લો બોલો.. તમારા ઘરના કે ઓફિસના સીસીટીવી કેમેરા પણ સુરક્ષિત નથી

સામાન્ય રીતે કોઈ જાહેર સ્થળ, હોસ્પિટલ, શૈક્ષણિક સંસ્થાઓના સીસીટીવી કેમેરા સુરક્ષિત રહી શકતા નથી. પરંતુ, હવે તમારા ઘરના કે ઓફિસના પણ સીસીટીવી સુરક્ષિત નથી. આ અમે નહીં પણ ખુદ ગુજરાતના ગૃહ રાજ્યમંત્રી હર્ષ સંઘવી કહી રહ્યા છે. વિધાનસભામાં સીસીટીવી કેમેરાની જાણકારી આપતા સમયે હર્ષ સંઘવીએ સીસીટીવી કેમેરા બાબતે સાવચેતી રાખવા નાગરિકોને અપીલ કરી છે.

રાજકોટની પાયલ હોસ્પિટલના સીસીટીવી ફૂટેજ વાયરલ થયા બાદ ઘરના અને ઓફિસના સીસીટીવી મુદ્દે લોકોમાં ચિંતાનો વિષય બન્યો છે. રાજકોટ હોસ્પિટલના સીસીટીવી ફૂટેજ વાયરલ થવાના કેસમાં અમદાવાદ સાયબર ક્રાઈમે 7 શખ્સોની ધરપકડ કરી છે. પરંતુ, આરોપીઓની પૂછપરછ દરમિયાન થયેલા અનેક ખુલાસાથી સૌ કોઈ લોકો ચોંકી ગયા છે.

સુરત, મહારાષ્ટ્ર, ઉત્તરપ્રદેશ અને દિલ્લીથી પકડાયેલા આરોપીઓ સીસીટીવી કેમેરા હેક કરી ફૂટેજ મેળવીને તેનું વેચાણ કરી કમાણી કરતા હતા. આરોપીઓના સોશિયલ મીડિયા એકાઉન્ટની તપાસમાં જાણવા મળ્યુ છે કે તેઓએ 50 હજારથી વધુ સીસીટીવી કેમેરા હેક કર્યા છે. તે પૈકી કેટલાક સીસીટીવી ફૂટેજનું વેચાણ કરીને કમાણી કરી છે.

સાયબર ક્રાઈમની તપાસમાં બહાર આવ્યું છે કે હેકર્સે બાંગ્લાદેશના એક ઈન્સ્ટાગ્રામ એકાઉન્ટ સાથે પણ કનેક્શન રાખ્યું હતું. આ એકાઉન્ટ દ્વારા ભારતના વીડિયો વિદેશમાં વેચાતા હોવાનો ખુલાસો થયો છે. હેકર્સે પાંચથી છ લાખ રૂપિયાની કમાણી કરી છે.  જેમાં બેડરૂમ અને હોસ્પિટલના સીસીટીવીની ડિમાન્ડ સૌથી વધુ હોવાનું તપાસમાં સામે આવ્યુ છે.

અમદાવાદ સાયબર ક્રાઈમ દ્વારા હજુ તપાસ ચાલી રહી છે. તેવામાં ગૃહ રાજ્ય મંત્રી હર્ષ સંઘવીએ વિધાનસભામાં જવાબ આપતા જણાવ્યુ હતુ કે, હવે તમારા ઘરના કે ઓફિસના સીસીટીવી કેમેરા પણ સુરક્ષિત નથી. સીસીટીવી કેમેરા ઈન્સ્ટોલ કરતી કંપનીઓના પાસવર્ડ ચેન્જ નહી કર્યા હોય તો તમારા પણ સીસીટીવી હેક થવાની શક્યતા છે. તેથી ઘર કે ઓફિસમાં સીસીટીવી કેમેરા રાખતાં નાગરિકોને સાવચેતી રાખવા ગૃહ રાજ્યમંત્રીએ અપીલ કરી છે.

સુરક્ષાને ધ્યાનમાં રાખી ગૃહ રાજ્યમંત્રીએ CCTV કેમેરા માટે નેટવર્ક સુરક્ષા મજબૂત કરવા, સોફ્ટવેર અપડેટ રાખવા, NVR/DVR સિસ્ટમને સુરક્ષિત રાખવા, રીમોટ એક્સેસ મર્યાદિત કરવા અને ક્લાઉડ સ્ટોરેજનું રક્ષણ કરવા જેવી સલાહ આપી છે.