અમદાવાદના કોટ વિસ્તારમાં જૂથ અથડામણથી અફરાતફરી

Ahmedabad Dariyapur Clash Stone: અમદાવાદના દરિયાપુર વિસ્તારમાં રથયાત્રા પૂર્વે કાયદો અને વ્યવસ્થાની સ્થિતિ વચ્ચે એક ચિંતાજનક ઘટના સામે આવી છે.દરિયાપુરના નાના અલીની પોલ વિસ્તારમાં એક જ કોમના બે જૂથ વચ્ચે સામાન્ય બાબતે શરૂ થયેલો વિવાદ થોડા જ સમયમાં ઉગ્ર બની મારામારી અને પથ્થરમારા સુધી પહોંચ્યો હતો.ઘટનાને પગલે વિસ્તારમાં થોડા સમય માટે તંગદિલીનો માહોલ સર્જાયો હતો.જોકે,ઘટનાની જાણ થતાં જ પોલીસ તાત્કાલિક સ્થળ પર પહોંચી ગઈ હતી અને સમયસરની કાર્યવાહીના કારણે સ્થિતિને વધુ બગડતી અટકાવવામાં સફળ રહી હતી.મળતી માહિતી મુજબ,શરૂઆતમાં બંને પક્ષ વચ્ચે સામાન્ય મુદ્દે બોલાચાલી થઈ હતી.બાદમાં બંને જૂથના કેટલાક લોકો સામસામે આવી જતા મામલો ઉગ્ર બન્યો હતો અને એકબીજા પર પથ્થરમારો કરવામાં આવ્યો હતો.ઘટનાના કારણે વિસ્તારમાં દોડધામ અને અફરાતફરીનો માહોલ સર્જાયો હતો.સ્થાનિક વેપારીઓ અને રહેવાસીઓમાં પણ થોડા સમય માટે ભયનો માહોલ જોવા મળ્યો હતો.

બે યુવકો વચ્ચે સામાન્ય બોલાચાલી બાદ મામલો ગરમાયો 
મળતી માહિતી મુજબ દાંડીયાવાડના નાકા પાસે બે યુવકો વચ્ચે સામાન્ય બોલાચાલી થઈ હતી.સ્થાનિકોના હસ્તક્ષેપ બાદ મામલો શાંત પડી ગયો હતો, પરંતુ જૂની અદાવત અને બોલાચાલીના કારણે બાદમાં બંને પરિવારો વચ્ચે તણાવ વધી ગયો હતો.આ દરમિયાન એક પક્ષના લોકો સામા પક્ષના ઘરે પહોંચ્યા હતા અને બોલાચાલી બાદ વાતાવરણ વધુ ગરમાયું હતું. મહિલાઓ વચ્ચે પણ તકરાર થઈ હતી, જેમાં એક મહિલાને ઈજા પહોંચતા સારવાર માટે હોસ્પિટલમાં ખસેડવામાં આવી હતી. સાંજના સમયે પોળમાં જમણવારનો કાર્યક્રમ ચાલી રહ્યો હતો, ત્યારે ફરી એક વખત બંને જૂથ આમને-સામને આવી ગયા હતા.

બંને પક્ષે સામસામી પોલીસ ફરિયાદ નોંધાવી
ગઈકાલે દરિયાપુર બે યુવકો વચ્ચે થયેલી તકરાર બાદ દંડા અને અન્ય હથિયારો સાથે બે જૂથ અથડામણ થઈ હતી.જેમાં કેટલાક તત્ત્વોએ વાહનોને નિશાન બનાવી તોડફોડ કરી હતી, જેના કારણે સમગ્ર વિસ્તારમાં ભયનો માહોલ છવાઈ ગયો હતો.આ ઘટના સંદર્ભે બંને જૂથો દ્વારા દરિયાપુર પોલીસ સ્ટેશનમાં એકબીજા સામે હથિયારો સાથે જીવલેણ હુમલો કરવા અંગેની સામસામી ફરિયાદો નોંધાવવામાં આવી છે.પોલીસે બંને પક્ષોની રજૂઆતના આધારે ગુનો દાખલ કરી તપાસ હાથ ધરી છે.

પથ્થરમારાના વાઈરલ વીડિયોથી એફઆઈઆર પર ઉઠ્યા સવાલો
આ સમગ્ર ઘટના અંગે સોશિયલ મીડિયા પર વાઇરલ થયેલા એક વીડિયોએ નવો વિવાદ સર્જ્યો છે.આ વીડિયોમાં સ્પષ્ટપણે જોવા મળી રહ્યું છે કે લોકો એકબીજા પર પથ્થરમારો કરી રહ્યા છે અને નાસભાગ મચી છે. આશ્ચર્યની વાત એ છે કે, પોલીસે નોંધેલી એફઆઈઆરમાં પથ્થરમારાની ઘટનાનો કોઈ જ ઉલ્લેખ કરવામાં આવ્યો નથી. આ વિસંગતતાને પગલે સ્થાનિક નાગરિકો અને વેપારીઓમાં અનેક સવાલો ઊઠી રહ્યા છે અને વાઈરલ વીડિયોની તટસ્થ તપાસની માંગ કરી રહ્યા છે.બીજી તરફ, પોલીસે સ્પષ્ટતા કરી છે કે બંને પક્ષની ફરિયાદોની સાથે સાથે આ વાઈરલ વીડિયોની પણ ચકાસણી કરવામાં આવી રહી છે અને તપાસના અંતે હકીકત મુજબ દોષિતો સામે કડક કાર્યવાહી કરાશે.

એકબીજા પર પથ્થરો ફેંક્યા અને ભાગદોડ મચી
આ સમગ્ર ઘટનાનો એક વીડિયો હવે સોશિયલ મીડિયામાં ઝડપથી વાઇરલ થઈ રહ્યો છે. વીડિયોમાં કેટલાક લોકો એકબીજા તરફ પથ્થરો ફેંકતા અને ભાગદોડ મચી હોવાના દ્રશ્યો જોવા મળતા હોવાનો દાવો કરવામાં આવી રહ્યો છે. જોકે, પોલીસે નોંધેલી ફરિયાદોમાં કે પ્રાથમિક વિગતોમાં પથ્થરમારાનો કોઈ ઉલ્લેખ કરવામાં આવ્યો નથી. જેના કારણે સ્થાનિકો અને વેપારીઓમાં ચર્ચા શરૂ થઈ છે કે જો પથ્થરમારો થયો હતો તો તેનો ઉલ્લેખ ફરિયાદમાં કેમ કરવામાં આવ્યો નથી.

પોલીસના સમયસરથી સ્થિતિ કાબૂમાં
ઘટનાની જાણ થતાં જ દરિયાપુર પોલીસ સહિત ઉચ્ચ અધિકારીઓનો કાફલો તાત્કાલિક ઘટના સ્થળે પહોંચી ગયો હતો. પોલીસે બંને જૂથોને વિખેરી પરિસ્થિતિને કાબૂમાં લીધી હતી. સમયસરના હસ્તક્ષેપને કારણે કોઈ મોટી અનિચ્છનીય ઘટના બનતી અટકાવી શકાયી હતી. પોલીસે સમગ્ર વિસ્તારમાં ચુસ્ત બંદોબસ્ત ગોઠવ્યો છે. સંવેદનશીલ વિસ્તારોમાં વધારાનો પોલીસ ફોર્સ તૈનાત કરવામાં આવ્યો છે અને સતત પેટ્રોલિંગ શરૂ કરવામાં આવ્યું છે. કાયદો અને વ્યવસ્થા જળવાઈ રહે તેમજ કોઈ અફવા ફેલાઈને ફરીથી તંગદિલી સર્જાય નહીં તે માટે પોલીસ સતત નજર રાખી રહી છે.

CCTV ફૂટેજના આધારે તપાસ તેજ
આ સમગ્ર મામલે પોલીસે મારામારી અને રાયોટીંગ સહિતની કલમો હેઠળ ગુનો નોંધ્યો છે. પોલીસ હવે ઘટનામાં સામેલ વ્યક્તિઓની ઓળખ માટે આસપાસના વિસ્તારોમાં લાગેલા CCTV કેમેરાના ફૂટેજની તપાસ કરી રહી છે.ઉપરાંત ઘટનાસ્થળે હાજર રહેલા લોકોના નિવેદનો પણ નોંધવામાં આવી રહ્યા છે. અધિકારીઓના જણાવ્યા મુજબ કોણે અથડામણની શરૂઆત કરી, પથ્થરમારો કેવી રીતે થયો અને તેમાં અન્ય કોઈ લોકોની સંડોવણી હતી કે નહીં તે સહિતના તમામ મુદ્દાઓની ઊંડાણપૂર્વક તપાસ કરવામાં આવી રહી છે. જરૂરી પુરાવા મળ્યા બાદ વધુ ધરપકડ કરવામાં આવે તેવી શક્યતા છે.

રથયાત્રા પૂર્વે પોલીસ વધુ સતર્ક 
અમદાવાદમાં આગામી દિવસોમાં ભગવાન જગન્નાથજીની રથયાત્રા યોજાવાની હોવાથી પોલીસ પહેલેથી જ સમગ્ર શહેરમાં સુરક્ષા વ્યવસ્થા વધુ મજબૂત બનાવી રહી છે. દરિયાપુર સહિતના સંવેદનશીલ વિસ્તારોમાં વિશેષ નજર રાખવામાં આવી રહી છે.આવી સ્થિતિમાં બનેલી આ ઘટનાને પોલીસ ગંભીરતાથી લઈ રહી છે. પોલીસે નાગરિકોને કોઈપણ પ્રકારની અફવા પર વિશ્વાસ ન કરવા અને સોશિયલ મીડિયા પર ભ્રામક માહિતી શેર ન કરવાની અપીલ કરી છે. જો કોઈ શંકાસ્પદ પ્રવૃત્તિ જોવા મળે તો તાત્કાલિક પોલીસને જાણ કરવા પણ અનુરોધ કરવામાં આવ્યો છે.

સ્થાનિકોમાં ચિંતા,શાંતિ જાળવવાની કરી અપીલ
ઘટના બાદ સ્થાનિક રહેવાસીઓએ વિસ્તારમાં શાંતિ જળવાઈ રહે તેવી માંગ કરી છે. વેપારીઓએ જણાવ્યું કે આવા બનાવોના કારણે સામાન્ય જનજીવન અને વેપાર પર પણ અસર પડે છે.સ્થાનિકોએ પોલીસની ઝડપી કાર્યવાહીનું સ્વાગત કર્યું છે અને જવાબદાર લોકો સામે કડક કાર્યવાહી કરવાની માંગ કરી છે.પોલીસે પણ સ્પષ્ટ કર્યું છે કે કાયદો હાથમાં લેનાર કોઈપણ વ્યક્તિને છોડવામાં આવશે નહીં.સમગ્ર ઘટનાની નિષ્પક્ષ તપાસ કરીને જવાબદારો સામે કાયદેસરની કાર્યવાહી કરવામાં આવશે.હાલ દરિયાપુર વિસ્તારમાં સ્થિતિ સંપૂર્ણપણે નિયંત્રણમાં હોવાનું પોલીસ દ્વારા જણાવાયું છે.વિસ્તારમાં સતત પેટ્રોલિંગ,પોલીસ બંદોબસ્ત અને દેખરેખ ચાલુ રાખવામાં આવી છે જેથી ફરી કોઈ અનિચ્છનીય ઘટના ન બને.તપાસ પૂર્ણ થયા બાદ સમગ્ર ઘટનાક્રમ અંગે વધુ વિગતો સામે આવવાની શક્યતા છે.