Vadodara : સાવધાન! Shadi.com પર પ્રેમનો ઢોંગ રચી નરાધમે યુવતીને ફસાવી આચર્યો બળાત્કાર!

મેટ્રિમોનિયલ સાઇટ પર સંબંધો શોધી રહેલી યુવતીઓ માટે લાલબત્તી સમાન એક ભયાવહ ઘટના સામે આવી છે. વડોદરા (Vadodara)ના એક યુવકે 'Shadi.com'  જેવી જાણીતી મેટ્રિમોનિયલ સાઇટ પરથી પરિચય કેળવીને ઇન્દોરની યુવતી પર બળાત્કાર ગુજાર્યો હોવાનો સનસનાટીપૂર્ણ કિસ્સો પ્રકાશમાં આવ્યો છે. ઇન્દોર પોલીસે વડોદરા પોલીસની મદદથી આ નરાધમ યુવકને ઝડપી પાડીને કાયદાના સકંજામાં લીધો છે.

પ્રેમનો ઢોંગ અને શારીરિક શોષણ...

ઇન્દોરના લસુન્દ્રા વિસ્તારની પીડિત યુવતી અને વડોદરા (Vadodara)ના ભરત પ્રકાશચંદ્ર જેના (રહે. સમૃદ્ધિ સાફલ્ય ફ્લેટ, યમુના મીલ, સોમા તળાવ પાસે, ડભોઇ રોડ) વચ્ચે 'Shadi.com' પર પ્રોફાઇલ મેચ થતાં તેમનો પરિચય થયો હતો. આ ઓળખાણ બે મહિના સુધી મોબાઇલ પર વાતચીતમાં પરિણમી હતી, જ્યાં બંને વચ્ચે વિશ્વાસનો સેતુ રચાયો હોય તેવું યુવતીને લાગતું હતું. ત્યારબાદ, આ સંબંધને આગળ વધારવાના બહાને તેમણે ઇન્દોરમાં મુલાકાત ગોઠવી.

વડોદરા (Vadodara)નો આ યુવક બે દિવસ માટે ઇન્દોરની એક હોટલમાં રોકાયો હતો. આ દરમિયાન, યુવકે યુવતી પર બળાત્કાર ગુજાર્યો હોવાનો આરોપ છે. શારીરિક શોષણ બાદ બંને વચ્ચે કોઈ બાબતે ઝઘડો થયો અને યુવકે યુવતીનો મોબાઇલ નંબર બ્લોક કરી દીધો, જાણે કશું બન્યું જ ન હોય!

પોલીસ કાર્યવાહી અને નરાધમની ધરપકડ...

પોતાની સાથે થયેલી ક્રૂરતાથી આઘાત પામેલી યુવતીએ તાત્કાલિક ઇન્દોર પોલીસમાં ફરિયાદ નોંધાવી. મામલાની ગંભીરતા જોતા, ઇન્દોર પોલીસે વડોદરા પોલીસનો સંપર્ક કર્યો. વડોદરા ક્રાઈમ બ્રાન્ચની ટીમે ત્વરિત કાર્યવાહી કરીને ભરત પ્રકાશચંદ્ર જેનાને તેના ડભોઇ રોડ સ્થિત નિવાસસ્થાનેથી ઝડપી પાડ્યો હતો. ધરપકડ બાદ, વડોદરા પોલીસે ઇન્દોર પોલીસને આ યુવકને સોંપવાની તજવીજ હાથ ધરી છે.

આ પણ વાંચો : Ahmedabad Plane Crash : ભાવિ માતા-પિતા અને ગર્ભમાંનું બાળક પણ ન બચ્યું, પરંતુ બાળ ગોપાલ...

આ ઘટના મેટ્રિમોનિયલ સાઇટ્સ પર સંબંધો શોધી રહેલી યુવતીઓ માટે ગંભીર ચેતવણી સમાન છે. ડિજિટલ પ્લેટફોર્મ પર બનતા સંબંધોમાં અંધવિશ્વાસ મૂકતા પહેલા સાવચેતી રાખવી અનિવાર્ય છે. આવા નરાધમોને કડકમાં કડક સજા થાય તે અનિવાર્ય છે.

આ પણ વાંચો : Ahmedabad Plane Crash : બ્લેક બોક્સ મળ્યું, ટેકનિકલ ખામીની આશંકા...!