ગેંગરેપના આરોપીને વિદેશ ભાગી જવા માટે પોલીસે સેફ પેસેજ કરી આપ્યો

વડોદરા કારેલીબાગ વિસ્તારમાં ટિફિન આપવા માટે આવેલી મહિલા પર સુખી સંપન્ન પરિવારના સિનિયર સિટિઝન અને તેના મિત્રએ બળાત્કાર ગુજાર્યો હોવાની ફરિયાદમાં કારેલીબાગ પોલીસે આરોપી સામે કાર્યવાહી કરવાના બદલે કેસને રફેદફે કરી આરોપીઓને ભાગી જવા માટે સેફ પેસેજ કરી આપ્યો હોવાના આક્ષેપ કરતી પીડિતાએ હાઇકોર્ટમાં કેસ કરતા શહેર  પોલીસને તેડું આવ્યું છે.  

છાણી કેનાલ વિસ્તારમાં રહેતી ૩૨ વર્ષની મહિલાએ ગત તા. ૦૯ - ૧૦ - ૨૦૨૩ ના રોજ કારેલીબાગ પોલીસ સ્ટેશનમાં યોગેશભાઇ તથા તેના મિત્ર સામે ગેંગરેપની ફરિયાદ નોંધાવી જણાવ્યું હતું કે, ફરિયાદ દાખલ થવાના બે વર્ષ પહેલા વાઘોડિયા રોડ ખાતે રહેતા જ્યોતિબેનની ઓફિસે  હું ટિફિન આપવા માટે કોઇક વખત જતી હતી. એક દિવસ હું ત્યાં ગઇ ત્યારે હરિશભાઇ નામના વ્યક્તિ બેઠા હતા. હરિશભાઇ તથા જ્યોતિબેન મકાનની વાત કરતા  હતા. મારે પણ મકાન લેવાનું હોઇ હરિશભાઇ સાથે ફ્લેટ જોવા ગઇ હતી. ત્યારબાદ હરિશભાઇએ તેમના મિત્ર યોગેશભાઇને મારો નંબર આપી ટિફિન સર્વિસ માટે વાત કરી હતી.  કારેલીબાગ પાણીની ટાંકી રોડ પર જૈન મંદિર પાસે રહેતા ૬૩ વર્ષીય યોગેશભાઇના ઘરે હું એક દિવસ ટિફિન  આપવા ગઇ હતી. ટિફિન લઇને જ પાછા જાવ. તેમ કહીને તેઓએ મને જ્યુસ પીવા આપ્યું હતું. જ્યુસ પીતાની સાથે જ હું અર્ધબેભાન થઇ ગઇ હતી. યોગેશભાઇ અને તેમના મિત્રે મારી પર  રેપ કર્યો હતો. ત્યારબાદ મને રોડ પર છોડી આવ્યા હતા.ત્યાંથી એમ્બ્યુલન્સમાં મને સયાજી હોસ્પિટલમાં લઇ જવામાં આવી હતી.

આ ગુનો દાખલ થયાના ૧૭ મહિના  પછી પણ કારેલીબાગ પોલીસ  પીડિતાને ગોળ ગોળ ફેરવી રહી છે. પોલીસ કહે છે કે, બી સમરી (ફરિયાદ ખોટી હોવાનો)  રિપોર્ટ તૈયાર કર્યો છે. પરંતુ, તે રિપોર્ટ હજી કોર્ટમાં મૂકવામાં આવ્યો નથી. તે  રિપોર્ટ મંજૂર થાય તો જ આરોપીને નિર્દોષ ઠેરવી શકાય. પરંતુ, તે  પહેલા તો આરોપી યોગેશ વિદેશ જતો રહ્યો છે. પીડિતા આ કેસની માહિતી મેળવવા માટે કારેલીબાગ  પોલીસ સ્ટેશનના ધક્કા ખાઇ રહી છે. પરંતુ, પોલીસ તેને માહિતી પણ આપતી નથી. છેવટે પીડિતાએ વકીલ અતુલ મિસ્ત્રીનો સંપર્ક કરીને  હાઇકોર્ટમાં  કેસ દાખલ કર્યો છે. હાઇકોર્ટે આગામી ૨૩ મી માર્ચે સરકારને જવાબ રજૂ કરવા જણાવ્યું છે. તેમજ આગામી મુદ્દત સુધી તપાસ અધિકારીને સંબંધિત કોર્ટમાં કોઇ પણ રિપોર્ટ કરવાની મનાઇ ફરમાવી છે.