હેલ્મેટ અને લાયસન્સ વગર શાળામાં એન્ટ્રી નહીં!

Ahmedabad DEO School Road Safety : અમદાવાદ જિલ્લામાં માર્ગ અકસ્માતોમાં વિદ્યાર્થીઓના વધતા બનાવો અને ટ્રાફિક નિયમોના ઉલ્લંઘનને ધ્યાનમાં રાખીને જિલ્લા શિક્ષણ અધિકારી (DEO) દ્વારા મહત્વપૂર્ણ નિર્ણય લેવામાં આવ્યો છે. નવા આદેશ મુજબ હવે લાયસન્સ વગર અથવા હેલ્મેટ વગર દ્વિચક્રી વાહન ચલાવીને શાળામાં આવતા વિદ્યાર્થીઓને 'નો-એન્ટ્રી' આપવામાં આવશે. આ નિર્ણયનો મુખ્ય હેતુ વિદ્યાર્થીઓમાં ટ્રાફિક નિયમો પ્રત્યે જાગૃતિ લાવવાનો અને માર્ગ અકસ્માતોને ઘટાડવાનો છે.આ આદેશ બાદ શહેરની સરકારી, ગ્રાન્ટેડ તેમજ ખાનગી શાળાઓને પણ જરૂરી સૂચનાઓ આપવામાં આવી છે. શાળા સંચાલકોને વિદ્યાર્થીઓની સુરક્ષા માટે ખાસ ધ્યાન રાખવા તેમજ નિયમોનું પાલન કરાવવા કહેવામાં આવ્યું છે.

લાઇસન્સ વગર વાહનને સ્કૂલ પરિસરમાં પ્રવેશ આપવો નહીં
લાઇસન્સ વગર ટુ-વ્હીલર કે ફોર-વ્હીલર લઈને આવતા કોઈપણ વિદ્યાર્થીને સ્કૂલ પરિસરમાં પ્રવેશ આપવા પર સંપૂર્ણ મનાઈ ફરમાવવામાં આવી છે. આગામી એક અઠવાડિયામાં તમામ સ્કૂલઓએ રોડ સેફ્ટી અને ટ્રાફિકના નિયમો અંગે વિદ્યાર્થીઓ તથા વાલીઓને માહિતગાર કરવા જાગૃતિ કાર્યક્રમો યોજવાના રહેશે. સ્કૂલઓને રોડ સેફ્ટીના નિષ્ણાતો અને RTO અધિકારીઓને આમંત્રિત કરી વિદ્યાર્થીઓને માર્ગદર્શન આપવા તેમજ દંડનીય જોગવાઈઓથી વાકેફ કરવા સૂચના અપાઈ છે.

કેમ લેવાયો આ નિર્ણય?
છેલ્લા કેટલાક વર્ષોમાં અમદાવાદ સહિત ગુજરાતના વિવિધ શહેરોમાં સગીર વયના વિદ્યાર્થીઓ દ્વારા લાયસન્સ વગર વાહન ચલાવવાના બનાવોમાં વધારો નોંધાયો છે. અનેક વખત હેલ્મેટ વિના બાઇક ચલાવવાના કારણે ગંભીર અકસ્માતો પણ થયા છે.ટ્રાફિક પોલીસના અભિયાન દરમિયાન પણ મોટી સંખ્યામાં વિદ્યાર્થીઓ નિયમોનું ઉલ્લંઘન કરતા ઝડપાયા હતા. આ પરિસ્થિતિને ધ્યાનમાં રાખીને શિક્ષણ વિભાગે શાળા સ્તરે જ કડક પગલાં ભરવાનો નિર્ણય કર્યો છે.

તમામ શાળાઓને નિયમોનું  પાલન કરાવવાનો આદેશ
વર્તમાન સમયમાં ઘણા વિદ્યાર્થીઓ કાયદાકીય વયમર્યાદા પૂરી કર્યા વગર અથવા તો ડ્રાઇવિંગ લાયસન્સ વગર જ બેફામ રીતે વાહનો હંકારીને શાળાઓમાં પહોંચતા હોય છે, જે તેમના પોતાના તેમજ અન્ય નાગરિકોના જીવન માટે મોટું જોખમ સાબિત થાય છે.આ ગંભીર સમસ્યાને ડામવા માટે DEO દ્વારા આગામી સમયમાં આરટીઓ (RTO) અને ટ્રાફિક વિભાગના અધિકારીઓને સાથે રાખીને શાળાઓમાં અચાનક સરપ્રાઈઝ ચેકિંગ હાથ ધરવામાં આવશે. આ તપાસ દરમિયાન જો કોઈ વિદ્યાર્થી ગેરકાયદેસર રીતે વાહન ચલાવતો પકડાશે તો માત્ર વિદ્યાર્થી જ નહીં, પરંતુ તે શાળા સામે પણ કાયદેસરની કાર્યવાહી કરવામાં આવશે.

સ્કૂલ સંચાલકોની બેદરકારી સામે કડક કાર્યવાહી કરાશે
અમદાવાદ શહેર જિલ્લા શિક્ષણાધિકારી રોહિત ચૌધરીના જણાવ્યા મુજબ, વાલીઓ દ્વારા સગીર વયના બાળકોને વાહનો આપવું કાયદા વિરુદ્ધ છે અને તેનાથી મોટી દુર્ઘટનાઓ સર્જાય છે. DEO કચેરી દ્વારા RTO અને ટ્રાફિક પોલીસને સાથે રાખીને સ્કૂલઓમાં સરપ્રાઈઝ ચેકિંગ કરવામાં આવશે. જો ચેકિંગ દરમિયાન કોઈ વિદ્યાર્થી લાઇસન્સ વગર વાહન સાથે મળી આવશે અથવા સ્કૂલ સંચાલકો દ્વારા બેદરકારી દાખવવામાં આવી હોવાનું જણાશે, તો સંબંધિત સ્કૂલ સામે પણ કડક કાર્યવાહી કરવામાં આવશે.

વાલીઓની ભૂમિકા સૌથી મહત્વપૂર્ણ
નિષ્ણાતોનું માનવું છે કે આ નિયમ સફળ બનાવવા માટે વાલીઓની ભૂમિકા સૌથી વધુ મહત્વની રહેશે.ઘણા કિસ્સાઓમાં સગીર બાળકોને માતા-પિતા પોતે જ બાઇક ચલાવવા આપે છે. કાયદા મુજબ 18 વર્ષથી ઓછી ઉંમરના બાળક પાસે માન્ય ડ્રાઇવિંગ લાયસન્સ હોઈ શકતું નથી.આથી વાલીઓએ બાળકોને વાહન ન આપવું જોઈએ અને જો તેઓ શાળાએ દ્વિચક્રી વાહનથી જાય તો હેલ્મેટ પહેરવાની ફરજિયાત ખાતરી કરવી જોઈએ.

વિદ્યાર્થીઓની સુરક્ષા સર્વોપરી
આ ઉપરાંત, તમામ શાળાઓને આગામી 7 દિવસની અંદર વિશેષ 'રોડ સેફટી અવેરનેસ' (માર્ગ સલામતી જાગૃતિ) કાર્યક્રમો યોજવા માટે આદેશ કરવામાં આવ્યો છે.આ કાર્યક્રમો દ્વારા વિદ્યાર્થીઓ અને વાલીઓમાં ટ્રાફિકના નિયમો પ્રત્યે જાગૃતિ ફેલાવવામાં આવશે જેથી અકસ્માતોની સંભાવના ઘટાડી શકાય.જો શાળાઓ આ મામલે નિષ્ક્રિય રહેશે કે બેદરકારી દાખવશે તો તેમની સામે પણ વહીવટી પગલાં લેવામાં આવશે. તંત્રના આ કડક રૂખથી વાલીઓ અને શાળાઓમાં પણ દોડધામ મચી ગઈ છે અને વિદ્યાર્થીઓની સુરક્ષા સુનિશ્ચિત કરવા માટે આ પગલું અત્યંત આવશ્યક માનવામાં આવી રહ્યું છે.