રંગોના પર્વ ધૂળેટીની ઉજવણી દરમિયાન સુરત શહેરમાં એક અત્યંત કરુણ ઘટના સામે આવી છે. મિત્રો સાથે તાપી નદીમાં નહાવા ગયેલા ત્રણ યુવકોમાંથી બે પાણીમાં ગરકાવ થઈ જતા દુર્ઘટના સર્જાઈ હતી. જેમાં એક યુવકનો મૃતદેહ તરત મળી આવ્યો હતો, જ્યારે ધોરણ 10માં અભ્યાસ કરતા વિદ્યાર્થીનો મૃતદેહ લગભગ 38 કલાક બાદ મળી આવ્યો હતો. આ ઘટનાને પગલે બંને પરિવારોમાં શોકનો માહોલ છવાઈ ગયો છે.
ઘટના શહેરના સરથાણા પ્રાણી સંગ્રહાલય પાછળના તાપી નદીના વિસ્તારમાં બની હતી. ધૂળેટીના દિવસે હોળી રમ્યા બાદ ત્રણ મિત્રો નદીમાં નહાવા માટે ગયા હતા, જ્યાં આ દુર્ઘટના બની હતી.
ધોરણ 10નો વિદ્યાર્થી બોર્ડ પરીક્ષા આપી રહ્યો હતો :&nbsp;
મૃતક વિદ્યાર્થી કૃષ્ણા ગૌતમ ચૌહાણ સુરતના વરાછા વિસ્તારમાં આવેલી શ્રી અશ્વિન હાઈસ્કૂલમાં ધોરણ 10માં અભ્યાસ કરતો હતો. હાલમાં તેની બોર્ડ પરીક્ષાઓ ચાલી રહી હતી અને તેનું પરીક્ષા કેન્દ્ર યોગી ચોક પાસે આવેલી આશાદીપ ઇન્ટરનેશનલ સ્કૂલમાં આવ્યું હતું.
કૃષ્ણાએ ગુજરાતી અને વિજ્ઞાનના બે પેપર આપી દીધા હતા અને 6 માર્ચના રોજ તેનું ગણિતનું મહત્વપૂર્ણ પેપર હતું. પરંતુ તેના પહેલા જ આ કરુણ ઘટના બનતા પરિવારજનો માટે આઘાતજનક સ્થિતિ ઊભી થઈ છે.
કૃષ્ણા પરિવારનો એકમાત્ર દીકરો હતો અને તેની બે બહેનો છે. તેના પિતા રોજગાર માટે દુબઈમાં રહે છે, જ્યારે તેની માતા સુરતમાં હીરાના કારખાનામાં કામ કરીને પરિવારનું ગુજરાન ચલાવે છે.
ધૂળેટી રમ્યા બાદ તાપી નદીમાં નહાવાનો બનાવ્યો પ્લાન :&nbsp;
મળતી માહિતી મુજબ, ભાવનગર જિલ્લાના ગારિયાધાર તાલુકાના સાતપડા ગામનો વતની અને હાલ વેસુ વિસ્તારમાં રહેતો 20 વર્ષીય જયદીપ વિરાસ કેમેરા ફિટિંગનું કામ કરતો હતો અને પરિવારને આર્થિક રીતે મદદ કરતો હતો.
ધૂળેટીના દિવસે જયદીપ પોતાના મિત્રો સાથે રંગોત્સવની ઉજવણી કરી રહ્યો હતો. ત્યારબાદ તે સીમાડા નાકા વિસ્તારમાં રહેતા તેના માસીના દીકરા નિતીનના ઘરે ગયો હતો. ત્યાં પણ તેમણે ધૂળેટીની મજા માણી હતી અને બાદમાં ત્રણેય મિત્રો સાથે નાસ્તો કર્યો હતો.
આ દરમિયાન તેઓએ તાપી નદીમાં નહાવા જવાનો પ્લાન બનાવ્યો હતો. નિતીનના મિત્ર કૃષ્ણા ચૌહાણ પણ તેમની સાથે જોડાયો હતો અને ત્રણેય મિત્રો બાઈક પર સરથાણા પ્રાણી સંગ્રહાલય પાછળ તાપી નદીના કાંઠે પહોંચ્યા હતા.
એક મિત્ર બહાર આવી મદદ માટે બુમો પાડી :&nbsp;
તાપી નદીના કાંઠે પહોંચ્યા બાદ ત્રણેય મિત્રોએ પહેલા એકબીજા પર રંગ છાંટી ફરી ધૂળેટી રમ્યા હતા. ત્યારબાદ તેઓ નદીમાં નહાવા માટે પાણીમાં ઉતર્યા હતા.
આ દરમિયાન જયદીપ અને કૃષ્ણા ઊંડા પાણીમાં જતાં અચાનક ડૂબવા લાગ્યા હતા. બંનેને ડૂબતા જોઈ નિતીન ગભરાઈ ગયો હતો. તે તરત જ પાણીમાંથી બહાર આવી ગયો અને મદદ માટે બુમો પાડી લોકોને બોલાવ્યા હતા.
112 પર કોલ, ફાયર ટીમે શરૂ કર્યું રેસ્ક્યૂ :&nbsp;
સ્થાનિક લોકોએ તરત જ 112 ઇમર્જન્સી નંબર પર ફોન કરીને પોલીસ અને ફાયર વિભાગને જાણ કરી હતી. ઘટનાની માહિતી મળતા જ પોલીસ અને ફાયર બ્રિગેડની ટીમ સ્થળ પર પહોંચી હતી અને શોધખોળ શરૂ કરી હતી.
ઘણાં કલાકોની મહેનત બાદ 5 માર્ચની રાત્રે ફાયર ટીમે જયદીપ વિરાસનો મૃતદેહ નદીમાંથી બહાર કાઢ્યો હતો. ત્યારબાદ કૃષ્ણાની શોધખોળ ચાલુ રાખવામાં આવી હતી.
38 કલાક બાદ વિદ્યાર્થીનો મૃતદેહ મળ્યો :&nbsp;
ફાયર વિભાગ દ્વારા સતત શોધ કામગીરી ચાલુ રાખવામાં આવી હતી. આખરે લગભગ 38 કલાક બાદ 6 માર્ચના રોજ કૃષ્ણા ચૌહાણનો મૃતદેહ પણ મળી આવ્યો હતો.
આ ઘટના બાદ બંને પરિવારોમાં ભારે શોકનો માહોલ છવાઈ ગયો છે. ધૂળેટીના તહેવારની ખુશીઓ વચ્ચે બનેલી આ દુર્ઘટનાએ સમગ્ર વિસ્તારમાં દુઃખ અને શોકની લાગણી ફેલાવી દીધી છે.
સ્થાનિક લોકો અને સગા-સંબંધીઓએ પણ પરિવારોને સાંત્વના પાઠવી છે.

તાપી નદી ડૂબી વિદ્યાર્થી મોત

ધૂળેટી બાદ તાપી નદીમાં નહાવા પડેલા ત્રણ મિત્રો પૈકી બે ડૂબ્યા,38 કલાક બાદ મૃતદેહ મળ્યો

March 6, 2026 | 15:39 IST