ગુજરાતના સરહદી જિલ્લા કચ્છમાં સ્ટેટ મોનીટરીંગ સેલ (SMC) દ્વારા દારૂના દૂષણને નાબૂદ કરવા માટે એક પછી એક મોટા ઓપરેશન હાથ ધરવામાં આવી રહ્યા છે. પશ્ચિમ કચ્છ બાદ હવે પૂર્વ કચ્છમાં પણ એસએમસીની ટીમે લાખોની કિંમતનો વિદેશી દારૂ ઝડપી પાડીને બુટલેગરોની કમર તોડી નાખી છે. છેલ્લા બે દિવસમાં જ જિલ્લામાંથી અંદાજે 5 કરોડ રૂપિયાનો મુદ્દામાલ જપ્ત કરવામાં આવ્યો છે, જેના કારણે સ્થાનિક પોલીસ તંત્રમાં પણ દોડધામ મચી ગઈ છે.
ભચાઉના વોંધમાં 1.30 કરોડનો મુદ્દામાલ જપ્ત :&nbsp;
પૂર્વ કચ્છના ભચાઉ નજીક આવેલા વોંધ વિસ્તારમાં SMC એ ગુપ્ત બાતમીના આધારે દરોડો પાડ્યો હતો. આ કાર્યવાહી દરમિયાન કુલ 7080 બોટલ વિદેશી દારૂ મળી આવ્યો હતો. દારૂના જથ્થા સાથે વાહનો અને અન્ય સામગ્રી મળીને કુલ 1 કરોડ 30 લાખ રૂપિયાનો મુદ્દામાલ પોલીસે કબજે કર્યો છે. આ કેસમાં કુખ્યાત બુટલેગર અશોકસિંહ જાડેજા ઉર્ફે મામા સહિત કુલ સાત વ્યક્તિઓ સામે ગુનો નોંધીને કાયદેસરની તપાસ શરૂ કરવામાં આવી છે.
પશ્ચિમ કચ્છમાં 4 કરોડનો શરાબ પકડાયો :&nbsp;
એસએમસીની ટીમે પશ્ચિમ કચ્છમાં પણ રેડ પાડીને અંદાજે 2500થી વધુ વિદેશી શરાબની પેટીઓ ઝડપી પાડી હતી. આ જથ્થાની કિંમત આશરે 4 કરોડ રૂપિયાથી વધુ આંકવામાં આવી રહી છે. આટલી મોટી માત્રામાં દારૂનો જથ્થો પકડાતા સ્થાનિક પોલીસની કામગીરી સામે પણ સવાલો ઉભા થયા હતા. આ ઓપરેશન એટલી ગુપ્તતાથી કરવામાં આવ્યું હતું કે સ્થાનિક પોલીસને પણ તેની જાણ છેલ્લી ઘડી સુધી થઈ ન હતી.
પોલીસ વડા દ્વારા બદલીઓનો દોર શરૂ :&nbsp;
કરોડોનો દારૂ પકડાતા જ પૂર્વ કચ્છ પોલીસ વડા સાગર બાગમારે શિસ્તભંગ અને વહીવટી પારદર્શિતા લાવવા માટે મોટા પાયે આંતરિક બદલીઓ કરી છે. જિલ્લામાં કુલ 15 પોલીસ ઇન્સ્પેક્ટર (PI) અને 4 પોલીસ સબ ઇન્સ્પેક્ટર (PSI) ની બદલીના ઓર્ડર કરવામાં આવ્યા છે. ખાસ કરીને લોકલ ક્રાઈમ બ્રાન્ચ (LCB) અને સ્પેશિયલ ઓપરેશન ગ્રુપ (SOG) જેવી મહત્વની શાખાઓના વડાઓની પણ બદલી કરી દેવામાં આવતા પોલીસ બેડામાં ભારે ચર્ચા જાગી છે.
બુટલેગરોમાં ફફડાટ :&nbsp;
સ્ટેટ મોનીટરીંગ સેલની આક્રમક કામગીરીને પગલે કચ્છ જિલ્લાના બુટલેગરોમાં ભારે ફફડાટ ફેલાયો છે. સરહદી વિસ્તાર હોવાને કારણે અહીં દારૂ ઘુસાડવાના પ્રયાસો સતત થતા રહે છે, પરંતુ એસએમસીની સક્રિયતાએ હવે મોટા પાયે ચાલતા આ ગેરકાયદેસર વ્યવસાય પર લગામ લગાવી દીધી છે. આવનારા દિવસોમાં પણ આ પ્રકારની ડ્રાઈવ ચાલુ રહેશે તેવા સંકેતો મળી રહ્યા છે.

કચ્છ દારૂ દરોડા SMC કાર્યવાહી

પૂર્વ અને પશ્ચિમ કચ્છમાં બુટલેગરો પર પોલીસની ત્રાટકતી તલવાર

February 23, 2026 | 18:42 IST