દાંતામાં હિંસક હુમલો: 47 કર્મચારી ઘાયલ, PI ગંભીર

બનાસકાંઠા જિલ્લાના દાંતા તાલુકાના પાડલીયા ગામમાં વન વિભાગની જમીનને લઈને લાંબા સમયથી ચાલતા વિવાદે હિંસક વળાંક લીધો. કાર્યવાહી અને સમાધાન માટે પહોંચેલી પોલીસ, વન વિભાગ અને રેવન્યુ વિભાગની સંયુક્ત ટીમ પર ઉશ્કેરાયેલા ટોળાએ પથ્થરમારો તેમજ તીર-કામઠાં જેવા હથિયારો વડે હુમલો કર્યો. આ ઘટનામાં ત્રણેય વિભાગના કુલ 47 અધિકારી અને કર્મચારીઓ ઇજાગ્રસ્ત થયા છે.

મળતી માહિતી મુજબ, ગામમાં વન વિભાગના સર્વે નંબર 9 પર નર્સરી અને પ્લાન્ટેશન કામગીરી ચાલી રહી હતી. તે દરમિયાન અચાનક મોટી સંખ્યામાં સ્થાનિકો ભેગા થયા અને સરકારી ટીમોને ઘેરીને હિંસક હુમલો શરૂ કર્યો. પરિસ્થિતિ કાબૂમાં લેવા માટે પોલીસે ટીયર ગેસનો ઉપયોગ કર્યો. પરંતુ ટોળું વધુ આક્રમક બન્યું અને સ્થિતિ વધુ તંગ બની.

હુમલામાં અંબાજી પોલીસ ઇન્સ્પેક્ટર આર.બી. ગોહિલને ગંભીર ઇજા પહોંચી હતી. તમામ ઇજાગ્રસ્તોને તાત્કાલિક અંબાજી સરકારી હોસ્પિટલ ખસેડવામાં આવ્યા હતા. જેમાંથી બે અધિકારીઓને વધુ સારવાર માટે પાલનપુર સિવિલ હોસ્પિટલ રીફર કરવામાં આવ્યા છે. અન્ય ઇજાગ્રસ્તોની હાલત સ્થિર હોવાનું જણાવાયું છે.

હિંસક ઘટનાના દરમિયાન ટોળાએ પોલીસ અને વન વિભાગની કેટલીક સરકારી ગાડીઓને આગ ચાંપી ભારે નુકસાન પહોંચાડ્યું હતું. ઘટનાની જાણ થતાં બનાસકાંઠા જિલ્લા કલેક્ટર મિહિર પટેલ અને વન વિભાગના ઉચ્ચ અધિકારીઓ હોસ્પિટલ પહોંચ્યા અને ઘાયલોની મુલાકાત લઈ જરૂરી સારવાર સુનિશ્ચિત કરવા સૂચનાઓ આપી.

પ્રાથમિક તપાસમાં અંદાજે 500 લોકોના ટોળાએ પૂર્વ આયોજિત રીતે હુમલો કર્યો હોવાનું સામે આવ્યું છે. હુમલામાં પથ્થરો, ગોફણ અને તીર-કામઠાનો ઉપયોગ થયો હતો. ઘટનાને પગલે પાડલીયા ગામ અને આસપાસના વિસ્તારોમાં ભારે પોલીસ બંદોબસ્ત ગોઠવવામાં આવ્યો છે.

જિલ્લા પોલીસ વડા સહિત ઉચ્ચ અધિકારીઓએ ઘટનાસ્થળે જઈ પરિસ્થિતિની સમીક્ષા કરી છે. હુમલાખોરો સામે કડક કાયદેસરની કાર્યવાહી માટે ફરિયાદ નોંધવામાં આવી છે અને આરોપીઓની ધરપકડ માટે આગામી દિવસોમાં વિશાળ કાર્યવાહી થવાની શક્યતા છે. હાલ જિલ્લામાં કાયદો અને વ્યવસ્થા જાળવવા માટે પોલીસ તંત્ર સંપૂર્ણ સતર્ક છે.