વેવાઇ-વેવાણની પ્રેમકહાણીથી સર્જાયો ખૂની ખેલ

વિરમગામમાં શિક્ષકની કાયેલી કૃર હત્યાના બનાવમાં ચોંકાવનારો ઘટસ્ફોટ થયો છે. શિક્ષકની હત્યા  કરનારા ત્રણેય હત્યારાઓને પોલીસે ઝડપી લીધા છે. પોલીસ તપાસમાં આ કૃર હત્યા  વેવાઈ-વેવાણ વચ્ચેના પ્રેમસબંધમાં બન્યો હોવાની ચોંકાવનારી માહિતી મળી છે.

વિરમગામમાં થયેલી શિક્ષકની હત્યામાં પોલીસે 3 આરોપીઓની ધરપકડ કરી છે. જેમાં કલાભાઈ ગોહિલ, અજીત ગોહિલ અને જેસંગ કટારીયાની ધરપકડ કરવામાં આવી હતી. કારમાં આવેલા આરોપીઓએ લાકડીના ફટકા મારીને શિક્ષકની હત્યા કરી હતી. જે ઘટના સીસીટીવીમાં કેદ થઇ ગઇ હતી. વેવાણ સાથે મૈત્રી કરારમાં રહેતા મૃતક શિક્ષક નરેશ ચાવડાની હત્યા બદલ વિરમગામ ટાઉન પોલીસે આરોપીઓની ધરપકડ કરીને વધુ કાર્યવાહી હાથ ધરી છે.

અમદાવાદનાં વિરમગામમાં શિક્ષકની હત્યા મામલે ગ્રામ્ય પોલીસે ખુલાસો કર્યો હતો. પોલીસે કહ્યું કે મૃતક નરેશ ચાવડા અને તેની પ્રેમિકા હર્ષાબેન વેવાઈ અને વેવાણ હતા. હર્ષાબેનના દીકરાની સગાઈ મૃતક નરેશની દીકરી સાથે 1 વર્ષ પહેલા થઈ હતી.બંનેને એકબીજા સાથે પ્રેમ થતા 8 મહિના પહેલા જ ઘરેથી ફરાર થઈ ગયા હતા અને વિરમગામમાં મૈત્રી કરાર કરીને રહેતા હતા. જે બાબતની જાણ યુવતીના પતિ અને તેના પરિવારજનોને થતા તેઓ દ્વારા હુમલો કરી શિક્ષકને મોતને ઘાટ ઉતાર્યો હતો. 

વિરમગામ હાઈવે પરથી શિક્ષકની લાશ મળી આવતા આસપાસનાં લોકો દ્વારા આ મામલે પોલીસને જાણ કરાઇ હતી.  પોલીસે તાત્કાલીક પહોંચી આગળની કાર્યવાહી હાથ ધરી હતી. તપાસમાં પોલીસને સીસીટીવી ફૂટેજ પણ મળી આવ્યા છે. જેમાં કેટલાક શખ્શો દ્વારા યુવકને ઢોર માર મારવામાં આવી રહ્યો હોવાનું જોવા મળ્યું હતું.જેથી આ સમગ્ર મામલે પોલીસ દ્વારા આરોપીઓને પકડવાની તજવીજ હાથ ધરવામાં આવી હતી. અને ગણતરીના દિવસોમાં પોલીસે આરોપીઓને ઝડપી પાડ્યા છે.