કોણ છે ચંડોળા તળાવનો લુખ્ખો લલ્લા બિહારી? જાણો તેની કરમ કુંડળી

અમદાવાદના ચંડોળા તળાવમાં ગેરકાયદે વસવાટ કરતાં બાંગ્લાદેશીઓ સામે કાર્યવાહી શરૂ કરાયા બાદ હવે ગેરકાયદે બાંધકામ દૂર કરવાનું શરૂ કર્યુ છે. ડિમોલિશન કાર્યવાહી દરમિયાન સૌથી વધુ ચર્ચામાં નામ આવ્યુ છે લલ્લા બિહારીનું.. લલ્લા બિહારીએ ચંડોળા તળાવમાં દબાણ કરીને 2 હજાર વાર જગ્યામાં ગેરકાયદે ફાર્મ હાઉસ બનાવી દીધુ હતુ. આ ફાર્મ અસામાજીક તત્વોનો અડ્ડો બની ગયું હતુ. તેથી પોલીસે ફાર્મ હાઉસ તોડી પાડી મહેમૂદ પઠાણ ઉર્ફે લલ્લા બિહારી અને તેના પુત્ર ફતેહ મોહમ્મદની ક્રાઈમ બ્રાન્ચે ધરપકડ કરી છે. ત્યારે આવો જાણીએ લલ્લા બિહારીની કરમ કુંડળી...

ચંડોળા તળાવમાં મેગા ડિમોલેશનની કામગીરી હાથ ધરવામાં આવી છે. વહેલી સવારથી 74 JCB, 200 ટ્રક, 2 હજાર પોલીસ જવાનો, 1,800 મનપાના કર્મચારીઓ કામગીરીમાં જોડાયા છે. ચંડોળા તળાવમાં ઝૂંપડાઓની વચ્ચે 2 હજાર વારની જગ્યામાં આલિશાન ફાર્મ હાઉસ જોવા મળ્યું હતું. અમદાવાદ પોલીસ કમિશનરે સ્થળની મુલાકાત લેતાં તે પણ આશ્ચર્યમાં મૂકાઇ ગયા હતા. લલ્લા બિહારીનું ફાર્મ હાઉસ હોવાનું જાણવા મળતાં તેને ધ્વસ્ત કરીને લલ્લા બિહારી અને તેના પુત્ર ફતેહ મોહમ્મદની ધરપકડ કરાઈ છે.

કોણ છે મહેમૂદ પઠાણ ઉર્ફે લલ્લા બિહારી? 

મહેમૂદ પઠાણ ઉર્ફે લલ્લા બિહારી મૂળ અજમેરનો રહેવાસી છે. બે દાયકા પહેલાં અમદાવાદ આવી તેણે ચંડોળા વિસ્તારમાં વસવાટ શરૂ કર્યો હતો. તેણે અલગ અલગ લોકો સાથે મળી ચંડોળા તળાવમાં થતાં ગેરકાયદે રહેઠાણ પર કઈ રીતે કબજો જમાવવો અને પોતાનું સામ્રાજ્ય ઊભું કરવું તેની શરૂઆત કરી હતી. ત્યારબાદ ચંડોળાના પૂર્વ ભાગમાં ધીમે ધીમે દબાણ શરૂ કર્યું. લલ્લા બિહારી ચંડોળા તળાવ વિસ્તારમાં સરતાજ બનીને બેઠો હતો.

ફાર્મ હાઉસમાં બેઠાં બેઠાં મોટા વહીવટ પાર પાડતો હતો. લલ્લા બિહારી ગેરકાયદે ફાયનાન્સનો ધંધો કરતો હતો.લલ્લા બિહાર પશ્વિમ બંગાળના એજન્ટ થકી બાંગ્લાદેશીઓને લાવતો હતો. તે વ્યક્તિ દીઠ 10 થી 15 હજાર રૂપિયા લઈ જગ્યા ભાડે આપતો હતો. ગેરકાયદે આવેલા બાંગ્લાદેશીઓને ખોટા દસ્તાવેજ પણ બનાવી આપતો હતો. મૂળ અજમેરનો હોવા છતાં બિહારનો હોવાનું કહી પોતાની ઓળખ લલ્લા બિહારી તરીકે ઊભી કરી હતી. કોઈપણ બાંગ્લાદેશી ગુજરાતમાં આવે અને તેને અમદાવાદમાં રહેવું હોય તો તેને બંગાળથી જ કેટલાક એજન્ટો લલ્લા બિહારીનું નામ આપતા હતા.

મહિને 10 થી 12 લાખ રૂપિયા કમાતો હતો 

શરૂઆતમાં તેણે ગેરકાયદે રહેતા લોકોને ટાર્ગેટ બનાવી રૂમ-ગોડાઉન આપવાનું શરૂ કર્યું. પહેલા કાચા શેડ ઊભા કરી તેમાંથી રોકડી કરવાનું શરૂ કર્યું. અહીંયાં સૌથી વધુ બાંગ્લાદેશીઓ આવતા હતા એટલે તેમાંથી તેને રૂપિયા મળશે તેવું નક્કી કર્યું અને ચંડોળા તળાવનો મોટાભાગનો ભાગ કવર કરીને નાનું ગામ ઊભું કરી દીધું હતું. અહીંયાં તે પાર્કિંગ, ગોડાઉન, નાના-નાના રૂમ બનાવી તેને ભાડે આપતો હતો. બાંગ્લાદેશીઓ મોટા પ્રમાણમાં આવતા હોવાથી તેના માટે અહીંના કેટલાક લોકો સાથે મળીને ગેરકાયદે ડોક્યુમેન્ટ ઊભા કરવા અને ખોટા ભાડા કરાર કરીને ભારતીય નાગરિકતા અપાવવા સુધીનું એક પેકેજ આપતો હતો. લલ્લા બિહારી દર મહિને 10 થી 12 લાખ રૂપિયા કમાતો હોવાનું બહાર આવ્યું છે. એક વખત કોઈ બાંગ્લાદેશી અહીં આવી જાય. ત્યારબાદ તેને રહેવાની અને બાદમાં ખોટા ડોક્યુમેન્ટ ઊભા કરી મજૂરી કરવાનું કામ પણ આપતો હતો. ગેરકાયદે બાંગ્લાદેશીઓને સાચવવાનું કામ કરતો હતો.

ચંડોળા તળાવમાં ગેરકાયદે આલિશાન ફાર્મ હાઉસ બનાવી દીધું

લલ્લા બિહારીએ ચંડોળા તળાવની જગ્યા પચાવી પાડી ગેરકાયદે આલિશાન ફાર્મહાઉસ બનાવી દીધું છે. આ ફાર્મ હાઉસ વિવિધ સુવિધાઓથી સજ્જ હતું. ફાર્મ હાઉસમાં હવેલીને ટક્કર મારે તેવી સુવિધાઓ ઉભી કરવામાં આવી છે. કિચન, હીંચકા, ફુવારા, મીની સ્વિમિંગ પુલ, ચિલ્ડ્રન પ્લે એરિયા અને એસીથી સજ્જ રૂમ બનાવવામાં આવ્યા છે.  ફાર્મ હાઉસમાં ઠંડક માટે ચારેય તરફ ગ્રીન નેટ અને લીલા ઝાડ ઉગાડવામાં આવ્યા છે. ફાર્મહાઉસના પાછળના ભાગે સીઝ કરેલી રિક્ષાઓ પાર્ક કરવામાં આવી હતી. આ ફાર્મ હાઉસ ઝૂંપડાઓની વચ્ચે અસામાજિક તત્વોના ઐયાશીનો અડ્ડો બની ગયો હતું.  

મિની બાંગ્લાદેશ બની ગયું ચંડોળા તળાવ

દાણીલીમડા રોડ પર આવેલું ચંડોળા તળાવ અને એની આસપાસનો વિસ્તાર મિની બાંગ્લાદેશ તરીકે ઓળખાય છે. 1200 હેક્ટર વિસ્તાર અસામાજીક પ્રવૃત્તિઓ માટે કુખ્યાત છે. સાયકલ પણ ન જઈ શકે તેવી સાંકડી ગલીઓ બનાવી દીધી છે. પશ્ચિમ બંગાળથી આવીને વસેલા મુસલમાનો અહીંયા વર્ષોથી રહે છે. આ લોકોની વચ્ચે કેટલાક બાંગ્લાદેશી મુસલમાનો પણ રહે છે. જે પોતાને ભારતના નાગરિક ગણાવે છે. કેટલાક ઘૂસણખોરોના કારણે અહીં આસપાસમાં વર્ષોથી રહેતા મુસલમાનોને તકલીફનો સામનો કરવો પડે છે.