અમદાવાદના શહેરીજનો પ્રદૂષિત પાણી પીવે છે, 1272 નમૂના અનફિટ

પાણી આપવાની મૂળભુત સુવિધાઓ પહોંચાડવાની જવાબદારી મહાનગરપાલિકાઓ અને નગરપાલિકાઓની છે અને છતાં પાલિકાઓ નાગરિકોને શુદ્ધ પાણી પહોંચાડવામાં નિષ્ફળ રહી છે. અમદાવાદમાં શહેરીજનો તરફથી પ્રદૂષિત પાણી આવતું હોવાની ફરિયાદો બાદ કોર્પોરેશન દ્વારા પાણીના સેમ્પલો લઇને લેબરેટરીમાં તપાસ માટે મોકલાયા હતા જેમાં વિવિધ વોર્ડમાંથી લેવાયો 1272 પાણીના સેમ્પલ અનફિટ જાહેર કરાયા છે

કોર્પોરેશને જે પાણીના નમૂના લેબોરેટરીમાં મોકલ્યા હતા તેમાં તપાસ પછી વર્ષ-2024માં બહેરામપુરા વોર્ડમાં 148, દાણીલીમડા વોર્ડમાં 105 જ્યારે ઈન્દ્રપુરી વોર્ડમાં 103 પાણીના સેમ્પલ લેબોરેટરી તપાસ પછી પીવાલાયક નહીં હોવાથી અનફીટ જાહેર કરવામાં આવ્યા હતા.

જો કે પાણીને ટ્રીટ કરાયા પછી પણ શહેરીજનોને પ્રદૂષિત પાણી મળી રહ્યું થયું છે. કોર્પોરેશને પાણીના નમૂનાઓની ચકાસણી કરવામાં આવતાં બહેરામપુરા વોર્ડમાંથી 148, દાણીલીમડામાં 105, ઇન્દ્રપુરીમાં 103, વટવામાં 99, લાંભામાં 99 તથા ખાડીયામાં 73, જમાલપુરમાં 62, ગોમતીપુરમાં 51 તથા શાહપુરમાં 50, દરિયાપુરમાંથી 45 અને અમરાઇવાડીમાંથી 23 સેમ્પલ અનફીટ જાહેર કરાયા છે. 

અમદાવાદ શહેરમાં  સરફેસ અને બોર આધારીત પીવાનું પાણી પુરુ પાડવામાં આવે છે અને તેમાં કોર્ટ વિસ્તારમાં એક દાયકાથી પણ વધુના સમયથી સાંજના સમયે અડધો કલાક આપવામા આવતો પાણી પુરવઠો બંધ કરી દેવામાં આવ્યો છે. જ્યારે નદીપારના ત્રણ ઝોનમાં સવાર અને સાંજ એમ બે સમય મ્યુનિસિપલ કોર્પોરેશન દ્વારા પાણી આપવામાં આવે છે. મ્યુનિસિપલ તંત્રના દાવા મુજબ, અમદાવાદને પાણી પુરુ પાડવા માટે રાસ્કા અને જાસપુર સહીતના અન્ય સ્તોત્રમાંથી રોજ 1683 મિલીયન લિટર પાણી મેળવી તેને ટ્રીટ કર્યા પછી કુલ 1647 મિલીયન લિટર પાણી તમામ 48 વોર્ડમાં પુરુ પાડવામાં આવે છે. 

સુત્રોએ કહ્યું ક અમદાવાદમાંથી રોજ સરેરાશ 100થી 150 પાણીના સેમ્પલ તપાસ માટે લેવામાં આવે છે. વર્ષ 2024 દરમિયાન પાણીના કુલ 63042 સેમ્પલ તપાસ માટે લેવામાં આવ્યા હતા. તપાસના અંતે 1272 સેમ્પલ અનફીટ જાહેર કરાયા હતા. કલોરીન ટેસ્ટ માટે વર્ષ દરમિયાન કુલ 404031 સેમ્પલ લેવામાં આવ્યા હતા. આ પૈકી 5764 સેમ્પલનો કલોરીન રીપોર્ટ નીલ આવ્યો હતો.