સુરતમાં સમાજ ફરી શર્મસાર, 4 વર્ષની બાળકી પર દુષ્કર્મ

સુરતમાં ફરી સમાજ શર્મસાર થાય તેવી ઘટના બની છે જ્યાં એક નરાધમ બાળકીને ઉઠાવીને લઇ ગયા બાદ તેની સાથે દુષ્કર્મ કર્યું હતું. બાળકીએ રડતાં રડતાં ઘેર આવીને વાત કર્યા બાદ પોલીસને જાણ કરાતા પોલીસે સીસી ટીવીના આધારે આરોપીની ઓળખ કરીને આરોપીને ઝડપી પાડ્યો છે. આ નરાધમ બાળકીને ઉઠાવીને લઇને જઇ રહ્યો હોવાના સીસી ટીવી ફૂટેજ પોલીસને મળ્યા હતા. 

સુરતના  પલસાણા તાલુકાના એક ગામે દુષ્કર્મ ની ઘટના બની છે જેનાથી સૌ હચમચી ગયા છે. એક નરાધમે 4 વર્ષની માસૂમ બાળકી સાથે દુષ્કર્મ કર્યું હતું. આ બાળકીના માતા પિતા નોકરી ગયા હતા અને ઘેર તેના દાદા દાદી એકલા હતા ત્યારે આ બાળકી પોતાના ઘરના આંગણામાં રમી રહી હતી.

તેનો ફાયદો ઉઠાવીને 45 વર્ષનો એક આધેડ બાળકીને ઉઠાવીને ચાલવા માડ્યો હતો. તે બાળકીને લઇને પોતાના રુમ પર ગયો હતો અને ત્યાં તેની સાથે દુષ્કર્મ આચર્યું હતું. બાળકીને પોતાના હવસની શિકાર બનાવીને તેણે છોડી દીધી હતી.

બાળકીને લોહીલુહાણ થઇ ગઇ હતી અને તેને અસહ્ય પીડા થઇ રહી હતી. બાળકી રડતા રડતા ઘરે આવી ત્યારે બાળકીના ગુપ્ત ભાગમાંથી લોહી વહી રહ્યું હતું. ઘટનાની જાણ થતાં કડોદરા પોલીસ ,એલ સી બી , એસ ઓજી ,સહિત પોલીસ કાફલો ઘટના સ્થળે પહોંચ્યો હતો અને ઉંડી તપાસ શરુ કરી હતી.

પોલીસે તમામ સીસી ટીવી ચકાસતાં એક નરાધમ બાળકીને લઈ જતા સીસીટીવીમાં જોવા મળ્યો હતો જેના આધારે પોલીસે તપાસ કરીને એક શંકાસ્પદ શખ્સને ઝડપી લીધો હતો.