સાણંદમાં હાઇપ્રોફાઇલ મહેફિલમાં પોલીસની એન્ટ્રી

સાણંદના કલહાર બ્લ્યુ એન્ડ ગ્રીનના વીલા નંબર 358માં કેટલાક હાઇપ્રોફાઇલ લોકો દારુની મહેફિલ માણતા હોવાની બાતમીના આધારે સાણંદ પોલીસે ગત રાત્રે દરોડો પાડતાં દોડધામ મચી ગઇ હતી. પોલીસના દરોડામાં દારુની મહેફિલ માણી રહેલા 12 નબીરા ઝડપાયા હતા. જાણવા મળેલી માહિતી મુજબ રિઅલ એસ્ટેટ સાથે સંકળાયેલા નબીરાની બર્થ ડે પાર્ટી ચાલી રહી હતી અને તેમાં દારુની છોળો ઉડી રહી હતી ત્યારે પોલીસ ત્રાટકી હતી. આ પાર્ટીમાં કેટલીક યુવતીઓ પણ હોવાની વ્યાપક ચર્ચા ચાલી રહી હતી. 

જો કે પોલીસે સત્તાવાર જે નિવેદન બહાર પાડ્યું છે તેમાં લખાયેલું છે કે સાણંદ પોલીસને બાતમી મળી હતી કે સાણંદ ગામની સીમમાં કલહાર બ્લ્યુ એન્ડ ગ્રીનના વીલા નંબર 358માં કેટલાક યુવકો દારુની મહેફિલ માણે છે જેથી પોલીસે દરોડો પાડ્યો હતો જેમાં દારુની મહેફિલ માણી રહેલા 12 નબીરા હતા. પોલીસે તેમની પાસેથી દારુની બોટલો સહિત 11 મોબાઇલ ફોન પણ કબજે કર્યા હતા.

પોલીસના દરોડામાં જીમીત જયેશભાઇ શેઠ (રહે, સત્વમ પાર્ક લેન્ડ, સરગાસણ), હર્ષ જયેશભાઇ શેઠ (રહે, સત્વમ પાર્ક, સરગાસણ) ભાવેશ રામનરેશ કથિરીયા (રહે, નૈયા એપાર્ટમેન્ટ, રામોલ), પ્રતિક સુરેશ આનંદ (રહે, મનિષા બિલ્ડીંગ, નાસીક), કુશલ કિરીટભાઇ પ્રજાપતિ (રહે, રાધાકૃષ્ણ સોસાયટી, ઓઢવ), દિપ ચન્દ્રકાંતભાઇ વડોદરીયા (રહે, શ્રીનાથ એપાર્ટમેન્ટ, નવા વાડજ) રાજન ગોપાલભાઇ સોની, (રહે, ભગવતી હાઇટ્સ, નવી મુંબઇ), રોનીત રાજેશભાઇ પંચાલ (રહે, સીતારામ એવન્યુ, ન્યુ રાણીપ), નોમાન મુખ્તાર શેખ (રહે, અલબરુદ, સરખેજ), જય પિયુષભાઇ વ્યાસ (રહે, વૃંદાવન એપાર્ટમેન્ટ, સરગાસણ), મહાવીરસિંહ વિક્રમસિંહ સોલંકી (રહે, તેજેન્દ્ર વિહાર સોસાયટી, ઓઢવ) તથા યશ ઘનશ્યામભાઇ સેન (રહે, રામદેવપીર સોસા. ઠક્કરબાપા નગર )નો સમાવેશ થાય છે.

 

 જો કે ચર્ચાતી માહિતી મુજબ આ પાર્ટીમાં 100થી વધુ લોકો હતા અને તેમાં 26 જેટલી યુવતીઓ પણ હતી જેમને નોટિસ આપીને છોડી દેવાઇ હતી. 20 જુલાઈની રાત્રે પોલીસે બાતમીના આધારે રેડ કરી હતી જેમાં સાણંદ પોલીસ સ્ટેશનની સાથે અસલાલી, ચાંગોદર, બોપલ પોલીસ તથા 2 પંચોને સાથે રાખી રેડ કરવામા આવી હતી. પોલીસ રેડમાં બર્થડે પાર્ટીના આયોજક અમદાવાદમાં રિયલ એસ્ટેટ સાથે સંકળાયેલા પ્રતિક સાંઘી હોવાનું સામે આવ્યું હતું. રેડ દરમિયાન હાજર મહિલા-પુરુષોની બ્રેથ એનેલાયઝરથી તપાસ કરતા 13 પુરુષો અને 26 મહિલાઓ શંકાસ્પદ પીધેલ હાલતમાં મળી આવ્યા હતા. જેમને વધુ તપાસણી માટે મેડિકલ બ્લડ સેમ્પલની કાર્યવાહી કરવામાં આવી હતી. આ સાથે કુલ 5 સીલબંધ દારૂની બોટલ મળતા કબ્જે કરી સમગ્ર બનાવ બાબતે પ્રોહીબિશન એક્ટ મુજબ ગુનો દાખલ કરી કાયદેસર કાર્યવાહી કરવામાં આવી છે.

આ પણ વાંચો---

યુવતીનો વિડીયો બનાવી દુષ્કર્મ ગુજારનાર ઝડપાયો