અમદાવાદમાં 50 લાખ રૂપિયાની લૂંટનું કાવતરું નિષ્ફળ

અમદાવાદમાં રૂપિયા 50 લાખની લૂંટ થાય તે પહેલાં મહેસાણા LCB પોલીસે કાવતરૂ નિષ્ફળ બનાવ્યું છે.  અમદાવાદના કાલુપુર રેલવે સ્ટેશન ખાતે 50 લાખ રૂપિયાની ધાડ પાડવાના પૂર્વ આયોજિત કાવતરાનો પોલીસે પર્દાફાશ કર્યો છે. આ કાવતરામાં સામેલ 8 શખ્સો પૈકી 4 શખ્સોને હથિયારો અને ચોરી કરેલાં વાહન સાથે ઝડપી પાડ્યા છે. જ્યારે અન્ય ચાર શખ્સોને વોન્ટેડ જાહેર કરી શોધખોળ હાથ ધરી છે. વિસનગર તાલુકા પોલીસ સ્ટેશનમાં ફરિયાદ દાખલ કરીને વધુ તપાસ હાથ ધરી છે.

મહેસાણા LCB પોલીસ રાત્રે પેટ્રોલિંગ હતી ત્યારે બાતમી મળી હતી કે, ઊંઝા હાઈવે ઉપર ભાન્ડુ ગામના ગેટ નજીક 4 શખ્સો એક મોટરસાઇકલ સાથે હાજર છે. તેઓ અન્ય સાથીદારો સાથે મળીને અમદાવાદના કાલુપુર રેલવે સ્ટેશન પર આંગડિયા લૂંટ કરવાનો પ્લાન બનાવી રહ્યા છે.લૂંટ કરવા માટે તેઓ પિસ્તોલ પણ લાવ્યા છે.

બાતમીના આધારે પોલીસ ભાન્ડુ ગામના ગેટ નજીક સર્વિસ રોડ પર પહોંચી હતી. પોલીસને જોઈને ચારેય શખ્સોએ ભાગવાની કોશિશ કરી હતી. જો કે, પોલીસે તેમને તે જ સ્થિતિમાં ઝડપી પાડ્યા હતા. ઠાકુર ગણપત રામકરણ (ભાન્ડુ, વિસનગર), રાધેશ્યામ મોતીરામ બાવરી (રહે. પાલીયાસ, રાજસ્થાન), જીતેન્દ્ર બોડારામ બાવરી (રહે. મંડાવર રોડ, રાજસ્થાન) અને ઠાકોર અલ્પેશ જીતાજી (વડુ, વિસનગર)ને ઝડપી લીધા હતા. 

તેમની પૂછપરછ કરતાં કબૂલાત કરી કે, તેમની સાથે અન્ય 4 સાથીદારો, ઠાકોર આકાશજી રમેશજી (પાલજ), આશિષ જાલમજી ઠાકોર (પાલજ), મુન્નો બાવરી (બેલ્લારા, રાજસ્થાન) અને બનવારી બાવરી (રાજસ્થાન) પણ લૂંટના પ્લાનમાં સામેલ હતા. આઠેય શખ્સોએ રાત્રે ભાન્ડુ ગામે ભેગા મળી લૂંટ અંગેનો પ્લાન બનાવ્યો હતો.

પોલીસે આરોપીઓ પાસેથી બાઈક જપ્ત કર્યુ હતું. જેના પર ખોટી નંબર પ્લેટ લગાવેલી હતી. બાઈકના એન્જિન અને ચેસીસ નંબરના આધારે તપાસ કરતાં તેનો રજિસ્ટ્રેશન નંબર અન્ય હોવાનું અને બાઈક અગાઉ ઉનાવા ખાતેથી ચોરી થયું હોવાનું બહાર આવ્યું હતું. મુખ્ય આરોપી ઠાકુર ગણપત રામકરણની કબૂલાત મુજબ તેના ભાડાના મકાનમાં ઘઉં ભરેલી પ્લાસ્ટિકની થેલીમાં સંતાડેલી બે દેશી બનાવટની પિસ્તોલ અને 9 કારતૂસ મળી આવ્યા હતા. 

વોન્ટેડ આરોપી ઠાકોર આકાશજી અને આશિષ ઠાકોર અગાઉ આંગડીયામાં કામ કરી ચુક્યા હતાં. બંને વોન્ટેડ આરોપીઓને ખબર હતી કે સુરતથી એક આંગડિયાકર્મી રૂપિયા લઈ ટ્રેન મારફતે અમદાવાદ કાલુપુર સ્ટેશન આવવાનો છે. આ બાબતે લૂંટ કરનાર ગેંગ અગાઉ એક બે વખત સ્ટેશન ખાતે રેકી પણ કરી આવી છે.

લૂંટ કરવા માટે વોન્ટેડ આરોપીઓ 10 વર્ષથી ભાડું ગામમાં રહેતા અને ટાઇલ્સ ફિટીંગનું કામ કરતા ઠાકુર ગણપત સાથે મુલાકાત કરી સમગ્ર લુંટ કરવા માટે પ્લાન બનાવ્યો હતો. જેમાં લૂંટની ઘટનાને અંજામ આપવા માણસોની અને હથિયારની જરૂર પડતા વોન્ટેડ આરોપીઓએ ગણપત ઠાકુરને જાણ કરતા ગણપત ઠાકુરે રાજસ્થાનના રાધેશ્યામ બાવરી, જીતેન્દ્ર બાવરી, ઠાકોર અલ્પેશજી, મુન્નો બાવરી, બનવારી બાવરીને લૂંટ કરવા બોલાવ્યા હતા.

આરોપીઓએ રેકી કર્યા પ્રમાણે સુરતથી અમદાવાદ રેલવે સ્ટેશન રૂપિયા લઈ આવનારો આંગડિયાકર્મી વહેલી સવારે ચાર વાગ્યે જેવો સ્ટેશન બહાર આવે અને કોઈ ગાડીમાં બેસે ત્યારબાદ લૂંટારૂઓ પોતાના વાહન આડા કરી બંદૂક વડે ફાયરીગ કરી આંગડિયા પેઢીના કર્મીને લૂંટવાનો પ્લાન ઘડ્યો હતો.

રાધેશ્યામ મોતીરામ બાવરીએ ગેરકાયદે હથિયારો અજમેરથી આગળ કેકડી ગામેથી એક અજાણ્યા શખ્સ પાસેથી લાવ્યા હોવાનું જણાવ્યું હતું. આરોપી રાધેશ્યામ મોતીરામ બાવરી અંગે રાજસ્થાનના પાદુકલા પોલીસ સ્ટેશન ખાતે તપાસ કરવામાં આવતા તેની વિરુદ્ધ આજદિન સુધીમાં ચોરી, ઘરફોડ ચોરી અને ધાડના કુલ 9 ગુના નોંધાયેલા હોવાની વિગતો મળી છે. પોલીસે પકડાયેલા ચારેય આરોપીઓ તેમજ ફરાર થયેલા અન્ય ચાર આરોપીઓ વિરુદ્ધ સંયુક્ત રીતે વિસનગર તાલુકા પોલીસ મથકમાં ગુનો નોંધી વધુ તપાસ હાથ ધરવામાં આવી છે.