&nbsp;5,613 ફોન હેક અને ₹125 કરોડની ઠગાઈ
સુરત: ડિજિટલ ફ્રોડ અને APK ફાઇલના નામે ચાલી રહેલા સાયબર ક્રાઇમ સામે સુરત સાયબર ક્રાઇમ સેલે મોટી કાર્યવાહી કરી છે. પોલીસે આશરે 2,456 કિલોમીટરનો પ્રવાસ ખેડીને પટના, બિહારની એક હોટલમાંથી ચાર આરોપીઓની ધરપકડ કરી છે. તપાસમાં સામે આવ્યું છે કે આરોપીઓએ દેશભરમાં 336 જેટલી બોગસ APK ફાઇલોનો ઉપયોગ કરીને હજારો મોબાઇલ ફોનમાં ગેરકાયદેસર Access મેળવ્યો હતો.&nbsp;પોલીસના જણાવ્યા મુજબ, આ ગેંગે 5,613 લોકોના મોબાઇલ ફોન હેક કર્યા અને ત્યારબાદ તેમના બેંક એકાઉન્ટમાંથી રૂપિયા ટ્રાન્સફર કરીને ₹125.39 કરોડથી વધુની છેતરપિંડી કરી હોવાનો ખુલાસો થયો છે. આ કેસે ઓનલાઈન બેંકિંગ અને મોબાઇલ સિક્યોરિટી સામે ગંભીર સવાલો ઉભા કર્યા છે.
બેંક, RTO અને સરકારી યોજનાઓના નામે APK ફ્રોડ
આરોપીઓ લોકોને વિશ્વાસમાં લેવા માટે બેંક, RTO ચલણ અને સરકારી યોજનાઓના નામે બનાવટી APK ફાઇલો મોકલતા હતા. મોબાઇલમાં આ APK ઇન્સ્ટોલ કરાવ્યા બાદ આરોપીઓને ફોનનો Access મળી જતો હતો. ત્યારબાદ મોબાઇલમાં રહેલી મહત્વપૂર્ણ માહિતીનો ઉપયોગ કરીને બેંક ખાતામાંથી નાણાં ટ્રાન્સફર કરવામાં આવતા હતા.&nbsp;સાયબર ઠગોની આ મોડસ ઓપરેન્ડીથી અનેક લોકો મોટી રકમ ગુમાવી ચૂક્યા હોવાનું તપાસમાં સામે આવ્યું છે.
પટનાની હોટલમાંથી ચાર આરોપી ઝડપાયા
સુરત સાયબર ક્રાઇમની ટીમે ટેકનિકલ સર્વેલન્સ અને તપાસના આધારે આરોપીઓનું લોકેશન ટ્રેસ કર્યું હતું. ત્યારબાદ ટીમે લાંબો પ્રવાસ ખેડી પટના પહોંચી હોટલમાંથી ચાર આરોપીઓને ઝડપી પાડ્યા.&nbsp;પકડાયેલા આરોપીઓમાં જહીલ અંસારી ઉર્ફે ચાંદ, રાજનકુમાર, આદિત્યરાજ અને સમીર ઉર્ફે શક્તિમાનનો સમાવેશ થાય છે.
અગાઉ મુખ્ય APK ડેવલપર પણ ઝડપાયો હતો
આ કેસમાં પોલીસે અગાઉ રોહિત નામના મુખ્ય ડેવલપરની કાનપુરથી ધરપકડ કરી હતી. તપાસમાં રોહિતે કુલ 121 APK ફાઇલો બનાવી વેચી હોવાનો ખુલાસો થયો હતો. હવે ચાર આરોપીઓની ધરપકડ બાદ આ સાયબર ફ્રોડ નેટવર્ક અંગે વધુ વિગતો બહાર આવવાની શક્યતા છે.&nbsp;પોલીસે આરોપીઓ પાસેથી 6 મોબાઇલ ફોન અને 1 લેપટોપ પણ જપ્ત કર્યા છે. સમગ્ર નેટવર્કમાં અન્ય લોકોની સંડોવણી છે કે નહીં તે અંગે સાયબર ક્રાઇમ સેલે વધુ તપાસ હાથ ધરી છે.

336 ફેક APKથી 5,613 ફોન હેક, ₹125 કરોડથી વધુની છેતરપિંડી

August 11, 2026 | 16:25 IST