આડા સંબંધમાં પતિની હત્યાનું ચોંકાવનારું કાવતરૂ!

Horrific conspiracy to kill husband in love affair: ઉત્તર પ્રદેશના મેરઠમાં સ્કૂલ સંચાલકના રહસ્યમય મોતના કેસમાં પોલીસે ગંભીર ખુલાસો કર્યો છે. તપાસમાં ઘટસ્ફોટ થયો છે કે, મૃતકની પત્નીએ પોતાના પ્રેમી સાથે મળીને પતિને રસ્તામાંથી હટાવવા માટે પૂર્વ આયોજન સાથે હત્યાનું કાવતરું ઘડ્યું હતું. આ કેસમાં પત્ની, તેના પ્રેમી અને સાપ મોકલનાર બે મદારીઓ સહિત 4 આરોપીઓની ધરપકડ કરવામાં આવી છે.

આરોપી પત્નીએ પ્રેમી સ્કૂલ વાનના ડ્રાઈવર સાથે મળી સ્કૂલ સંચાલક પતિનો કાંટો કાઢવા માટે હત્યાનું કાવતરું ઘડ્યું હતું. પહેલા દૂધમાં ઊંઘની ગોળીઓનો ઓવરડોઝ આપ્યા બાદ ઝેરી સાપ બેડ પર છોડીને પતિને કરડાવ્યો હતો.

સ્કૂલ સંચાલક પતિનો મૃતદેહ ભાડાના મકાનના રૂમમાં બેડ પર મળ્યો હતો. પત્ની અને પરિવારના લોકો મૃતદેહ લઈને હોસ્પિટલ પહોંચતાં ડોકટરોએ મૃત જાહેર કર્યા હતા. ઘટના બાદ પરિવારજનોએ પત્ની પર સાપ કરડાવીને હત્યા કરવાનો આરોપ લગાવ્યો. પોલીસે પત્નીની પૂછપરછ બાદ કોલ ડિટેઈલ તપાસતાં સ્કૂલ વાનના ડ્રાઈવર સાથે થયેલી વધુ વાતચીત પર શંકા ગઈ હતી. ડ્રાઈવરની આકરી પૂછપરછ કરતાં તેણે હત્યાના કાવતરા અંગે વટાણા વેરી નાખ્યાં.  

પત્નીએ પ્રાથમિક પૂછપરછમાં જણાવ્યું કે, તે રાત્રે લગભગ 2 વાગ્યે તેના 6 વર્ષના પુત્રને લઈને બીજા રૂમમાં સૂવા ગઈ હતી. સવારે રૂમમાં પહોંચી ત્યારે પતિ બેડ પર ચાદર ઓઢીને સૂતાં હતા. ઘણી વખત અવાજ કરવા છતાં કોઈ હલચલ ન થતાં પત્નીએ ચાદર હટાવી હતી. ત્યાં એક સાપ જોઈને તે ચીસ પાડી ઉઠી હતી. તપાસમાં જમણા પગ પર સાપ કરડવાના નિશાન મળ્યા હતા. મૃતકના પરિવારજનોએ પત્ની પર ષડયંત્ર રચવાનો આરોપ લગાવી પોલીસમાં ફરિયાદ કરી હતી. મેરઠની હસ્તિનાપુર પોલીસે ગુનો નોંધી વધુ તપાસ હાથ ધરી છે. 

સમગ્ર મામલો શું છે?
મૃતક અતુલ કુમાર બહસુમા પોલીસ સ્ટેશન વિસ્તારના ભંડોરા ગામના રહેવાસી હતા. 4 કિલોમીટર દૂર હસ્તિનાપુરમાં પત્ની દામિની અને 6 વર્ષના પુત્ર સાથે ભાડાના મકાનમાં રહેતા હતા. ચાર વર્ષથી અતુલ અને દામિની ઘરથી 1 કિલોમીટર દૂર કૃષ્ણ કિડ્સ પ્લે સ્કૂલ ચલાવતા હતા. નર્સરીથી ધોરણ 5 સુધીની સ્કૂલ ચલાવતાં હતા. તેમાં લગભગ 150 બાળકો ભણી રહ્યાં છે.

અતુલ ત્રણ ભાઈઓમાં સૌથી નાનો હતો. પિતા અજબસિંહ ગામમાં ખેતી કરે છે. માતા સંતોષ દેવી ગૃહિણી છે. મોટાભાઈ કુલદીપ સેનામાંથી નિવૃત્ત છે. પત્ની, બાળકો સાથે બહસુમામાં રહે છે. બીજા નંબરના ભાઈ મનદીપે 4 વર્ષ પહેલા ફાંસો ખાઈને આત્મહત્યા કરી હતી. 7 વર્ષ પહેલા અતુલ અને દામિનીએ લવ મેરેજ કર્યા હતા.

પરિવારજનોએ જણાવ્યું કે, અતુલ પ્લે સ્કૂલ ચલાવતા પહેલા એક કમ્પ્યુટર કંપનીમાં પ્રાઇવેટ નોકરી કરતો હતો. લગ્ન પછી પત્ની સાથે મળીને સ્કૂલ ચલાવી રહ્યા હતા. સવારે 7 વાગ્યે દામિનીએ ફોન કરીને જાણકારી આપી. અમને પહેલાંથી જ વહુ પર શંકા હતી. પોલીસમાં ફરિયાદ કરતાં પોલીસ અને ફોરેન્સિક ટીમ ઘટનાસ્થળે પહોંચી પુરાવા ભેગા કર્યા હતાં.

દૂધમાં ઊંઘની ગોળીઓ આપી બેડ પર સાપ છોડી દીધો
તપાસ દરમિયાન પોલીસે દામિનીના મોબાઈલની કોલ ડિટેલ અને ટેકનિકલ પુરાવાઓની તપાસ કરી. જેમાં સ્કૂલ વાનના ડ્રાઈવર તુષાર ઉર્ફે નિક્કી સાથે તેની સતત વાતચીત થતી હોવાનું સામે આવ્યું. પોલીસે તુષારની કડક પૂછપરછ કરતા તેણે દામિની સાથે પ્રેમ સંબંધ હોવાનો સ્વીકાર કર્યો. બંનેએ અતુલની હત્યાનું કાવતરું ઘડ્યું હતું.

કાવતરા મુજબ રાત્રે અતુલને દૂધમાં ઊંઘની ગોળીઓનો ઓવરડોઝ આપવામાં આવ્યો. જેનાથી તે ગાઢ નિંદ્રામાં સરી પડ્યો. બાદમાં સોનુ અને ઉદય નામના બે મદારીઓની મદદથી ઝેરી સાપને રૂમમાં લાવી તેના બેડ પર છોડી દેવામાં આવ્યો. સાપે અતુલને ડંખ મારતાં તેનું મોત થયું. આ ઉપરાંત 20 દિવસ પહેલા તુષારે અતુલને અર્ટિગા કારથી ટક્કર મારીને મારવાનો પ્રયાસ કર્યો હતો. પરંતુ હેલ્મેટ પહેરેલો હોવાથી તે બચી ગયો હતો.

ફોનમાં મળેલા પુરાવાએ રહસ્ય ખોલ્યું
પોલીસે જણાવ્યું કે પ્રાથમિક તપાસમાં ઘટના શંકાસ્પદ લાગી. કારણકે સાપની વાત અને ઘટનાસ્થળની પરિસ્થિતિઓ સામાન્ય નહોતી. ટેકનિકલ સર્વેલન્સ, મોબાઈલ ફોનમાંથી મળેલા પુરાવા અને પૂછપરછના આધારે સમગ્ર કાવતરાનો પર્દાફાશ થયો. આરોપીઓના મોબાઈલમાંથી સાપનો ફોટો પણ મળ્યો હતો. જપ્ત કરાયેલા સાપને પરીક્ષણ માટે મોકલવામાં આવ્યો હતો.

પૈસાની લાલચ આપીને સાપની વ્યવસ્થા કરી
આરોપી પત્ની પોલીસને જાણ કરતાં પહેલા જ હોસ્પિટલ લઈ ગઈ હતી. સાપને લઈને ઘણી બધી બાબતો મેળ ખાતી ન હતી. સાપ ઘરમાં કેવી રીતે આવી શકે? આ ક્રમમાં ટેકનિકલ સર્વેલન્સ કરવામાં આવ્યું. મૃતક અતુલ અને પત્ની દામિની મળીને એક કૃષ્ણ કિડ્સ પબ્લિક સ્કૂલ ચલાવતા હતા. બંનેએ 2019માં પ્રેમ લગ્ન કર્યા હતા.

વીમાના પૈસા લઈ લગ્ન કરવાની તૈયારી કરી હતી
તપાસમાં દામિનીનો સ્કૂલ વાનના ડ્રાઈવર તુષાર સાથે પ્રેમ સંબંધ હોવાનું જાણવા મળ્યું. બંને વચ્ચે સતત વાતચીત થતી હતી. પોલીસ તપાસમાં એ પણ સામે આવ્યું કે અતુલના નામે લગભગ 20 લાખ રૂપિયાનો વીમો હતો. આરોપીઓએ વીમાની રકમ મળ્યા પછી મદદ કરનાર મદારીને પાંચ લાખ રૂપિયા આપવાનું વચન આપ્યું હતું.

તુષારનો મોબાઈલ અને અન્ય વસ્તુઓની તપાસ કરતાં સમયે મોબાઈલમાં એક ડબ્બામાં બંધ સાપનો ફોટો પણ મળ્યો. તેના આધારે જ્યારે પૂછપરછ કરવામાં આવી ત્યારે આરોપી પત્નીએ જણાવ્યું કે તેણે બે મદારીઓ પાસેથી સાપ ખરીદ્યો હતો. તુષારે જણાવ્યું કે, દામિનીએ મળીને પ્લાન ઘડ્યો હતો કે પતિને માર્યા પછી વીમાના પૈસા લઈ લેશે. પછી હું પત્નીથી છૂટાછેડા લઈ લઈશ અને લગ્ન કરી લઈશું.