વડોદરામાં પવિત્ર સંબંધ લજવાયો: નરાધમ દાદાએ માસૂમ પૌત્રીની છેડતી કરતા ચકચાર સંસ્કારી નગરી વડોદરામાં સંબંધોની મર્યાદા ઓળંગતી એક અત્યંત શરમજનક ઘટના સામે આવી છે. શહેરના સોમા તળાવ વિસ્તારમાં આવેલી વુડા આવાસ યોજનામાં એક વૃદ્ધે પોતાની જ સાત વર્ષની પૌત્રી સાથે શારીરિક અડપલાં કર્યા હોવાની ઘટના પ્રકાશમાં આવતા સ્થાનિક રહીશોમાં ભારે રોષ જોવા મળી રહ્યો છે. દાદા અને પૌત્રીના પવિત્ર સંબંધને કલંકિત કરનારી આ ઘટનાએ સમગ્ર વડોદરામાં ચર્ચા જગાવી છે.
એકાંતનો લાભ લઈ પૌત્રીને રૂમમાં બોલાવી :&nbsp;
બનાવની વિગતો મુજબ, ગત રાત્રિના સમયે આરોપી વૃદ્ધે પોતાની સાત વર્ષની પૌત્રી પર ખરાબ નજર બગાડી હતી. ઘરમાં કોઈનું ધ્યાન ન હોય તેવા સમયે દાદાએ બાળકીને કોઈ પણ બહાને પોતાના રૂમમાં બોલાવી હતી. માસૂમ બાળકીને અંદાજ પણ નહોતો કે જે દાદાની આંગળી પકડીને તે મોટી થઈ રહી છે, તે જ તેની સુરક્ષા સાથે ખિલવાડ કરશે. રૂમમાં એકલતાનો લાભ ઉઠાવી વૃદ્ધે બાળકી સાથે અશોભનીય વર્તન અને શારીરિક છેડતી શરૂ કરી હતી.
માસૂમ બાળકીએ માતાને કહી આપવીતી :&nbsp;
દાદાની આ વિકૃત હરકતથી સાત વર્ષની બાળકી ડરી ગઈ હતી અને ગભરાયેલી હાલતમાં રૂમની બહાર દોડી આવી હતી. બાળકીએ હિંમત ભેગી કરી તુરંત જ પોતાની માતા પાસે જઈને દાદાએ કરેલી તમામ હરકતો વિશે જાણ કરી હતી. પોતાની વહાલી પુત્રી સાથે થયેલા આ દુષ્કૃત્યની વાત સાંભળીને માતા સ્તબ્ધ થઈ ગઈ હતી અને પરિવારમાં ભારે માતમ છવાઈ ગયો હતો.
પુત્રવધૂએ સસરાને પાઠ ભણાવવા પોલીસનો આશરો લીધો :&nbsp;
સામાન્ય રીતે આવા કિસ્સાઓમાં પરિવારની આબરૂ જવાની બીકે ગુનાને દબાવી દેવામાં આવતો હોય છે, પરંતુ આ કિસ્સામાં માતાએ મક્કમતા દાખવી હતી. પુત્રીના ભવિષ્ય અને સુરક્ષાને ધ્યાને રાખીને વહૂએ પોતાના જ સસરા વિરુદ્ધ કાયદાકીય લડત આપવાનું નક્કી કર્યું. તેમણે તાત્કાલિક કપૂરાઈ પોલીસ સ્ટેશન પહોંચીને સસરા સામે લેખિત ફરિયાદ નોંધાવી હતી.
પોલીસની કડક કાર્યવાહી અને પોક્સો હેઠળ ગુનો :&nbsp;
કપૂરાઈ પોલીસે આ મામલાની સંવેદનશીલતા સમજીને વિલંબ કર્યા વગર કાર્યવાહી હાથ ધરી છે. પોલીસે આરોપી દાદા વિરુદ્ધ છેડતી તેમજ પોક્સો (POCSO - પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સ) એક્ટની કડક કલમો હેઠળ ગુનો દાખલ કર્યો છે. પોલીસે આરોપીની અટકાયત કરવાની તજવીજ શરૂ કરી છે અને બાળકીનું કાઉન્સેલિંગ પણ કરવામાં આવી રહ્યું છે. સમાજમાં સુરક્ષાનો જેમને પર્યાય માનવામાં આવે છે, તેવા વડીલો દ્વારા જ આવી હરકતો થતા સામાજિક મૂલ્યો સામે મોટા પ્રશ્નાર્થો ઊભા થયા છે.

પૌત્રી છેડતી કેસ

સોમા તળાવ વિસ્તારની શરમજનક ઘટના: હવસખોર દાદા વિરુદ્ધ પુત્રવધૂએ નોંધાવી પોક્સો હેઠળ ફરિયાદ

March 6, 2026 | 14:00 IST