પોલીસ સ્ટેશનમાં મહિલા ASI સાથે અણછાજતી ઘટના – PSIને બચાવવા તંત્રનો ખેલ!

ગુજરાતમાં અડધી રાત્રે મહિલાઓ સુરક્ષિત ફરી શકે છે એવા રાજનેતાઓ દ્વારા બણગા ફુંકવામાં આવે છે પરંતુ, હકીકત કંઇ અલગ છે અને તેમાં પણ પોલીસની આબરુ ન જાય તે માટે આ ઘટનાને પોલીસ અધિકારીઓએ સીફ્તપૂર્વક દબાવવા અથાગ પ્રયાસો કર્યા છે.

શહેરના પોશ વિસ્તારમાં આવેલા એક પોલીસ સ્ટેશનમાં હોળીનો ઉત્સવ યોજાયો હતો. આ ઉત્સવમાં PSIએ આવી મહિલા આસિસ્ટન્ટ સબ ઇન્સ્પેક્ટરને ધૂળેટી રમાડતા-રમાડતા શરીરે અડપલા કરી દીધા હતા. જોકે, આ મામલામાં પોલીસની આબરુ ન જાય તે માટે આ ઘટનાને દબાવી દેવામાં આવી હતી અને ખાનગી રીતે સિંગલ ઓર્ડરમાં PSIની બદલી કરી મામલો થાળે પાડી દેવાની રમત રમાઇ હોવાની ચર્ચા છે. જોકે, આ કિસ્સો પોલીસ બેડામાં ચર્ચાનો વિષય બન્યો છે કે, લોકોને ન્યાય અપાવનાર પોલીસ જ પોલીસ સ્ટેશનમાં ભોગ બને છે અને તેને ન્યાયની જગ્યાએ સાંત્વના મળે છે.

શહેરના પોશ વિસ્તાર અને રોડ પર આવેલા એક પોલીસ સ્ટેશનમાં ધૂળેટી રમવાનો કાર્યક્રમ યોજાયો હતો. આ જ પોલીસ સ્ટેશનની એક ચોકી પરથી એક PSI આવ્યા હતા. આ PSI તેમના ચોકીના પોલીસકર્મી સાથે આવ્યા અને આ મહિલા ASIના પોસ્ટીંગવાળી ઓફિસમાં ગયા હતા. ઓફિસમાં પહોંચી PSI તેમના હાથમાં કલર લઇ મહિલા ASIને રંગવા લાગ્યા હતા. તેની સાથે અન્ય મહિલા પોલીસકર્મી પણ હતી તેને PSIએ વધુ રંગ્યા ન હતા પરંતુ, આ મહિલા ASIને કલર વધુ લગાવ્યો હતો અને આ દરમિયાનમાં તેની સાથે શારીરીક અડપલા કર્યા હતા.

શારિરીક અડપલાં થતાં મહિલા ASIને પહેલા તો PSIના બદઇરાદનો ખ્યાલ આવ્યો ન હતો પરંતુ, બાદમાં મહિલા ASIને ખ્યાલ આવતા તેમણે આ અંગે ઉચ્ચ અધિકારીઓને ફરિયાદ કરી હતી. સ્થાનિક PIને વાતની ગંભીરતા સમજાઇ ગઇ હતી. આખરે સ્થાનિક અધિકારીઓએ કમાન સંભાળી અને આ ઘટનાની જાણ ઉચ્ચ અધિકારીઓને કરી હતી. આ ઘટના ગંભીર હોવાથી મામલો દબાવી દેવા માટે પ્રયાસો શરુ થયા હતા. આખરે આ મહિલા ASIએ કરેલા આક્ષેપો સાચા છે કે, ખોટા તે તપાસવા માટે ACP અને PIએ આ મહિલા અધિકારીના ચેમ્બરમાં લગાવેલા CCTV ફુટેજની ચકાસણી શરુ કરી હતી.

ત્રણ-ચાર દિવસ CCTVની વારંવાર ચકાસણી કર્યા બાદ આખરે PSIએ અડપલા કર્યા હોવાનું સ્પષ્ટ થયું હતું. તેથી, પોલીસ અધિકારીઓએ આ અંગે ગુનો દાખલ થાય તો પોલીસની આબરુ જાય અને પોલીસ સ્ટેશનમાં જ આવી ઘટના બની હોવાનું બહાર આવે તો સરકાર સુધી નોંધ લેવાય તે નક્કી હતું. જેથી આ અંગે ACPએ PSI, ભોગબનનાર મહિલા, અન્ય સ્ટાફના કર્મચારીઓ સહિતના અનેકના જવાબો લીધા હતા તેની સાથે CCTV ફુટેજની ચકાસણીનો રિપોર્ટ પણ મુક્યો હતો. આ અંગે યોગ્ય તપાસ કરી પોલીસ કમિશનરને ગુપ્ત રીપોર્ટ કર્યો હતો.

ત્યારે ઘણાં સવાલ ઉભા થઈ રહ્યા છે.

જો પોલીસ સ્ટેશનમાં જ મહિલા પોલીસ અસુરક્ષિત હોય, તો સામાન્ય મહિલાઓનું શું?

આ ઘટનાઓ કાયદા પરની સામાન્ય નાગરિકોની વિશ્વસનીયતાને હચમચાવી રહી છે.

આ ઘટના માત્ર એક મહિલા ASI ની લડત નથી, પણ સમગ્ર સિસ્ટમ સામે એક સવાલ છે.

"કાયદાનું રક્ષણ કરનાર જ કાયદાને હાથમાં લેશે, તો ન્યાય ક્યાંથી મળશે?

આ ઘટના ગંભીર હોવાથી મામલો આગળ વધુ ન વધે તે માટે PSIનો પાંચ જ દિવસમાં બદલીનો ઓર્ડર કરી દેવામાં આવ્યો હતો અને તેમને બદલી કરી સાઇડ પોસ્ટીંગમાં મુકી દેવામાં આવ્યા હતા. ઉલ્લેખનીય છે કે, જો પોલીસકર્મી સાથે જ આવી ઘટના પોલીસ સ્ટેશનમાં બને અને તેને દબાવી દેવામાં આવે અને તો સામાન્ય મહિલાઓનું શું એવી ચર્ચા પોલીસ બેડામાં છેલ્લા કેટલાય સમયથી થવા લાગી છે.