વડોદરા: કેનેડાના વિઝાના બહાને 6 લાખની છેતરપિંડી

ગુજરાતમાં વિદેશ જવાના ક્રેઝનો લાભ ઉઠાવી નિર્દોષ લોકોને છેતરતી ટોળકીઓ સતત સક્રિય છે. વડોદરાના ગોરવા વિસ્તારમાં કેનેડાના વર્ક પરમિટ વિઝા અપાવવાના બહાને એક મહિલા એજન્ટ દ્વારા આણંદની મહિલા પાસેથી 6 લાખ રૂપિયાથી વધુની રકમ પડાવી લેવાની ઘટના સામે આવી છે. આ મામલે ગોરવા પોલીસે ગુનો નોંધી કાયદેસરની તપાસ શરૂ કરી છે.

કેવી રીતે શરૂ થઈ છેતરપિંડીની જાળ ?

આણંદ જિલ્લાના વાસદ ખાતે રહેતા 48 વર્ષીય તૃપ્તિબેન પટેલ કેનેડા જવા ઈચ્છતા હતા. આ દરમિયાન તેમના ભાણેજ દ્વારા તેમનો સંપર્ક વડોદરાના ગોરવા વિસ્તારમાં રહેતી જ્યોતિબેન ગોસ્વામી સાથે થયો હતો. જ્યોતિબેન નિઝામપુરામાં 'નીલ ઓવરસીઝ' નામની કન્સલ્ટન્સી ચલાવે છે. જોકે, તેમણે પોતાની તબિયત ખરાબ હોવાનું બહાનું બતાવીને ગ્રાહકોને પોતાના ઘરે બોલાવી વિશ્વાસમાં લેવાનું શરૂ કર્યું હતું. એજન્ટે કેનેડાના બે વર્ષના વર્ક પરમિટ માટે કુલ 35 લાખ રૂપિયાનો ખર્ચ થશે અને માત્ર 8 મહિનામાં કામ પૂરું થઈ જશે તેવી ખાતરી આપી હતી.

VFS ઓફિસમાં ખુલી એજન્ટની પોલ : 

એજન્ટની વાતોમાં આવીને તૃપ્તિબેને તમામ જરૂરી ડોક્યુમેન્ટ્સ સુપરત કર્યા હતા અને ફાઈલ પ્રોસેસિંગના નામે અલગ-અલગ સમયે કુલ 6 લાખ રૂપિયા ચૂકવી દીધા હતા. વિશ્વાસઘાતની જાણ ત્યારે થઈ જ્યારે તૃપ્તિબેન પાસપોર્ટ જમા કરાવવા અમદાવાદની VFS ઓફિસ પહોંચ્યા. ત્યાં તપાસ કરતા માલૂમ પડ્યું કે કેનેડા વર્ક પરમિટ માટેની તેમની કોઈ પણ ફાઈલ ઓનલાઈન સિસ્ટમમાં રજિસ્ટર જ કરવામાં આવી નથી.

પોલીસે ગુનો નોંધી તપાસ હાથ ધરી : 

પોતાની સાથે છેતરપિંડી થઈ હોવાનો અહેસાસ થતા તૃપ્તિબેને એજન્ટ પાસે પૈસા પરત માંગ્યા હતા. પરંતુ એજન્ટે ગલ્લાતલ્લા કરવાનું શરૂ કર્યું હતું અને બાદમાં સંપર્ક તોડી નાખ્યો હતો. અંતે, ભોગ બનનાર મહિલાએ વડોદરાના ગોરવા પોલીસ સ્ટેશનમાં ફરિયાદ નોંધાવી છે. પોલીસે આરોપી જ્યોતિબેન વિરુદ્ધ ગુનો દાખલ કરીને આ કૌભાંડમાં અન્ય કોઈ શખ્સો સામેલ છે કે કેમ તે દિશામાં તપાસના ચક્રો ગતિમાન કર્યા છે.