રાજકોટમાં સાયબર ગઠિયાઓએ એક શિક્ષિત ડોક્ટરને શિકાર બનાવી લાખો રૂપિયાની છેતરપિંડી આચરી છે. ઓસ્ટ્રેલિયાની પ્રતિષ્ઠિત હોસ્પિટલમાં મેડિકલ રિસર્ચ આસિસ્ટન્ટ તરીકેની નોકરી અપાવવાના બહાને ડો. ચિન્મય ત્રિવેદી પાસેથી કુલ 50.75 લાખ રૂપિયા પડાવી લેવામાં આવ્યા છે. આ કેસમાં રાજકોટ સાયબર ક્રાઈમ પોલીસે મધ્યપ્રદેશના એક આરોપીની ધરપકડ કરી છે.
વોટ્સએપ ગ્રુપ અને ફેક ઓફર લેટરની જાળ :&nbsp;
સમગ્ર ઘટનાની વિગત મુજબ, ફરિયાદી ડોક્ટરે ઓસ્ટ્રેલિયામાં નોકરી માટે એક પરીક્ષા આપી હતી. ત્યારબાદ તેમને એએમસી ઓસ્ટ્રેલિયા-2025 નામના વોટ્સએપ ગ્રુપમાં ઉમેરવામાં આવ્યા હતા. આ ગ્રુપમાં રોયલ એડિલેઈટ હોસ્પિટલની ખોટી જાહેરાત આપીને આરોપીઓએ ડોક્ટરનો સંપર્ક કર્યો હતો. શરૂઆતમાં ડોક્યુમેન્ટ વેરિફિકેશન અને રજીસ્ટ્રેશન ફીના નામે લાખો રૂપિયા ઓનલાઈન ટ્રાન્સફર કરાવાયા હતા. ત્યારબાદ વિશ્વાસ જીતવા માટે આરોપીઓએ નકલી ઓફર લેટર પણ મોકલ્યો હતો.
વીઝા અને બેંક બેલેન્સના નામે વધુ પડાવ્યા :&nbsp;
ઠગબાજોએ માત્ર ઓફર લેટર સુધી મર્યાદિત ન રહીને વીઝા એજન્ટ અને બેંક વેરિફિકેશનના નામે પણ મોટી રકમની માંગણી કરી હતી. ઓસ્ટ્રેલિયાની બેંકમાં ખાતું ખોલાવવા અને તેમાં મિનિમમ બેલેન્સ રાખવાના બહાને ફરિયાદી પાસેથી અલગ-અલગ ભારતીય બેંક ખાતાઓમાં 24 લાખ રૂપિયા જમા કરાવાયા હતા. જ્યારે ડોક્ટરે સીધો હોસ્પિટલ અને બેંકનો સંપર્ક કર્યો ત્યારે ખબર પડી કે તેમની સાથે છેતરપિંડી થઈ છે.
માત્ર 2000 રૂપિયાના કમિશન માટે બન્યો સાગરીત :&nbsp;
સાયબર ક્રાઈમ પોલીસે ટેકનિકલ તપાસના આધારે મધ્યપ્રદેશના વિવેક કુસવાહ નામના 20 વર્ષીય યુવકની ધરપકડ કરી છે. તપાસમાં બહાર આવ્યું છે કે મુખ્ય સૂત્રધારોએ વિવેકના બેંક ખાતાનો ઉપયોગ કર્યો હતો. તેના ખાતામાં છેતરપિંડીના 1.50 લાખ રૂપિયા ટ્રાન્સફર થયા હતા, જેના બદલામાં તેને માત્ર 2000 રૂપિયાનું કમિશન મળ્યું હતું. હાલ પોલીસ આ રેકેટમાં જોડાયેલા અન્ય મુખ્ય આરોપીઓને પકડવા માટે વધુ તપાસ કરી રહી છે.

સાયબર ક્રાઈમ ઠગાઈ

ડોક્ટરને ઓસ્ટ્રેલિયાની હોસ્પિટલમાં નોકરીની લાલચ આપી છેતરપિંડી

February 5, 2026 | 20:43 IST