સુરતના મસાડમાં હળપતિ યુવકના પરિવારને તાલીબાની સજા

સુરત જિલ્લાના બારડોલી તાલુકાના મસાડ ગામમાં પ્રેમ પ્રકરણના કારણે ગામના લોકોએ તાલિબાની સજા આપવાની ભયાનક ઘટના બની છે. હળપતિ સમાજના એક યુવકે કોળી પટેલ સમાજની યુવતીને ભગાડી લઈ જતાં ગુસ્સે ભરાયેલા ગામ લોકોએ યુવકના પરિવારને લક્ષ્ય બનાવી તેમને ખુલ્લેઆમ તાલિબાની સજા આપી હતી. 

મળેલી વિગત અનુસાર યુવક અને યુવતી પ્રેમ સંબંધમાં હતા. તેમણે ભાગી જવાનો નિર્ણય લીધો. આ બાબતથી ગુસ્સે ભરાયેલા ગામના લોકોએ યુવકના પરિવારને જવાબદાર ઠેરવીને તેમને સજા આપવાનું નક્કી કર્યું. યુવકના મોટાભાઈ, બહેન અને માતાને ગામના ચોરે ઝાડ સાથે બાંધી દેવામાં આવ્યા અને ખુલ્લેઆમ માર મારવામાં આવ્યો. તમ્યારબાદ ગામમાં તેમનું સરઘસ કાઢીને ફેરવવામાં આવ્યા અને લોકોએ તેમને માર માર્યો હતો.

આ ઘટનાએ આખા વિસ્તારમાં ભારે આક્રોશ ફેલાવ્યો છે. ભોગ બનનાર પરિવારે તાત્કાલિક બારડોલી રૂરલ પોલીસ મથકે ફરિયાદ નોંધાવી હતી. ફરિયાદના આધારે પોલીસે ગંભીર કલમો હેઠળ ગુનો નોંધી તપાસ હાથ ધરી છે. જેમાં રાયોટિંગ, એટ્રોસિટી એક્ટ સહિતની કલમોનો સમાવેશ થાય છે.

પોલીસે ઘટનામાં સંડોવાયેલા 13 લોકોની ધરપકડ કરી છે. આ ધરપકડમાં ગામના અનેક યુવાનો અને અન્ય વ્યક્તિઓનો સમાવેશ થાય છે. બારડોલી રૂરલ પોલીસે આગળની વધુ તપાસ હાથ ધરી છે અને ઘટનાના મુખ્ય આરોપીઓ તેમજ બીજા સંડોવાયેલા લોકોને પકડવાની કાર્યવાહી ચાલુ રાખી છે.

આ ઘટના ગ્રામીણ વિસ્તારોમાં જાતિ આધારિત હિંસાનું ગંભીર ઉદાહરણ છે. પ્રેમ સંબંધના કારણે પરિવારને આવી ક્રૂર સજા આપવી એ માનવ અધિકારોનું ઘોર ઉલ્લંઘન છે. પોલીસે આ કેસને ખૂબ જ ગંભીરતાથી લઈને તપાસ ચાલુ રાખી છે જેથી આવા કૃત્યોને પ્રોત્સાહન ન મળે અને દોષિતોને કડક સજા મળે.

શું છે સમગ્ર ઘટના?

મસાડ ગામમાં રહેતા એક આદિવાસી સમાજના યુવકને કોળી-પટેલ સમાજની યુવતી સાથે પ્રેમ સંબંધ હતો. તાજેતરમાં આ પ્રેમી યુગલ ઘરેથી ક્યાંક ફરાર થઈ ગયું હતું. આ વાતની જાણ થતા જ યુવતીના પરિવારજનો ઉશ્કેરાઈ ગયા હતા. બદલો લેવાની ભાવના સાથે યુવતીના પરિવારના 6 થી 7 લોકો ઘાતક હથિયારો સાથે યુવકના ઘરે ત્રાટક્યા હતા. ભોગ બનનાર યુવક જેનિશના જણાવ્યા અનુસાર હુમલાખોરોએ કોઈ પણ વાત સાંભળ્યા વગર સીધા ઘરમાં ઘૂસીને હુમલો કર્યો હતો. તેમણે જેનિશ તેની માતા અને તેની બહેનને ઢોર માર માર્યો હતો. અત્યાચાર અહીં જ ન અટકતા હુમલાખોરો ત્રણેયને ખેંચી ગામના ચોરે લઈ ગયા હતા. ત્યાં તેમને ઝાડ અને થાંભલા સાથે દોરડાથી બાંધી દેવામાં આવ્યા હતા અને આખા ગામની વચ્ચે તેમને ફટકારવામાં આવ્યા હતા.

આદિવાસી સમાજમાં ભારે રોષ અને આંદોલનની ચીમકી

આદિવાસી સમાજના અગ્રણી ભીખુ હળપતિએ જણાવ્યું કે, નિર્દોષ મહિલાઓ અને યુવક પર અત્યાચાર ક્યારેય ચલાવી લેવામાં આવશે નહીં. તેમણે પોલીસ તંત્રને ચીમકી આપી છે કે આરોપીઓ સામે કડક કાર્યવાહી કરવામાં આવે. જો ન્યાય નહીં મળે તો બારડોલી પોલીસ સ્ટેશનનો ઘેરાવો કરવામાં આવશે. જરૂર પડ્યે બારડોલી બંધનું એલાન પણ આપવામાં આવશે.