રાજકોટમાં AAP મહિલા કાર્યકરનું રહસ્યમય મોત!

ફ્લેટમાંથી યુવતીનો મૃતદેહ મળતા ચકચાર
રાજકોટની ગોંડલ ચોકડી નજીક આવેલા સિટી ફ્લેટમાંથી 23 વર્ષીય યુવતી નંદની બોસમીયાનો મૃતદેહ મળતાં ભારે ચકચાર મચી ગઈ છે. નંદની મૂળ જેતપુરની રહેવાસી છે અને ગત નગરપાલિકા ચૂંટણીમાં આમ આદમી પાર્ટી તરફથી ઉમેદવાર તરીકે મેદાનમાં ઉતરી હતી. ઘટનાને લઈને અનેક સવાલો ઉભા થયા છે અને પોલીસ દ્વારા સમગ્ર મામલે ઊંડાણપૂર્વક તપાસ શરૂ કરવામાં આવી છે.

લિવ-ઇન રિલેશનશિપમાં રહેતી હતી
માહિતી મુજબ, નંદની અભ્યાસ પૂર્ણ કર્યા બાદ મેડિકલ રિપ્રેઝેન્ટેટિવ તરીકે કાર્યરત હતી. જૂનાગઢમાં રહેતા અસલમ હુસેન સમા સાથે પરિચય થયા બાદ બંને વચ્ચે પ્રેમસંબંધ બંધાયો હતો. બાદમાં બંનેએ મૈત્રી કરાર કરીને રાજકોટમાં સાથે રહેવાનું શરૂ કર્યું હતું. આ સંબંધનો બંનેના પરિવારો દ્વારા વિરોધ કરવામાં આવ્યો હતો.

પરિવારજનોનો હત્યાનો ગંભીર આક્ષેપ
મૃતકના પિતા આનંદભાઈ બોસમીયાએ ઘટનાને આત્મહત્યા ગણવાની ના પાડી છે. તેમના જણાવ્યા મુજબ, ફ્લેટનો મુખ્ય દરવાજો સંપૂર્ણપણે બંધ નહોતો અને પાછળનો દરવાજો પણ ખુલ્લો હતો. તેમણે આરોપ લગાવ્યો છે કે, તેમની પુત્રીની હત્યા કરીને ઘટનાને આત્મહત્યાનું સ્વરૂપ આપવાનો પ્રયાસ કરવામાં આવ્યો છે.

પ્રેમી દ્વારા ત્રાસ અપાતો હોવાના આરોપ
પરિવારજનોના જણાવ્યા અનુસાર, નંદની ઘણા સમયથી માનસિક અને શારીરિક ત્રાસનો સામનો કરી રહી હતી. તેણીએ અનેક વખત નજીકના લોકોને જણાવ્યું હતું કે, પ્રેમી અસલમ સાથેના સંબંધોમાં સતત તણાવ અને ઝઘડા રહેતા હતા. આ કારણે તે ભારે માનસિક દબાણમાં જીવતી હતી.

પાંચ મહિના અગાઉ હુમલાનો કેસ નોંધાયો હતો
પ્રેમ સંબંધનો કૌટુંબિક વિવાદ એટલો વકર્યો હતો કે પાંચ મહિના પહેલા જૂનાગઢમાં અસલમની પત્ની, સાસુ, સસરા, માતા અને માસીએ નંદની પર છરી વડે ખૂની હુમલો કર્યો હતો. જે અંગે જૂનાગઢ સી ડિવિઝન પોલીસ સ્ટેશનમાં ફરિયાદ નોંધાઈ હતી. આ હુમલા બાદ અસલમ અને નંદની પાંચ મહિનાથી રાજકોટમાં આગમન સિટી ખાતે ભાડાનો રૂમ રાખીને સાથે રહેતા હતા. અસલમ અવારનવાર ઝઘડો કરી ઢોર માર મારતો હતો એટલે નંદની ભારે માનસિક તણાવમાં રહેતી હતી.

પરિવારના વધુ ચોંકાવનારા આક્ષેપ
મૃતકની નાની બહેને આક્ષેપ કર્યો કે, 'અસલમે નંદનીને અમાનવીય ત્રાસ આપ્યો છે. સંતાન નથી જોઈતું કહીને તેણીનું ઓપરેશન કરાવી ગર્ભાશય કઢાવી નાખ્યું હતું. એકાદ મહિનાથી અસલમ અને તેના પરિવારનું ટોર્ચર અસહ્ય બની ગયું હતું. માટે તે એકલી રહીને નોકરી કરીને નવું જીવન શરૂ કરવા માંગતી હતી. પરંતુ એ પહેલાં જ કરુણ અંત આવી ગયો હતો.'

નંદનીના અંતિમ સંદેશથી રહસ્ય ઘેરાયું
આપઘાત કરતાં પહેલાં નંદનીએ મોકલેલા છેલ્લા મેસેજમાં ખુલાસો કર્યો હતો કે, તેના તમામ સોના-ચાંદીના ઘરેણાં અસલમે ગીરવે મૂકી દીધા છે. તેની જિંદગી નરક સમાન બનાવી દીધી છે. માનસિક રીતે સંપૂર્ણ ભાંગી પડેલી નંદનીએ અંતિમ પગલું ભરતાં પહેલાં સોશિયલ મીડિયા સ્ટેટસ પર હૃદયદ્રાવક શબ્દો લખ્યા હતાં કે, 'પપ્પા હું જિંદગીનો જંગ હારી ગઈ છું.' નાની બહેન રૂપલે ફોન કરતાં નંદનીએ ફોન રિસીવ કર્યો નહોતો. તેથી પરિવારે માનેલા ભાઈ રવિને ફ્લેટ પર તપાસ કરવા મોકલ્યો હતો. રવિ ત્યાં  પહોંચ્યો ત્યારે ફ્લેટના હોલમાં નંદનીની ગળે ફાંસો ખાધેલો મૃતદેહ મળી આવ્યો હતો.

ફોરેન્સિક રિપોર્ટની રાહ
પોલીસે મૃતદેહનો ફોરેન્સિક પોસ્ટમોર્ટમ કરાવી વધુ તપાસ હાથ ધરી છે. હાલ અધિકારીઓ પોસ્ટમોર્ટમ અને ફોરેન્સિક રિપોર્ટની રાહ જોઈ રહ્યા છે. રિપોર્ટ આવ્યા બાદ મોત પાછળનું સાચું કારણ અને હકીકત જાણી શકાશે.