દક્ષિણ ભારતના દિગ્ગજ અભિનેતા કોટા શ્રીનિવાસ રાવનું 83 વર્ષની વયે નિધન

'સરકાર', 'સન ઓફ સત્યમૂર્તિ', 'ટેમ્પર' જેવી અનેક પ્રખ્યાત ફિલ્મોમાં પોતાના દમદાર અભિનયથી દર્શકોના દિલ જીતનારા દક્ષિણ ભારતના લોકપ્રિય અભિનેતા કોટા શ્રીનિવાસ રાવનું 13 જુલાઈ, રવિવારે વહેલી સવારે નિધન થયું છે. તેઓ 83 વર્ષના હતા અને લાંબા સમયથી બીમાર હતા. 10 જુલાઈના રોજ જ તેમણે પોતાનો 83મો જન્મદિવસ ઉજવ્યો હતો.

બહુમુખી પ્રતિભાના ધની: અભિનય અને રાજકારણ

કોટા શ્રીનિવાસ રાવનું નિધન હૈદરાબાદના જ્યુબિલી હિલ સ્થિત તેમના બંગલામાં થયું. તેમણે તેલુગુ, તમિલ, કન્નડ અને હિન્દી સહિતની વિવિધ ભાષાઓમાં 750થી વધુ ફિલ્મોમાં અભિનય કર્યો હતો. તેમની બહુમુખી પ્રતિભાને બિરદાવતા તેમને 2015માં પદ્મશ્રીના સન્માનથી પણ નવાજવામાં આવ્યા હતા.

સફળ ફિલ્મ કારકિર્દી ઉપરાંત, કોટા શ્રીનિવાસ રાવે રાજકારણમાં પણ સક્રિય ભૂમિકા ભજવી હતી. તેઓ 1999 થી 2004 સુધી આંધ્રપ્રદેશના વિજયવાડા પૂર્વના ધારાસભ્ય પણ રહી ચૂક્યા હતા, જ્યાં તેમણે જનતાની સેવા કરી હતી.

મુખ્યમંત્રીઓ દ્વારા શ્રદ્ધાંજલિ

કોટા શ્રીનિવાસ રાવના નિધનથી ફિલ્મ જગત અને રાજકીય ક્ષેત્રમાં શોકની લાગણી છવાઈ ગઈ છે.

તેલંગાણાના મુખ્યમંત્રી રેવંત રેડ્ડીએ ભાવનાત્મક શ્રદ્ધાંજલિ અર્પણ કરતા લખ્યું, "પ્રખ્યાત અભિનેતા કોટા શ્રીનિવાસ રાવ ગારુનું નિધન અત્યંત દુઃખદ છે. તેમની ગેરહાજરી ફિલ્મ ઉદ્યોગ માટે એક ન ભરી શકાય તેવું નુકસાન છે. ભલે કોટા ગારુ હવે શારીરિક રીતે આપણી વચ્ચે નથી, પરંતુ તેમણે ભજવેલી ભૂમિકાઓ દ્વારા તેઓ હંમેશાં તેલુગુ લોકોના હૃદયમાં જીવંત રહેશે. હું ભગવાનને પ્રાર્થના કરું છું કે તેમના આત્માને શાંતિ મળે, હું તેમના પરિવારના સભ્યો પ્રત્યે મારી ઊંડી સંવેદના વ્યક્ત કરું છું."

આંધ્રપ્રદેશના મુખ્યમંત્રી એન. ચંદ્રબાબુ નાયડુએ પણ કોટા શ્રીનિવાસ રાવને શ્રદ્ધાંજલિ આપતા જણાવ્યું, "પોતાની ભૂમિકાઓથી સિનેમા દર્શકોના દિલ જીતનારા પ્રખ્યાત અભિનેતા કોટા શ્રીનિવાસ રાવનું નિધન અત્યંત દુઃખદ છે. લગભગ ચાર દાયકા સુધી સિનેમા અને રંગભૂમિના ક્ષેત્રમાં તેમનું કલાત્મક યોગદાન અને તેમણે ભજવેલી ભૂમિકાઓ અવિસ્મરણીય રહેશે. ખલનાયક અને પાત્ર કલાકાર તરીકે તેમણે ભજવેલી અસંખ્ય યાદગાર ભૂમિકાઓ તેલુગુ દર્શકોના હૃદયમાં હંમેશ માટે અંકિત રહેશે. તેમનું નિધન તેલુગુ ફિલ્મ ઉદ્યોગ માટે એક અપૂર્ણ નુકસાન છે. 1999માં તેમણે વિજયવાડાથી ધારાસભ્ય તરીકે ચૂંટણી જીતી અને જનતાની સેવા કરી. હું તેમના પરિવાર પ્રત્યે મારી ઊંડી સંવેદના વ્યક્ત કરું છું."

કોટા શ્રીનિવાસ રાવની લોકપ્રિય ફિલ્મો

કોટા શ્રીનિવાસ રાવે બોલિવૂડ અને દક્ષિણ ભારતીય સિનેમામાં અનેક યાદગાર ભૂમિકાઓ ભજવી છે. તેમણે અલ્લુ અર્જુન સાથે ફિલ્મ ‘સન ઓફ સત્યમૂર્તિ’ માં કામ કર્યું હતું. અમિતાભ બચ્ચન અભિનીત ફિલ્મ ‘સરકાર’ માં પણ તેમની મહત્વની ભૂમિકા હતી. હિન્દી ફિલ્મોમાં તેમણે ‘પ્રતિઘાત’, ‘રક્ત ચરિત્ર’ અને ટાઇગર શ્રોફની ‘બાગી’ માં પણ ખલનાયકની ભૂમિકા ભજવી હતી. તેઓ છેલ્લે 2023માં આવેલી ફિલ્મ ‘કબ્ઝા’ માં જોવા મળ્યા હતા, જેમાં ઉપેન્દ્ર રાવ, રાજકુમાર, કિચ્ચા સુદીપ અને શ્રિયા સરન જેવા કલાકારો પણ મહત્વની ભૂમિકામાં હતા.