સુરતના બિલ્ડર પ્રવિણ ઘેલાણીનો આપઘાતનો પ્રયાસ

સુરત શહેરના રિયલ એસ્ટેટ જગતમાં આઘાતજનક સમાચાર સામે આવ્યા છે. સુરતના જાણીતા બિલ્ડરે તેમના નિવાસસ્થાને લાયસન્સ વાળી રિવોલ્વર વડે ગોળી મારીને આપઘાત કરવાનો પ્રયાસ કર્યો હતો. હાલમાં બિલ્ડરને સારવાર માટે ખાનગી હોસ્પિટલમાં ખસેડવામાં આવ્યા છે. પોલીસે બિલ્ડરની રિવોલ્વર કબજે કરી વધુ તપાસ શરૂ કરી છે.

સુરતના પોશ ગણાતા સિટીલાઇટ વિસ્તારમાં ઘટના બની છે. બિલ્ડરે અગમ્ય કારણોસર મોડી રાત્રે પોતાની લાયસન્સવાળી રિવોલ્વરથી એક રાઉન્ડ ફાયરિંગ કરી પોતાને ગોળી મારી હતી. ગોળીબારનો અવાજ સાંભળી પરિવારજનો દોડી આવ્યા હતા અને લોહીલુહાણ હાલતમાં તેમને તાત્કાલિક સારવાર માટે ખાનગી હોસ્પિટલમાં ખસેડવામાં આવ્યા હતા. હાલમાં તેમની સઘન સારવાર ચાલી રહી છે.

બિલ્ડરની પુત્રીના 5 ફેબ્રુઆરીએ લગ્ન હોવાથી ઘરમાં તડામાર તૈયારીઓ ચાલી રહી હતી. મહેમાનોની અવરજવર અને ખુશીઓના માહોલ વચ્ચે પરિવાર અને બિલ્ડર આલમમાં સ્તબ્ધતા છવાઈ ગઈ છે. ઘર કંકાસના કારણે આ પગલુ ભર્યું હોવાની આશંકા છે. જોકે સત્તાવાર કારણ હજુ સુધી જાણી શકાયું નથી.

હાલમાં બિલ્ડરની સ્થિતિ અત્યંત નાજુક હોવાનું જાણવા મળ્યું છે. ખાનગી હોસ્પિટલમાં વેન્ટિલેટર પર રાખવામાં આવ્યા છે. તબીબોના જણાવ્યા અનુસાર તેમની હાલત ખૂબ જ ગંભીર છે. વધુ સારવાર માટે તેમને સુરતથી એર એમ્બ્યુલન્સ (વિમાન) મારફતે મુંબઈ લઈ જવાય તેવી શક્યતા છે.

ઘટનાની જાણ થતાં ઉમરા પોલીસ ઘટનાસ્થળે પહોંચી ગઈ છે. પોલીસે ગુનો નોંધીને રિવોલ્વર કબજે કરી આત્મહત્યાના પ્રયાસ પાછળનું કારણ જાણવા માટે પરિવારના સભ્યોની પૂછપરછ શરૂ કરી છે. આ સમાચારથી સુરતની બિલ્ડર લોબીમાં ચિંતાની લાગણી પ્રસરી ગઈ છે.