વિદ્યાર્થિની સહિત ત્રણની આત્મહત્યા, યુવકની 11માં માળેથી મોતની છલાંગ

સુરતમાં વિદ્યાર્થિની સહિત ત્રણ આત્મહત્યાની ચકચારી ઘટનાઓ સામે આવી છે. ઇન્ડિયન બેંકના આસિ. મેનેજરે એકતરફી પ્રેમમાં કેબલ વાયરથી ફાંસો ખાધો તો અન્ય એક યુવકે આર્થિક સંકડામણથી કંટાળીને 11માં માળે દાદરથી ઝંપલાવ્યું. આ સિવાય એક ધોરણ-8ની વિદ્યાર્થિનીના સતત મોબાઈલ વપરાશના કારણે કંટાળીને માતાએ મોબાઈલ ઝૂંટવી લેતા ગળેફાંસો ખાઈ લીધો. આપઘાતની આ ત્રણ ઘટનાઓએ પરિવારોને શોકની સાથે શંકા-કુશંકામાં ગરકાવ કરી દીધા છે.

આપઘાતની પહેલી ઘટનામાં સુરતમાં અડાજણના પવિત્ર રો-હાઉસના એક મકાનમાંથી ઇન્ડિયન બેંકના આસી.મેનેજરનો ગળે ફાંસો ખાધેલી હાલતમાં મૃતદેહ મળી આવ્યો હતો. ઘટનાની જાણ બાદ અડાજણ પોલીસ સ્થળ પર દોડી ગઈ હતી. મૃતદેહને નીચે ઉતારી પોસ્ટ મોર્ટમ માટે સિવિલ લઈ આવ્યા બાદ આગળની તપાસ હાથ ધરી હતી. પરિવાર દ્વારા મૃતકની સાથી પરણિત કર્મચારી અને તેના પતિ સામે શંકા વ્યક્ત કરી છે. આ સાથે જ ફોરેન્સિક પોસ્ટમોર્ટમની પણ માંગ કરવામાં આવી છે. આ સાથે જ અમને લખેલી સુસાઈડ નોટમાં પ્રેમિકાનો ઉલ્લેખ હોવાનું જણાવ્યું હતું.

યુવકે 11મા માળેથી પડતું મૂક્યું

 આપઘાતની બીજી ઘટનામાં સુરતના દિલ્હી ગેટ પાસેના ઇન્ફિનિટી ટાવરના 11માં માળેથી વેડરોડના યુવકે પડતું મૂકીને આપધાત કરી લીધો હતો. યુવકે આર્થિક સંકડામણને કારણે આપધાતનું અંતિમ પગલું ભર્યું હોવાનું બહાર આવ્યું હતું. હાલ તો આ સમગ્ર ઘટના CCTVમાં કેદ થઈ ગઈ છે. જેમાં આ યુવક 11 માં માળે દાદર પર આવે છે ત્યારબાદ આઠ સેકન્ડ રાહ જુએ છે અને ત્યારબાદ એકદમ દોડીને સીધો કૂદી જાય છે.

આઇ.ટી કંપનીમાં સફાઈ કામ કરીને પરીવારનું ગુજરાન ચલાવતો હતો મળતી માહિતી અનુસાર મૂળ ભાવનગર જિલ્લાના સિહોરના વતની અને હાલ વેડરોડ વિસ્તારમાં આવેલ વિજયનગર સોસાયટીમાં કિશોરભાઈ જેસિંગભાઈ મારું (ઉ.વ.42), પત્ની તેમજ દિવ્યાંગ પુત્ર સાથે રહેતા હતા. તે દિલ્હી ગેટ પાસે આવેલ ઇન્ફિનિટી ટાવરમાં આવેલ એક આઇ.ટી કંપનીમાં કોન્ટ્રાક્ટ બેઝ પર સફાઈ કામ કરીને પરીવારનું ગુજરાન ચલાવતો હતો તેમજ તેની પત્ની કતારગામ GIDC વિસ્તારમાં એક કંપનીમાં સફાઈ કામ કરીને પરીવારને આર્થિક રીતે મદદરૂપ થાય છે.

મોબાઈલ લઈ લેતાં દીકરીએ આપઘાતનો રસ્તો પકડ્યો

સુરતના પાંડેસરા વિસ્તારમાં આવિર્ભાવ સોસાયટીમાં શાકભાજી લઈ પરત ફરેલી માતાને માસૂમ દીકરી ફાંસો ખાધેલી હાલતમાં મળી આવતાં પરિવાર શોકમાં ગરકાવ થઈ ગયો હતો. મૃતક વર્ષા ધોરણ-8ની વિદ્યાર્થિની હતી. માતાએ મોબાઈલ લઈ લેતાં દીકરીએ આપઘાતનો રસ્તો પકડ્યો હોય એવી આશંકા વ્યક્ત કરાઈ રહી છે.