બોલિવૂડના સુપરસ્ટાર સલમાન ખાને આખરે ગાયક અરિજીત સિંહ સાથેના પોતાના લાંબા સમયથી ચાલી રહેલા વિવાદ પર મૌન તોડ્યું છે. રિયાલિટી શો 'બિગ બોસ 19'ના મંચ પર સલમાન ખાને સ્વીકાર્યું કે આ ગેરસમજ "તેમના તરફથી" થઈ હતી અને હવે તેઓ બંને ખૂબ સારા મિત્રો બની ગયા છે. આ ખુલાસો એક એવા વિવાદ પર પૂર્ણવિરામ મૂકે છે, જેણે દાયકાથી વધુ સમય સુધી બોલિવૂડ સંગીત ઉદ્યોગમાં ચર્ચા જગાવી હતી.
સલમાન ખાને આ ખુલાસો ત્યારે કર્યો જ્યારે શોમાં મહેમાન તરીકે આવેલા કોમેડિયન રવિ ગુપ્તાએ મજાકમાં આ મુદ્દો ઉઠાવ્યો. સલમાને રવિ ગુપ્તાને પૂછ્યું કે, "શું તમે ક્યારેય મારી મજાક ઉડાવી?" જેના જવાબમાં રવિ ગુપ્તાએ ડર સાથે ઇનકાર કર્યો અને કહ્યું, "મને તમારો સામનો કરવામાં ડર લાગે છે, કારણ કે હું અરિજીત સિંહ જેવો દેખાઉં છું."
<img style="display: block; margin-left: auto; margin-right: auto;" src="https://ibp-benefits.s3.ap-south-1.amazonaws.com/prod/news/uploads/images/1760348681104_Ravi-Gupta.jpg.jpg" alt="Ravi-Gupta.jpg" width="343" height="193">
આના જવાબમાં સલમાન ખાને તરત જ સ્પષ્ટતા કરી: "અરિજીત અને હું હવે ખૂબ સારા મિત્રો છીએ. તે એક ગેરસમજ હતી અને તે મારા તરફથી થઈ હતી." સલમાન ખાને એ પણ ખુલાસો કર્યો કે વિવાદ ઉકેલાયા બાદ અરિજીત સિંહે તેમની ફિલ્મો માટે ગીતો ગાયા છે. "ત્યારબાદ અરિજીત સિંહે મારા માટે ગીતો પણ ગાયા છે. મારી સાથે 'ટાઈગર'માં કામ કર્યું હતું, અને તે 'ગલવાન' પર કામ કરી રહ્યો છે," સલમાને કહ્યું.
વિવાદની શરૂઆત કઈ રીતે થઈ?
સલમાન ખાન અને અરિજીત સિંહના સંબંધોમાં ખટાશ 2014માં એક એવોર્ડ શો દરમિયાન આવી હતી. અરિજીત સિંહને શ્રેષ્ઠ ગાયકનો એવોર્ડ મળ્યો હતો, પરંતુ તે કેઝ્યુઅલ પોશાક અને ચંપલ પહેરીને સ્ટેજ પર પહોંચ્યા હતા. સલમાન ખાન તે શો હોસ્ટ કરી રહ્યા હતા.
સલમાને મજાકમાં અરિજીતને પૂછ્યું, "શું તું સૂઈ ગયો હતો?" જેના જવાબમાં અરિજીતે કહ્યું, "તમે લોકોએ જ મને સૂવડાવી દીધો." અરિજીતનો આ જવાબ સલમાનને પસંદ આવ્યો ન હતો. પ્રતિક્રિયામાં સલમાને કહ્યું હતું કે, "એ મારી ભૂલ નથી. તમારું ગીત 'તુમ હી હો' વાગી રહ્યું છે, અને લોકો સૂઈ રહ્યા છે." આ ઘટના બાદ સલમાને તેમની ફિલ્મો 'બજરંગી ભાઈજાન' અને 'સુલતાન'માંથી અરિજીતના ગીતો હટાવી દીધા હતા.
સમાધાન અને સંબંધોમાં સુધારો
જોકે, 2016માં અરિજીત સિંહે સોશિયલ મીડિયા પર સલમાન ખાનને એક માફી પત્ર લખીને સમાધાનના પ્રયાસ કર્યા હતા, પરંતુ સંબંધો 2023માં જ સુધર્યા. અરિજિતે સલમાન ખાનની ફિલ્મ 'ટાઈગર ૩'માં ગીત ગાયું, જેણે બંને વચ્ચેની બધી કડવાશ દૂર કરી દીધી. 'બિગ બોસ'ના મંચ પર સલમાનનું જાહેરમાં આ વિવાદની જવાબદારી લેવી, એ દર્શાવે છે કે બોલિવૂડના આ બે દિગ્ગજો હવે ખરા અર્થમાં સાથે કામ કરવા માટે તૈયાર છે.
&nbsp;
&nbsp;

અરિજીત-સલમાન વિવાદનો અંત, સલમાની સ્પષ્ટતા

દાયકા જૂના વિવાદ પર પૂર્ણવિરામ: ગેરસમજ કઈ રીતે થઈ અને કઈ રીતે સંબંધ સુધર્યા?

October 13, 2025 | 20:45 IST