Heavy Rainfall In Ahmedabad: રાજ્યના હવામાન વિભાગ દ્વારા વ્યક્ત કરવામાં આવેલી ભારેથી અતિ ભારે વરસાદની આગાહી વચ્ચે ગુજરાતના પાટનગર સમાન અમદાવાદ શહેરમાં મેઘરાજાએ સવારથી જ રૌદ્ર સ્વરૂપ ધારણ કર્યું છે. આજે 24 જુલાઈના રોજ વહેલી સવારે 5 વાગ્યાથી જ સમગ્ર શહેરમાં ધોધમાર વરસાદ શરૂ થઈ ગયો હતો. સતત વરસેલા મુશળધાર વરસાદને કારણે શહેરના પશ્ચિમ અને પૂર્વ વિસ્તારો જળમગ્ન બન્યા છે. શહેરના એસજી હાઇવે, ગોતા, જગતપુર, એસપી રિંગ રોડ, ન્યુ રાણીપ, ચાંદખેડા અને ત્રાગડ સહિતના લગભગ તમામ વિસ્તારો પાણીમાં ગરકાવ થઈ ગયા છે. માર્ગો પર દરિયા જેવા દ્રશ્યો સર્જાતાં ત્રાગડ રોડ, IOC રોડ, D-કેબીન રોડ અને ચેનપુર રોડ પર વાહનવ્યવહાર સંપૂર્ણપણે ખોરવાઈ ગયો છે.
સવારે 3 કલાકમાં શાહીબાગ અને અસારવામાં 2 ઇંચ વરસાદ અમદાવાદ શહેરમાં સવારે 6 વાગ્યાથી 9 વાગ્યા સુધીના માત્ર 3 કલાકના સમયગાળામાં સરેરાશ 1 ઇંચ જેટલો વરસાદ ખાબક્યો હતો, જેમાં સૌથી વધુ વરસાદનો મારો શાહીબાગ અને અસારવા વિસ્તારમાં પડ્યો હતો જ્યાં 3 કલાકમાં 2 ઇંચ વરસાદ નોંધાયો છે. ભારે વરસાદના કારણે રસ્તાઓ ધોવાઈ જતાં નેહરૂનગર નજીક આવેલા પાંજરાપોળ ચાર રસ્તા પર સહજાનંદ કોલેજ રોડ પર BRTS ટ્રેકની બાજુમાં જ એક વિશાળ ભૂવો પડી ગયો છે. સુરક્ષાના ભાગરૂપે મ્યુનિસિપલ કોર્પોરેશન (AMC) દ્વારા સમગ્ર વિસ્તારમાં બેરીકેટીંગ કરી દેવામાં આવ્યું છે. આ ઉપરાંત, હેલ્મેટ સર્કલ ચાર રસ્તા પાસે કમરસમા પાણી ભરાઈ જતાં AMC તંત્ર દ્વારા નાગરિકોને તે તરફ ન જવા અને વૈકલ્પિક રસ્તાઓનો ઉપયોગ કરવા માટે ખાસ અપીલ કરવામાં આવી છે.
શહેરના 8 મુખ્ય અંડરબ્રિજ બંધ કરવામાં આવ્યા ભારે વરસાદને કારણે પાણીનો નિકાલ ન થઈ શકતાં શહેરના નીચાણવાળા વિસ્તારોને જોડતા અંડરબ્રિજો જળમગ્ન બન્યા હતા. ગઈકાલે મોડી રાતથી જ ભરાયેલા પાણીના કારણે તંત્ર દ્વારા કુલ 17 અંડરબ્રિજ બંધ કરી દેવાયા હતા. જોકે, AMC ની ટીમો દ્વારા કલેક્શન કરી રાત્રિ દરમિયાન પાણીનો નિકાલ કરાતાં 9 અંડરબ્રિજ ખોલી શકાયા હતા, પરંતુ હજુ પણ સ્થિતિ ગંભીર હોવાથી 8 અંડરબ્રિજ વાહનવ્યવહાર માટે સંપૂર્ણપણે બંધ રાખવામાં આવ્યા છે.
બંધ કરવામાં આવેલા અંડરબ્રિજની યાદી મકરબા અંડરબ્રિજ પરિમલ અંડરબ્રિજ અખબાર નગર અંડરબ્રિજ મણીનગર દક્ષિણી અંડરબ્રિજ કાળીગામ અંડરબ્રિજ ચાંદલોડિયા અંડરબ્રિજ રાણીપ GST અંડરબ્રિજ ચાંદખેડા અંડરબ્રિજ
સોસાયટીઓ અને ઘરોમાં પાણી ઘૂસ્યા શહેરના અનેક રહેણાંક વિસ્તારોમાં વરસાદી પાણી ઘૂસી જતાં સ્થાનિક રહીશોની હાલત અત્યંત કફોડી બની છે. ચાંદખેડાના IOC રોડ પર આવેલા ડમરુ સર્કલ પાસે ભારે પાણી ભરાતાં 'શિવમ રો હાઉસ' નામની સોસાયટીના ઘરોમાં પાણી ફરી વળ્યા હતા. બીજી તરફ વેજલપુરના શ્રીનંદનગર વિસ્તારમાં પરિસ્થિતિ વણસી છે, જ્યાં 100 જેટલા ઘરોમાં કમરસમા પાણી ભરાઈ જતાં લોકો ઘરવખરીનો સામાન બચાવવા માટે પાણીમાંથી પસાર થવા મજબૂર બન્યા છે. વેજલપુરમાં લોકો ઘૂંટણસમા પાણીમાંથી પસાર થઈને ઓફિસે જતા જોવા મળ્યા હતા. શેલા વિસ્તારમાં આવેલી 'આકાશ રેસિડેન્સી' ના બેઝમેન્ટ પાર્કિંગમાં પાણી ભરાઈ જતાં તમામ ટુ-વ્હીલર અને ફોર-વ્હીલર ગાડીઓ સંપૂર્ણપણે પાણીમાં ડૂબી ગઈ છે.
નિકોલ, વટવા અને મણીનગરમાં જનજીવન અસ્તવ્યસ્ત પૂર્વ અમદાવાદના નિકોલમાં આવેલા સંગાથ ચાર રસ્તા બેટમાં ફેરવાઈ ગયા છે. છેલ્લા 5 વર્ષથી સતત થતી આ સમસ્યાથી કંટાળીને સ્થાનિકોમાં ભારે રોષ જોવા મળ્યો છે. અહીં છેલ્લા 24 કલાકથી પાણી ભરાયેલા હોવાથી સ્થાનિક રહીશો ત્રાહિમામ પુકારી ઉઠ્યા છે. આ ઉપરાંત, નિકોલની 'મધુમાલતી આવાસ યોજના' આખી પાણીમાં ગરકાવ થઈ ગઈ છે, જેના કારણે 1000 થી વધુ લોકોને ભારે હાલાકી ભોગવવી પડી રહી છે. વટવામાં સદભાવના પોલીસ ચોકીથી વટવા પોલીસ સ્ટેશન તરફના રસ્તે મોટાં ખાડા પડી ગયા છે. સ્થાનિક લોકો બેરીકેટ, ખુરશીઓ અને ઝાડની ડાળખીઓ મૂકીને વાહનચાલકોને અકસ્માતથી બચાવવા મદદ કરી રહ્યા છે. દાણીલીમડાના પીર કમાલ મસ્જિદ રોડ અને મણીનગરના ભૈરવનાથ ચાર રસ્તા પર પણ વ્યાપક પાણી ભરાયા છે.
ખોખરામાં 55 મુસાફરો ભરેલી બસ ફસાઈ વરસાદી પાણી ભરાવાના કારણે ખોખરાના જાડેજા કોર્નર પાસે એક સિટી બસ પાણીમાં ફસાઈ ગઈ હતી. બસમાં પાણી ઘૂસી જવાની ભીતિ વચ્ચે મણીનગર ફાયર સ્ટેશનની ટીમે ત્વરિત કામગીરી હાથ ધરીને બસમાં સવાર તમામ 55 મુસાફરોને સહીસલામત રીતે બહાર કાઢી મોટું સંકટ ટાળ્યું હતું. આ ઉપરાંત, આઇકોનિક ગણાતા ઇન્દિરા બ્રિજથી એરપોર્ટ રોડ પર તેમજ શાંતિપુરા સર્કલથી બોપલ તરફ જવાના SP રિંગ રોડ પર પાણી ભરાઈ જતાં રસ્તાઓ બંધ કરવાની ફરજ પડી છે. AMC તંત્ર દ્વારા એરપોર્ટ રોડ પર ગટરના ઢાંકણા ખોલીને પાણી નિકાલની પ્રક્રિયા ઝડપી કરવામાં આવી રહી છે.
રેલવે વ્યવહારને માઠી અસર: મુંબઈ-અમદાવાદ રૂટની 5 ટ્રેનો રદ અમદાવાદ અને આસપાસના વિસ્તારોમાં પડેલા ભારે વરસાદ તથા રેલવે ટ્રેક પર પાણી ભરાવાની સ્થિતિને ધ્યાનમાં રાખીને પશ્ચિમ રેલવે દ્વારા આજે 24 જુલાઈના રોજ અમદાવાદથી ઉપડતી અને આવતી 5 પ્રમુખ ટ્રેનોને રદ કરવાની જાહેરાત કરવામાં આવી છે.
રદ કરાયેલી ટ્રેનોની યાદી ટ્રેન નંબર 12901: દાદર - અમદાવાદ ગુજરાત મેઇલ ટ્રેન નંબર 12934/33: અમદાવાદ - મુંબઈ સેન્ટ્રલ - અમદાવાદ કર્ણાવતી એક્સપ્રેસ ટ્રેન નંબર 12932/31: અમદાવાદ - મુંબઈ સેન્ટ્રલ - અમદાવાદ ડબલ ડેકર ટ્રેન નંબર 22962/61: અમદાવાદ - મુંબઈ સેન્ટ્રલ - અમદાવાદ વંદે ભારત એક્સપ્રેસ ટ્રેન નંબર 82902/901: અમદાવાદ - મુંબઈ સેન્ટ્રલ - અમદાવાદ તેજસ એક્સપ્રેસ
વરસાદનું જોર જળવાઈ રહેવાની શક્યતા હવામાન વિભાગની આગાહી મુજબ હજુ પણ આગામી કલાકોમાં અમદાવાદ અને આસપાસના જિલ્લાઓમાં વરસાદનું જોર જળવાઈ રહેવાની શક્યતા હોવાથી વહીવટી તંત્ર દ્વારા લોકોને જરૂર વગર ઘરની બહાર ન નીકળવા અપીલ કરવામાં આવી છે.

વહેલી સવારે 5 વાગ્યાથી ધોધમાર વરસાદથી જળબંબાકાર, 8 અંડરબ્રિજ બંધ, ઘરોમાં પાણી ઘૂસ્યા

July 24, 2026 | 10:55 IST