મહિલાને ડિજિટલ અરેસ્ટ કરી 32 કરોડ સેરવી લીધા!

કર્ણાટકના પાટનગર બેંગાલુરુમાં સાયબર છેતરપિંડીનો ચોંકાવનારો કિસ્સો પ્રકાશમાં આવ્યો છે. એક મહિલાને 'ડિજિટલ અરેસ્ટ'ના નામે ડરાવી-ધમકાવીને લગભગ 32 કરોડ રૂપિયાની ઠગાઈ કરવામાં આવી છે. પીડિતાની ફરિયાદના આધારે પોલીસે કેસ નોંધીને તપાસ હાથ ધરી છે. સાયબર ઠગોએ સીબીઆઈનો ડર બતાવી મહિલાને બે મહિના સુધી ડિજિટલ અરેસ્ટ કરી હતી.

આ છેતરપિંડી 15 સપ્ટેમ્બર, 2024ના રોજ શરૂ થઈ હતી અને તે ઘણા મહિનાઓ સુધી ચાલી. ઠગબાજોએ CBI, સાયબર ક્રાઇમ અને RBIના નામનો ઉપયોગ કરીને મહિલાને 'ડિજિટલ અરેસ્ટ' કરીને ઘરમાં જ કેદી બનાવીને રાખી હતી. પોલીસ ફરિયાદમાં મહિલાએ જણાવ્યું કે 15 સપ્ટેમ્બરના રોજ સવારે 11 વાગ્યે તેને એક ફોન કૉલ આવ્યો હતો, જેમાં કૉલ કરનારે પોતાને DHL કંપનીનો કર્મચારી ગણાવ્યો હતો.

કોલ કરનારે કહ્યું, 'તમે મુંબઈના અંધેરી ડીએચએલ સેન્ટરથી એક પાર્સલ બુક કરાવ્યું છે, તેમાં 3 ક્રેડિટ કાર્ડ, 4 પાસપોર્ટ અને ડ્રગ્સ મળ્યા છે.' મહિલાએ કહ્યું કે, 'તે મુંબઈ ગઈ જ નથી અને બેંગલુરુમાં રહે છે. આના પર ઠગે જવાબ આપ્યો, 'આ સાયબર ક્રાઇમ છે. તમારા નામ, સરનામા અને ફોન નંબરનો ખોટો ઉપયોગ થયો છે.' આ કહીને કોલને સીબીઆઈના નામે કોઈ અન્ય વ્યક્તિને ટ્રાન્સફર કરી દેવામાં આવ્યો હતો. 

સીબીઆઈ અધિકારી તરીકે વાત કરનાર વ્યક્તિએ મહિલાને ધમકાવી અને કહ્યું કે, 'તમારી વિરુદ્ધ પુરાવા છે. તમે જવાબદાર છો. જો તમે સ્થાનિક પોલીસને જાણ કરી કે વકીલની મદદ લીધી તો તમારા જીવને જોખમ છે. અપરાધીઓ તમારા ઘર પર નજર રાખી રહ્યા છે. પરિવારને કશું કહેશો નહીં. નહીં તો તેમને પણ ફસાવવામાં આવશે.'

સાયબર ઠગોએ મહિલાને સ્કાયપે એપ ડાઉનલોડ કરાવી. જ્યાં મોહિત હાંડા બનીને આવેલા એક વ્યક્તિએ તેને કેમેરા ચાલુ રાખીને ઘરમાં નજરકેદ હોવાનું જણાવ્યું. બે દિવસ સુધી કેદ રાખ્યા બાદ કથિત CBI અધિકારી પ્રદીપસિંહ સાથે વીડિયો કોલ પર મુલાકાત કરાવી. જેણે ડરાવવાની સાથે સારો વ્યવહાર પણ કર્યો. ત્યારબાદ, રાહુલ યાદવ નામનો એક અન્ય વ્યક્તિ એક અઠવાડિયા સુધી સ્કાયપે દ્વારા નજર રાખતો રહ્યો.

ડરના માર્યા પીડિતાએ ઘરની બહાર નીકળવાનું ટાળ્યું અને ઘરેથી જ કામ કર્યું. પછી તેને કહેવામાં આવ્યું કે નિર્દોષતા સાબિત કરવા માટે RBI દ્વારા સંપત્તિની તપાસ કરાવવી પડશે અને તેના માટે સાયબર ક્રાઇમની સહીવાળા નકલી પત્રો પણ બતાવ્યા હતા.

મહિલાને તેની તમામ સંપત્તિની યાદી આપવા અને બેન્ક ખાતાઓમાંથી નામ હટાવવા માટે 90 ટકા પૈસા જમા કરાવવા કહેવામાં આવ્યું. 24 સપ્ટેમ્બરથી 22 ઓક્ટોબર સુધીમાં પીડિતાએ સંપત્તિની માહિતી આપી. ત્યારબાદ, 24 ઓક્ટોબરથી 3 નવેમ્બર દરમિયાન 2 કરોડની જમીનની રકમ અને 18 નવેમ્બર 2024 સુધીમાં 2.4 કરોડનો ટેક્સ માગવામાં આવ્યો. જે જમા કરાવવામાં આવ્યો. આમ, પીડિતા સાથે કુલ ₹32 કરોડની ઠગાઈ થઈ. 1 ડિસેમ્બર 2024ના રોજ તેને કથિત 'ક્લિયરન્સ લેટર' પણ મળ્યો.

તેના દીકરાની સગાઈ 6 ડિસેમ્બરે હોવા છતાં, ઠગાઈના ડર અને તણાવને કારણે મહિલા બીમાર પડી અને એક મહિનાથી વધુ સમય સુધી પથારીવશ રહી. જ્યાં ડૉક્ટરે તેની માનસિક અને શારીરિક સારવાર કરી. આ દરમિયાન તેણે સ્કાયપે પર અપડેટ આપવું પડતું હતું. ઠગબાજોએ 25 ફેબ્રુઆરી, 2025 સુધીમાં પૈસા પાછા આપવાનું કહ્યું. બાદમાં તેઓ ફરી ટેક્સ માંગવા લાગ્યા. શંકા થતાં પીડિતાએ પોલીસમાં ફરિયાદ નોંધાવી અને પોલીસે આ મામલે તપાસ શરૂ કરી છે.