સુરત: 2500 KM પીછો કરી સગીરાના અપહરણકર્તાને ઝડપ્યો

સુરતના સરથાણા વિસ્તારમાં ગત નવેમ્બર માસમાં બનેલી સગીરાના અપહરણ અને દુષ્કર્મની ઘટનાએ ભારે ચકચાર મચાવી હતી. 17 વર્ષીય સગીરાને પ્રેમજાળમાં ફસાવી તેનું અપહરણ કરનાર 26 વર્ષીય પરણિત આરોપી અરવિંદ પંચાસરાને પકડવા માટે સુરત પોલીસે ઓપરેશન 'તલાશ' હાથ ધર્યું હતું. આરોપી અત્યંત શાતિર હતો, તેણે પોલીસથી બચવા માટે પોતાના મોબાઈલના સિમકાર્ડ તોડી નાખ્યા હતા અને બોલેરો પીકઅપ ગાડીમાં સતત લોકેશન બદલી રહ્યો હતો.

પોલીસનું દિલધડક ઓપરેશન : 

PSI શીતલ ચૌધરી અને તેમની ટીમ માટે આ કેસ એક પડકાર સમાન હતો. ટેકનિકલ સર્વેલન્સ નિષ્ફળ જતાં પોલીસે સીડીઆર (Call Detail Record) નું ઊંડું વિશ્લેષણ કર્યું. તપાસમાં સામે આવ્યું કે આરોપીએ પોરબંદરમાં એક અજાણ્યા માછીમારના ફોનનો ઉપયોગ કર્યો હતો. આ કડીના આધારે પોલીસે સૌરાષ્ટ્રના પાંચ જિલ્લાઓ – બોટાદ, અમરેલી, ભાવનગર, રાજકોટ અને પોરબંદરમાં 2500 કિલોમીટરથી વધુનો પ્રવાસ ખેડ્યો હતો.

11 ફૂટ ઊંચી દીવાલ કૂદી આરોપીને ઝડપ્યો : 

આરોપી પોતાની ઓળખ છુપાવીને અલગ-અલગ જગ્યાએ મજૂરી કામ કરતો હતો. અંતે, ટેકનિકલ કડીઓ અને સઘન પૂછપરછના આધારે પોલીસને માંડવા ગામનું લોકેશન મળ્યું. રાત્રિના સમયે જ્યારે આરોપી ઊંઘતો હતો, ત્યારે પોલીસે તેને ચારે બાજુથી ઘેરી લીધો હતો. દરવાજો બંધ હોવાથી પોલીસ જવાન ચેતને 11 ફૂટ ઊંચી દીવાલ કૂદી અંદર પ્રવેશ કર્યો અને આરોપીને સગીરા સાથે ઝડપી પાડ્યો હતો.

સમાજમાં રોષ અને પોલીસની સરાહના : 

બે સંતાનોનો પિતા હોવા છતાં આ શખ્સે સગીરા સાથે અત્યાચાર ગુજાર્યો હતો. તેની વિકૃત માનસિકતા તેની ગાડી પર લખેલા લખાણથી પણ સાબિત થતી હતી. જ્યારે પોલીસ આરોપીને લઈને પરત ફરી ત્યારે પાટીદાર સમાજ અને સ્થાનિક લોકોએ પોલીસની કામગીરીને બિરદાવી હતી. 31 ડિસેમ્બરની રાત્રે જ્યારે દુનિયા ઉજવણી કરી રહી હતી, ત્યારે સુરત પોલીસની આ ટીમ દીકરીને ન્યાય અપાવવા ખેતરો અને વાડીઓમાં ભટકી રહી હતી.