ષના બજેટમાં નરેન્દ્ર મોદી સ્ટેડિયમ, સરદાર વલ્લભભાઈ પટેલ સ્ટેડિયમ તેમજ નારણપુરા સ્પોર્ટસ કોમ્પલેક્ષ આસપાસના રોડને સ્પોર્ટસ થીમ આધારીત ડેવલપ કરવાની જોગવાઈ કરવામાં આવી છે. જ્યારે નેટ ઝીરો અંતર્ગત રિસાયકલ મટીરીયલ, રીન્યુએબલ મટીરીયલ, લોકલ સોર્સ મટીરીયલ, પરમીટેબલ પેવમેન્ટ, એનર્જી એફિશિયન્ટ કન્સ્ટ્રક્શન મશીનરીનો ઉપયોગ કરી રોડ નિર્માણ કરવાની જોગવાઈ કરાઈ છે.

AMTSમાં નવી 120 બસ ઉમેરવાની પણ બજેટમાં જોગવાઈ કરાઈ છે. આર.ટી.ઓ. ખાતે મલ્ટીમોડલ ટ્રાન્સપોર્ટ હબ વિકસાવાશે. આ ઉપરાંત ઘુમા ખાતેના પ્લોટમાં ઈન્ટીગ્રેટેડ મોડલનું ટર્મિનસ બનાવવાનું તેમજ ડેઇલી ટીકીટ પાસ મોબાઇલ એપ દ્વારા કરવાનું આયોજન કરવામાં આવ્યું છે. બજેટમાં મિલકત વેરા સિવાય એકપણ વેરામાં વધારો સૂચવાયો નથી. સસ્ટેનેબલ અને ક્લાઈમેટ ચેન્જ થીમ પર રજૂ કરેલા બજેટમાં અમદાવાદ શહેરની ટ્રાફિક સમસ્યા ઘટાડવા પર ફોકસ કરાયું છે. 2036 ઓલિમ્પિકની દાવેદારીને ધ્યાનમાં રાખી અલગ અલગ વિસ્તારોમાં 15 સ્પોર્ટ્સ ગ્રાઉન્ડ, સ્પોર્ટસ કોમ્પ્લેક્સ બનાવાશે. મહિલાઓ માટે દરેક ઝોનમાં જિમ અને સ્વિમિંગ પૂલ બનાવવાનું આયોજન છે.

વોટર ટેક્સ તથા કન્વર્ઝન્સી ટેક્સના દરમાં કોઇ વધારો કરાયો નથી. વર્ષ 2023-24ના બજેટમાં દર વર્ષે બે ટકા ટેક્સના વધારાની જોગવાઈ કરવામાં આવી હતી. વર્ષ 2025-26 માટે રહેણાંક મિલકતનો પ્રતિ ચોરસ મીટર રૂપિયા 20.80 અને બિનરહેઠાણ મિલકતો માટે રૂપિયા 35.36 ટેક્સનો દર રહેશે. 140 કરોડના ખર્ચે નારોલથી નરોડાના રોડને આઇકોનિક રોડ બનાવાશે. 36 જેટલા મહત્ત્વના રોડ અલગ અલગ થીમ આધારિત 331 કરોડના ખર્ચે વિકસાવવામાં આવશે. 72.55 કિમીના રોડમાં મેટ્રો સ્ટેશનને જોડતા, બિઝનેસ, કલ્ચર, હેરિટેજ, સ્પોર્ટ્સ, એજ્યુકેશન અને હેલ્થ થીમ પર રોડ વિકસાવવામાં આવશે. 185 કરોડના ખર્ચે 20 કિમી ઇન્ટ્રિગ્રેટેડ કોમર્શિયલ સ્ટ્રીટ પણ વિકસાવવામાં આવશે. 

બજેટમાં 6,200 કરોડની રેવન્યૂ અને 7,801 કરોડનો કેપિટલ ખર્ચ થશે. 2,800 કરોડ વિકાસ કાર્યો પાછળ ખર્ચવામાં આવશે. કમિશનર દ્વારા સૂચવવામાં આવેલા બજેટમાં 9 હજાર કરોડ રૂપિયાની રેવન્યુ આવક દર્શાવવામાં આવી છે. જેમાં ટેક્સની આવક 1,759 કરોડ થવાનો અંદાજ છે. ઝોનલ દીઠ કામ માટે કુલ 1 હજાર કરોડની ફાળવણી કરવામાં આવી છે. શહેરમાં 550 કિમીના નવા રોડ-રસ્તા તેમજ રિસર્ફેસ પાછળ 1,200 કરોડ ફાળવવામાં આવ્યા છે.

ઓલિમ્પિક 2036ને ધ્યાનમાં લઈ અમદાવાદ શહેરમાં સ્પોર્ટ્સ પ્રવૃત્તિને વેગ આપવા માટે મ્યુનિસિપલ કોર્પોરેશન દ્વારા બજેટમાં દરેક ઝોનમાં વિવિધ જગ્યાએ સ્પોર્ટ્સના ઈન્ફાસ્ટ્રકચર બનાવવામાં આવશે, 15 પ્લે ગ્રાઉન્ડ, 8 સ્પોર્ટ્સ કોમ્પ્લેક્સ અને ઓપન એથ્લેટિક ટ્રેક સાથે ઓપન સ્પોર્ટ્સ કોમ્પ્લેક્સ બનશે. પ્લે ગ્રાઉન્ડમાં મેદાનની ફરતે કમ્પાઉન્ડ વોલ સાથે વોકિંગ ટ્રેક તેમજ વચ્ચેના ભાગમાં કબડ્ડી, ખો-ખો, વોલીબોલ, બાસ્કેટબોલ તેમજ એથ્લેટિક વગેરે જેવી વિવિધ રમતો રમવાની વ્યવસ્થા તેમજ ચેન્જિંગ રૂમ, ટોઇલેટ બ્લોક, પીવાના પાણીની વ્યવસ્થા વગેરે યુટિલિટીનો સમાવેશ કરવામાં આવ્યો છે. 

સ્પોર્ટ્સ કોમ્પ્લેક્સમાં એથ્લેટિક ટ્રેક, મલ્ટીપર્પસ કોર્ટ, સ્વિમિંગ પૂલ, જિમ્નેશિયમ, વોલીબોલ, બાસ્કેટબોલ, ઈન્ડોર ગેમ્સ વગેરે જેવી વિવિધ રમતો રમી શકાય એની વ્યવસ્થાની સાથે રિસેપ્શન, એડમિન ઓફિસ, ઈન્સ્ટ્રક્ટર રૂમ, મેડિકલ રૂમ, કાફેટેરિયા તેમજ ચેન્જિંગ રૂમ, શાવર રૂમ, ટોઈલેટ બ્લોક, પીવાના પાણીની વ્યવસ્થા વગેરે યુટિલિટીનો સમાવેશ કરવામાં આવ્યો છે. હાલમાં એક જગ્યાએ સ્પોર્ટસ કોમ્પ્લેક્સ બનાવવાની કામગીરી ચાલુ છે. શહેરમાં 8 જગ્યાએ સ્પોર્ટસ કોમ્પ્લેક્સ બનાવાશે.

ઓપન સ્પોર્ટ્સ કોમ્પ્લેક્સ ઓપન એથ્લેટિક ટ્રેક સાથે બનાવવામાં આવશે. જેમાં ઓપન સ્પોર્ટ્સને લગતી વિવિધ રમતો, જેવી કે દોડ, લાંબી કૂદ, ઊંચી કૂદ, ગોળાફેંક, બરછીફેંક, ચક્રફેંક, એથ્લેટિક ટ્રેક, ફૂટબોલ, વોલીબોલ, બાસ્કેટબોલ, ટેનિસ કોર્ટ, કબડ્ડી ખુલ્લા મેદાનમાં રમાઇ શકે એવી રમતોનો સમાવેશ કરવામાં આવ્યો છે. જેમાં રમતવીરો પ્રેક્ટિસ કરી શકશે તેમજ શાળાઓ અને કોલેજના રમત ગમતના પ્રોગ્રામ પણ થઇ શકશે.