Surat Teen Lovers Abscond From Tuition Class: સુરત શહેરમાં કિશોરાવસ્થાના આકર્ષણ અને પ્રેમસંબંધને લઈને પરિવારને ચિંતામાં મૂકી દેનારી ઘટના સામે આવી છે. ધોરણ 11માં અભ્યાસ કરતી 17 વર્ષીય સગીરા ટ્યુશનમાં સાથે ભણતા સગીર યુવક સાથે ઘરેથી નીકળી જતાં પરિવાર દોડતો થયો હતો. પિતાની ફરિયાદ બાદ પોલીસે ટેકનિકલ સર્વેલન્સ અને માનવ સૂત્રોની મદદથી તપાસ શરૂ કરી હતી. તપાસ દરમિયાન બંનેને વલસાડના ધરમપુર સ્થિત વિલ્સન હિલ્સમાંથી શોધી કાઢવામાં આવ્યા હતા. પોલીસ તપાસમાં સગીર યુવક સામે POCSO Act હેઠળ કાર્યવાહી કરવામાં આવી છે.
સ્કૂલે જવાનું કહી ઘરેથી નીકળી, બપોર સુધી પરત ન ફરતાં પરિવાર ચિંતિત સુરતના અશ્વિનીકુમાર રોડ વિસ્તારમાં રહેતી 17 વર્ષીય સગીરા ધોરણ 11માં અભ્યાસ કરતી હતી. 5 ઓગસ્ટના રોજ સવારે લગભગ 7 વાગ્યે તે પિતા પાસેથી રૂપિયા 20 લઈને નાના ભાઈ સાથે સ્કૂલે જવા માટે ઘરેથી નીકળી હતી. તેનો ભાઈ સ્કૂલે પહોંચી ગયો હતો, પરંતુ સગીરા બપોર સુધી ઘરે પરત ન ફરતાં પરિવારજનોએ તેની શોધખોળ શરૂ કરી હતી. પરિવાર દ્વારા આસપાસના વિસ્તારો ઉપરાંત સગા-સંબંધીઓ અને પરિચિતોમાં પણ તપાસ કરવામાં આવી હતી. જોકે, સગીરાનો કોઈ પત્તો ન મળતાં આખરે પિતાએ પોલીસનો સંપર્ક કર્યો અને અજાણ્યા શખ્સ વિરુદ્ધ અપહરણની ફરિયાદ નોંધાવી હતી.
ટ્યુશનમાં સાથે ભણતા સગીર સાથે પ્રેમસંબંધ, બંને ઘરેથી નીકળી ગયા પોલીસ તપાસ આગળ વધતાં સમગ્ર ઘટનામાં નવો વળાંક આવ્યો હતો. તપાસમાં સામે આવ્યું કે સગીરાને તેની સાથે ટ્યુશન ક્લાસમાં ભણતા અન્ય સગીર યુવક સાથે પ્રેમસંબંધ હતો. બંને ધોરણ 11માં અભ્યાસ કરતા હોવાનું સામે આવ્યું છે. પોલીસના જણાવ્યા અનુસાર, 5 ઓગસ્ટના રોજ બંને પોતપોતાના પરિવારજનોને સ્કૂલે જવાનું કહીને ઘરેથી નીકળ્યા હતા અને ત્યારબાદ એકબીજાને મળીને સુરતથી બહાર ગયા હતા. બંને વલસાડ જિલ્લાના ધરમપુર તાલુકામાં આવેલા વિલ્સન હિલ્સ પહોંચ્યા હતા.
ટેકનિકલ સર્વેલન્સથી પોલીસને મળ્યો મોટો ક્લૂ સગીરા ગુમ થવાની ફરિયાદ બાદ અશ્વિનીકુમાર પોલીસની ટીમે તપાસ તેજ કરી હતી. પોલીસે ટેકનિકલ સર્વેલન્સ, લોકેશન ટ્રેકિંગ અને માનવ સૂત્રોની મદદથી બંનેની હિલચાલ અંગે માહિતી એકત્રિત કરી હતી. તપાસ દરમિયાન બંનેનું લોકેશન ધરમપુરના વિલ્સન હિલ્સ તરફ હોવાનું સામે આવતાં પોલીસ ટીમે ત્યાં તપાસ હાથ ધરી હતી. અંતે પોલીસે સગીરા અને તેની સાથે રહેલા સગીર યુવકને શોધી કાઢ્યા હતા.
સગીર યુવક સામે POCSO હેઠળ કાર્યવાહી બંનેને સુરત લાવવામાં આવ્યા બાદ પોલીસ દ્વારા જરૂરી કાયદાકીય પ્રક્રિયા હાથ ધરવામાં આવી હતી. સગીરાનું મેડિકલ પરીક્ષણ પણ કરાવવામાં આવ્યું હતું. પોલીસ તપાસમાં બંને વચ્ચે શારીરિક સંબંધ હોવાની માહિતી સામે આવ્યા બાદ સગીર યુવક સામે POCSO Act અને BNSની લાગુ પડતી કલમો હેઠળ ગુનો નોંધવામાં આવ્યો હોવાનું જાણવા મળ્યું છે.
વાલીઓ માટે ચેતવણીરૂપ કિસ્સો આ ઘટના કિશોરાવસ્થામાં થતા આકર્ષણ, સોશિયલ કનેક્શન અને મિત્રતાને લઈને વાલીઓ માટે પણ ચેતવણીરૂપ બની છે. બાળકોની ગતિવિધિઓ પર નજર રાખવાની સાથે તેમની સાથે ખુલ્લા અને મિત્રતાપૂર્ણ સંવાદ જાળવવો પણ મહત્વપૂર્ણ છે. સ્કૂલ અને ટ્યુશન બાદ બાળકો કોની સાથે સંપર્કમાં રહે છે અને તેમની દૈનિક ગતિવિધિઓમાં કોઈ અચાનક ફેરફાર થયો છે કે નહીં, તેના પર વાલીઓએ સજાગ રહેવાની જરૂર છે.

પછી અચાનક વિલ્સન હિલ્સ પહોંચી! પોલીસ તપાસમાં સામે આવ્યું એવું સત્ય કે પરિવાર પણ ચોંકી ગયો

August 17, 2026 | 18:34 IST