દિલ્હીના મદનગીર વિસ્તારમાં એક ચોંકાવનારી ઘટના સામે આવી છે, જ્યાં 8 વર્ષના લગ્નજીવનમાં સતત ઝઘડતા એક દંપતીના મામલામાં પત્નીએ તેના પતિ પર ઘાતકી હુમલો કર્યો છે. પોલીસે બુધવારે જણાવ્યું હતું કે 28 વર્ષીય દિનેશ કુમાર નામના વ્યક્તિને તેની પત્નીએ ઊંઘમાં ઉકળતું તેલ નાખી દીધું અને બાદમાં બળેલા ઘા પર લાલ મરચું પાવડર છાંટી દીધો હતો. આ ઘટના 2 ઓક્ટોબરના રોજ વહેલી સવારે 3 વાગ્યાની આસપાસ બની હતી, જ્યારે દિનેશ તેમની ચાર વર્ષની પુત્રીની બાજુમાં સૂતો હતો.
'જો શોર મચાવ્યો તો...!' ધમકી
ફાર્માસ્યુટિકલ કંપનીમાં કામ કરતા પીડિત દિનેશ કુમારે પોલીસ ફરિયાદમાં જણાવ્યું કે, જ્યારે તે જાગ્યો ત્યારે તેની પત્ની ઉકળતા તેલનું વાસણ લઈને ઊભી હતી. સાઉથ દિલ્હીના ડેપ્યુટી કમિશનર ઑફ પોલીસ (DCP) અંકિત ચૌહાણે જણાવ્યું કે, પત્નીએ દિનેશના ધડ અને ચહેરા પર ગરમ તેલ રેડ્યું અને પછી મરચું પાવડર છાંટ્યો.&nbsp;
પીડિતે આરોપ લગાવ્યો કે પત્નીએ તેને ધમકી આપી, "જો શોર મચાવ્યો તો ઔર ગરમ તેલ ડાલ દૂંગી" (જો તમે બૂમ પાડી તો વધુ ગરમ તેલ નાખીશ). જ્યારે મકાનમાલિકે દરમિયાનગીરી કરવાનો પ્રયાસ કર્યો, ત્યારે પત્નીએ દાવો કર્યો કે તે પતિને હોસ્પિટલ લઈ જઈ રહી છે. જોકે, તેણી વિરુદ્ધ દિશામાં જઈ રહી હોવાથી શંકા ઉપજી અને મકાનમાલિકે ઓટોની વ્યવસ્થા કરીને દિનેશને એકલા જ હોસ્પિટલ પહોંચાડ્યો હતો.
પોલીસના જણાવ્યા મુજબ, દિનેશ અને તેની પત્ની સાધના, જેઓ ઉત્તર પ્રદેશના રાયબરેલીના વતની છે, તેઓ ઘણા વર્ષોથી મદનગીરમાં ભાડાના મકાનમાં રહેતા હતા અને લાંબા સમયથી ઘરેલુ વિવાદોમાં હતા.
પોલીસ તપાસમાં બહાર આવ્યું છે કે પત્ની સાધનાએ બે વર્ષ પહેલા પણ પતિ વિરુદ્ધ ક્રાઇમ અગેઇન્સ્ટ વુમન (CAW) સેલમાં ફરિયાદ નોંધાવી હતી, જેનું નિરાકરણ આવી ગયું હતું. જોકે, થોડા અઠવાડિયા પહેલા તેણે ફરી એક નવી ફરિયાદ નોંધાવી હતી. દિનેશ કુમારના નિવેદન અને પ્રાથમિક પુરાવાના આધારે, આંબેડકર નગર પોલીસ સ્ટેશનમાં BNS સંબંધિત કલમો હેઠળ કેસ નોંધવામાં આવ્યો છે, પરંતુ અત્યાર સુધી કોઈ ધરપકડ કરવામાં આવી નથી.

દિલ્હીમાં સુતેલા પતિ પર પત્નીએ ઉકળતું તેલ રેડ્યું

ઘરેલુ વિવાદ બાદ પત્નીનું ઘાતકી કૃત્ય, પતિ પર ઉકળતું તેલ રેડ્યા પછી લાલ મરચું પાવડર છાંટ્યો

October 9, 2025 | 17:15 IST