સુરત પાંડેસરા વિસ્તારમાં યુવકની હત્યા

સુરતના પાંડેસરા વિસ્તારમાં મોડી રાતે હત્યાની ગંભીર અને ચકચારભરી ઘટના સામે આવી છે. અવિર્ભાવ સોસાયટી નજીક કોઇ અજાણ્યા શખ્સો દ્વારા સુભાષ લાંડગે નામના યુવકની કરુણ હત્યા કરવામાં આવી હોવાનું સામે આવ્યું છે. આ ઘટનાની ખબર પડતા જ સમગ્ર વિસ્તારમાં ભય અને અશાંતિનો માહોલ સર્જાયો હતો.

ઘટનાની જાણ થતાં પાંડેસરા પોલીસ સ્ટેશનનો સ્ટાફ તરત જ સ્થળ પર પહોંચ્યો હતો. પોલીસે જરૂરી પંચનામાની કાર્યવાહી પૂર્ણ કરી મૃતદેહને પોસ્ટમોર્ટમ અર્થે સરકારી હોસ્પિટલમાં ખસેડ્યો હતો. પ્રાથમિક તપાસમાં હત્યા પાછળનું કારણ કે શખ્સોની ઓળખ સ્પષ્ટ થઈ નથી.

પોલીસે હત્યાનો ગુનો નોંધાવીને તપાસનો ધમધમાટ શરૂ કરી દીધો છે. હાલ પોલીસ મૃતકના અંગત સંબંધો, કામકાજ, તેમજ તાજેતરમાં થયેલા વિવાદોની વિગતો એકત્ર કરી રહી છે. આ હત્યા વ્યક્તિગત અદાવતનું પરિણામ છે કે અન્ય કોઈ ગુનાહિત કારણથી થઈ છે તે દિશામાં ઊંડાણપૂર્વક તપાસ ચાલી રહી છે.