મુંબઈમાં સાયબર ક્રાઇમનો અત્યાર સુધીનો સૌથી મોટો કેસ સામે આવ્યો છે. અહીં 72 વર્ષીય એક ઉદ્યોગપતિને 'ડિજિટલ અરેસ્ટ'ની ધમકી આપીને ઠગબાજોએ ₹58 કરોડની જંગી રકમ પડાવી લીધી છે. અધિકારીઓના જણાવ્યા અનુસાર, કોઈ વ્યક્તિગત કેસમાં 'ડિજિટલ અરેસ્ટ' દ્વારા આટલી મોટી રકમની છેતરપિંડી થઈ હોય તેવો આ કદાચ સૌથી મોટો નોંધાયેલો બનાવ છે, જેનાથી સમગ્ર આરોગ્ય વિભાગમાં ખળભળાટ મચી ગયો છે.
ED અને CBIના અધિકારીઓનો સ્વાંગ
પોલીસના જણાવ્યા અનુસાર, 19 ઓગસ્ટથી 8 ઓક્ટોબર દરમિયાન છેતરપિંડી કરનારાઓએ ઉદ્યોગપતિનો સંપર્ક કર્યો હતો. તેમણે પોતાને એન્ફોર્સમેન્ટ ડિરેક્ટોરેટ (ED) અને સેન્ટ્રલ બ્યુરો ઓફ ઇન્વેસ્ટિગેશન (CBI)ના અધિકારીઓ તરીકે રજૂ કર્યા હતા અને દાવો કર્યો હતો કે ઉદ્યોગપતિનું નામ મની લોન્ડરિંગના કેસમાં સામે આવ્યું છે.
બાદમાં, તેમણે વીડિયો કોલ કરીને ઉદ્યોગપતિ અને તેમના પત્નીને 'ડિજિટલ અરેસ્ટ' હેઠળ મૂક્યા હતા. 'ડિજિટલ અરેસ્ટ' એ સાયબર ક્રાઇમનો એક નવો પ્રકાર છે, જેમાં ઠગબાજો સરકારી એજન્સીઓના કર્મચારીઓ તરીકે ધમકી આપીને ભોગ બનનારને ડરાવે છે અને દબાણ હેઠળ પૈસા જમા કરાવવા મજબૂર કરે છે. આ દંપતી ગભરાઈ ગયું અને ઠગબાજો દ્વારા આપવામાં આવેલા બેંક ખાતાઓમાં બે મહિનાના ગાળામાં RTGS દ્વારા ₹58 કરોડ ટ્રાન્સફર કરી દીધા.
મહારાષ્ટ્ર સાયબર વિભાગની કાર્યવાહી
ઉદ્યોગપતિને છેતરાયાનો ખ્યાલ આવતા જ તેમણે સાયબર પોલીસનો સંપર્ક કર્યો હતો. મહારાષ્ટ્ર સાયબર વિભાગે તાત્કાલિક કેસ નોંધીને તપાસ શરૂ કરી હતી. પોલીસ તપાસમાં સામે આવ્યું છે કે આ રકમ ઓછામાં ઓછા 18 જુદા-જુદા બેંક ખાતાઓમાં ટ્રાન્સફર કરવામાં આવી હતી.
સાયબર ક્રાઇમ ટીમે તાત્કાલિક ધોરણે આ તમામ બેંક ખાતાઓને ફ્રીઝ કરવાની પ્રક્રિયા હાથ ધરી છે. આ મામલામાં પોલીસે ત્રણ આરોપીઓ- મલાડના અબ્દુલ ખુલ્લી (47), મુંબઈ સેન્ટ્રલના અર્જુન કડવાસરા (55) અને તેના ભાઈ જેઠારામ (35)ની ધરપકડ કરી છે. આ જટિલ સાયબર ફ્રોડના સમગ્ર નેટવર્કની તપાસ ચાલી રહી છે.

ડીજીટલ એરેસ્ટ કરી રૂ.58 કરોડ પડાવ્યા

ED/CBIનો ડર બતાવીને ₹58 કરોડ પડાવી લીધા, 18 ખાતાઓમાં પૈસા ટ્રાન્સફર, 3 આરોપી ઝડપાયા.

October 16, 2025 | 20:28 IST